ಶ್ರೀರಂಗಪಟ್ಟಣ: ಬೆಂಗಳೂರು-ಮೈಸೂರು ಜೋಡಿ ರೈಲು ಮಾರ್ಗಕ್ಕೆ ಅಡ್ಡಿಯಾಗಿರುವ, ಟಿಪ್ಪು ಸುಲ್ತಾನ್‌ ಕಾಲದಲ್ಲಿ ನಿರ್ಮಾಣವಾಗಿದ್ದ ಮದ್ದಿನ ಮನೆ ಸ್ಥಳಾಂತರ ಪ್ರಕ್ರಿಯೆಯನ್ನು ವ್ಯವಸ್ಥಿತವಾಗಿ, ಯಶಸ್ವಿಯಾಗಿ ನಡೆಸಿದ ಅಧಿಕಾರಿಗಳ ತಂಡಕ್ಕೆ 50 ಸಾವಿರ ರೂ. ನಗದು ಬಹುಮಾನ ನೀಡಲಾಗುವುದು ಎಂದು ನೈರುತ್ವ ರೈಲ್ವೆ ಮಾರ್ಗದ ಜನರಲ್‌ ಮ್ಯಾನೇಜರ್‌ ಎ.ಕೆ.ಗುಪ್ತಾ ಹೇಳಿದ್ದಾರೆ. ಮದ್ದಿನ ಮನೆ ಸ್ಥಳಾಂತರ ಕಾಮಗಾರಿ ಸ್ಥಳಕ್ಕೆ ಶುಕ್ರವಾರ ಭೇಟಿ ನೀಡಿ ವೀಕ್ಷಿಸಿದ ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದರು. ''ಮದ್ದಿನ ಮನೆ ಸ್ಮಾರಕ ಸ್ಥಳಾಂತರ ಪ್ರಕ್ರಿಯೆ ಶೇ. 80ರಷ್ಟು ಮುಗಿದಿದೆ. ಉಳಿದ ಕೆಲಸ ಇನ್ನೊಂದು ತಿಂಗಳಲ್ಲಿ ಮುಗಿಯಲಿದೆ. ಕಳೆದ 8 ವರ್ಷಗಳ ಹಿಂದೆ ಜೋಡಿ ರೈಲು ಮಾರ್ಗ ಕಾಮಗಾರಿ ಆರಂಭವಾಗಿತ್ತು. 6 ತಿಂಗಳಿನಿಂದ ಅಮೆರಿಕದ ಉಲ್ಫೆ ಕಂಪೆನಿಯ ಸಹಯೋಗದಲ್ಲಿ ಕಾಮಗಾರಿ ಕೈಗೊಳ್ಳಲಾಗಿತ್ತು. ನಿರೀಕ್ಷೆಯಂತೆ ಕಾಮಗಾರಿ ಮುಗಿದಿದೆ,'' ಎಂದು ಹೇಳಿದರು. ''ಮೈಸೂರು ರೈಲು ನಿಲ್ದಾಣವನ್ನು 3 ಕೋಟಿ ರೂ. ವೆಚ್ಚದಲ್ಲಿ ಅಭಿವೃದ್ಧಿ ಪಡಿಸಲು ಉದ್ದೇಶಿಸಲಾಗಿದೆ. ನೈರುತ್ವ ರೈಲ್ವೆ ವಲಯದಲ್ಲಿ 30 ಹೊಸ ರೈಲು ಮಾರ್ಗ ನಿರ್ಮಿಸುವ ಉದ್ದೇಶವಿದೆ. ಶ್ರೀರಂಗಪಟ್ಟಣದಲ್ಲಿ ಬಾಕಿ ಉಳಿದಿರುವ 500 ಮೀಟರ್‌ ಕಾಮಗಾರಿ ಶೀಘ್ರ ಮುಗಿಯಲಿದೆ. ಮೇ ಅಂತ್ಯದೊಳಗೆ ಬೆಂಗಳೂರು-ಮೈಸೂರು ಮಾರ್ಗ ರೈಲು ಸಂಚಾರ ಆರಂಭವಾಗಲಿದೆ,'' ಎಂದು ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು. ''ಮೈಸೂರು-ಕುಶಾಲನಗರ ನಡುವೆ 120 ಕಿಲೋ ಮೀಟರ್‌ ರೈಲು ಮಾರ್ಗ ನಿರ್ಮಾಣ ಕಾಮಗಾರಿ ಸರ್ವೇ ಕೆಲಸ ಮುಗಿದಿದೆ. ಮೈಸೂರು ಜಿಲ್ಲೆ ಕಡಕೊಳದಲ್ಲಿ 100 ಕೋಟಿ ವೆಚ್ಚದಲ್ಲಿ ಸ್ಯಾಟ್‌ಲೈಟ್‌ ರೈಲು ನಿಲ್ದಾಣ ನಿರ್ಮಿಸಲಾಗುತ್ತದೆ,'' ಎಂದು ತಿಳಿಸಿದರು. ನೈರುತ್ಯ ವಲಯ ರೈಲ್ವೆ ಮುಖ್ಯ ಆಡಳಿತಾಧಿಕಾರಿ ಅಶೋಕ್‌ ಗುಪ್ತ, ಮೈಸೂರು ಡಿಆರ್‌ಎಂ ಅಕುಲ್‌ಗುಪ್ತ, ಡೆಪ್ಯೂಟಿ ಮುಖ್ಯ ಎಂಜಿನಿಯರ್‌ ರವಿಚಂದ್ರನ್‌, ಎಇಇ ಕೇಶವಮೂರ್ತಿ ಹಾಜರಿದ್ದರು.
↧
ಮದ್ದಿನ ಮನೆ ಸ್ಥಳಾಂತರಿಸಿದ ತಂಡಕ್ಕೆ 50 ಸಾವಿರ ರೂ. ಬಹುಮಾನ
↧