ಮಂಡ್ಯ: ಕನ್ನಡ ಭಾಷೆ ಅಳಿವಿನಂಚಿನಲ್ಲಿದೆ ಎಂದರೆ ಅದನ್ನು ಒಪ್ಪಲು ಸಾಧ್ಯವಿಲ್ಲ. ಕನ್ನಡ ನಮ್ಮ ಮಾತೃ ಭಾಷೆ ಆಗಿಯೇ ಎಂದೆಂದಿಗೂ ಅಳಿಯದೇ ಉಳಿಯುತ್ತದೆ ಎಂದು ಕರ್ನಾಟಕ ಪೊಲೀಸ್‌ ಅಕಾಡೆಮಿ ಉಪ ನಿರ್ದೇಶಕಿ ಧರಣಿದೇವಿ ಮಾಲಗತ್ತಿ ಹೇಳಿದರು. ನಗರದ ನಾಲ್ವಡಿ ಕೃಷ್ಣರಾಜ ಒಡೆಯರ್‌ ಕಲಾಮಂದಿರದಲ್ಲಿ ನಡೆದ ಅಖಿಲ ಕರ್ನಾಟಕ ಕರಾವಳಿ ಸಾಂಸ್ಕೃತಿಕ ಒಕ್ಕೂಟದ ವಾರ್ಷಿಕೋತ್ಸವ ಸಮಾರಂಭದಲ್ಲಿ ಮಾತನಾಡಿದ ಅವರು, ಬೇರೆ ಭಾಷೆಗಳನ್ನು ನೋಡಿದರೆ ಆಯಾ ವರ್ಗದ ಜನರಿಗೆ ಅವರು ಮಾತನಾಡುವ ಭಾಷೆಯು ಮಾತೃಭಾಷೆ ಆಗಿಯೇ ಅಚ್ಚಳಿಯದೇ ಉಳಿಸಿಕೊಂಡು ಬಂದಿರುವುದು ಕಾಣಸಿಗುತ್ತಾರೆ. ಅದೇ ರೀತಿ ಕನ್ನಡ ಭಾಷಾ ಪ್ರೇಮಿಗಳು ನಮ್ಮಲ್ಲಿದ್ದಾರೆ ಎಂದರು. ಮನುಷ್ಯನು ತನ್ನ ಜೀವನದಲ್ಲಿ ಅಳವಡಿಸಿಕೊಳ್ಳುವ ರೂಢಿಗಳಲ್ಲಿ ಬದುಕು ಕಟ್ಟಿಕೊಳ್ಳುವ ಗುಣವಿದೆ. ಪ್ರತಿಯೊಬ್ಬರೂ ಸೌಹಾರ್ದಯುತವಾದ ಗುಣ ಬೆಳೆಸಿಕೊಳ್ಳಬೇಕು. ಕರಾವಳಿಯ ಜನರು ಸಾಂಸ್ಕೃತಿಕವಾಗಿ ಮುಂದುವರೆದಿದ್ದಾರೆ. ಅವರು ಎಲ್ಲರನ್ನೂ ಗೌರವದಿಂದ ಕಾಣುತ್ತಾರೆ. ಹುಟ್ಟೂರಿನ ಬಗ್ಗೆ ಎಲ್ಲರಿಗೂ ತಮ್ಮದೇ ತುಡಿತ ಇರುತ್ತದೆ ಎಂದು ಹೇಳಿದರು. ವಿಧಾನ ಪರಿಷತ್‌ ಸದಸ್ಯ ಕೆ.ಟಿ.ಶ್ರೀಕಂಠೇಗೌಡ ಮಾತನಾಡಿ, ಶಿಸ್ತು, ಕ್ರಿಯಾಶೀಲತೆ, ಬದ್ಧತೆ, ಬದುಕನ್ನು ಕರಾವಳಿಯ ಜನರನ್ನು ನೋಡಿ ಕಲಿಯಬೇಕು ಎಂದು ಹೇಳಲಾಗುತ್ತಿತ್ತು. ಆದರಿಂದು ಪರಿಸ್ಥಿತಿ ಬದಲಾಗಿದ್ದು, ಕೋಮು ಕಲಹಗಳಲ್ಲಿ ಆತಂಕ ಮೂಡಿಸುತ್ತಿರುವುದು ಬೇಸರ ತರಿಸಿದೆ ಎಂದು ವಿಷಾದಿಸಿದರು. ಜಿಲ್ಲೆಯ ಜನರು ಎಲ್ಲರನ್ನೂ ಗೌರವಿದಿಂದ ಕಾಣುತ್ತಾರೆ. ಅದೇ ರೀತಿ ಕರಾವಳಿಯ ಜನರನ್ನು ಕೂಡ ಗೌರವಿಸುತ್ತಾರೆ. ಸಾಹಿತ್ಯ, ಸಂಸ್ಕೃತಿ, ಶಿಕ್ಷ ಣ ಹಾಗೂ ಉದ್ಯಮದ ಪ್ರತೀಕವಾಗಿ ಕರಾವಳಿಯ ಜನರು ಹೆಸರು ಮಾಡಿದ್ದಾರೆ. ಅದು ಹಾಗೆಯೇ ಮುಂದುವರೆಯುವ ಮೂಲಕ ಬೇರೆಯವರಿಗೂ ಮಾದರಿಯಾಗಿ ನಿಲ್ಲಲ್ಲಿ ಎಂದು ಹಾರೈಸಿದರು. ಇದೇ ವೇಳೆ ನಾನಾ ಕ್ಷೇತ್ರಗಳಲ್ಲಿ ಸಾಧನೆ ಮಾಡಿದ ಕೆ.ಪಿ.ಮೃತ್ಯುಂಜಯ, ಶೈಲಜಾ ಚಂದ್ರಶೇಖರ್‌, ಎಸ್‌.ಸಿ.ಮಂಗಳಾ ಅವರನ್ನು ಗೌರವಿಸಲಾಯಿತು. ಸಾಂಸ್ಕೃತಿಕ ಕಾರ್ಯಕ್ರಮ ನೃತ್ಯ ವೈವಿಧ್ಯವನ್ನು ಗುರುದೇವ ಲಲಿತಾಕಲಾ ಅಕಾಡೆಮಿ ಕಲಾವಿದರು ನೃತ್ಯ ವೈವಿಧ್ಯ ಕಾರ್ಯಕ್ರಮ ಪ್ರಸ್ತುತಪಡಿಸಿದರು. ಬಳಿಕ ಭೂತದ ಕೋಲ ಕಾರ್ಯಕ್ರಮ ನಡೆಯಿತು. ಕರಾವಳಿ ಒಕ್ಕೂಟದ ಅಧ್ಯಕ್ಷ ಜಗನ್ನಾಥ ಶೆಟ್ಟಿ, ಸಾಹಿತಿಗಳಾದ ತೈಲೂರು ವೆಂಕಟಕೃಷ್ಣ, ಒಕ್ಕೂಟದ ಪ್ರಧಾನ ಕಾರ‍್ಯದರ್ಶಿ ಶ್ರೀನಿವಾಸಶೆಟ್ಟಿ, ಸಾಹಿತಿ ಡಾ. ಪ್ರದೀಪ್‌ಕುಮಾರ್‌ ಹೆಬ್ರಿ, ಒಕ್ಕೂಟದ ಖಜಾಂಚಿ ಚಂದ್ರಶೇಖರ್‌ ಹಾಜರಿದ್ದರು.
↧
ಕನ್ನಡ ಭಾಷೆ ಅಳಿವಿನಂಚಿನಲಿಲ್ಲ
↧