ಪ್ರಶ್ನೋತ್ತರ

- ದೇಶಿ ತಳಿಯ ಗಿರ್‌ ಹಸು ಎಲ್ಲಿ ಸಿಗುತ್ತದೆ. ದೊರೆಯುವ ಸ್ಥಳ ಮತ್ತು ಸಾಕಾಣಿಕೆ ಮಾಹಿತಿ ನೀಡಿ.

-ಶ್ರೀಕಾಂತ ಕಣವಿ ಹುಬ್ಬಳ್ಳಿ

ದೇಸಿ ತಳಿ ಗಿರ್‌ ಹಸು ಗುಜರಾತನ ಜುನಾಗಡ, ಗಿರ್‌ ಭಾಗದಲ್ಲಿವೆ. ಕರ್ನಾಟಕದಲ್ಲಿ ವಿನಯ ಡೈರಿ ಫಾರ್ಮ್‌, ಧಾರವಾಡ; ದತ್ತು ಕೊಳ್ಳುರ ಡೈರಿ ಫಾರ್ಮ್‌, ದೇವಲ ಗಾಣಗಾಪುರ, ತಾ.ಫಜಲಪುರ ಜಿ.ಕಲಬುರಗಿ ; ಪಶುವೈದ್ಯಕೀಯ ವಿಶ್ವವಿದ್ಯಾಲಯ, ಬೀದರ್‌ ಹಾಗೂ ಕೃಷಿ ವಿಶ್ವವಿದ್ಯಾಲಯ, ಧಾರವಾಡ ಇಲ್ಲಿಗೆ ಭೇಟಿ ನೀಡಿ ವೀಕ್ಷಿಸಬಹುದು. ಶುದ್ಧವಾದ ಗಿರ್‌ ತಳಿಗಳಿಗಾಗಿ ಗುಜರಾತ್‌ ರಾಜ್ಯದ ತರಸಾಯಿ ಗೋಶಾಲಾ, ಜಾಮನಗರ; ಸರ್ವೋದಯ ಗೋಶಾಲಾ ಸಾತಪುರ ಜಿಲ್ಲಾ, ಜಾಮನಗರ ; ಕಾಮಧೇನು ಗೋಶಾಲಾ ಪ್ರನ್ಸ್‌ಲಾ, ಜಿ. ರಾಜಕೋಟ ; ವೊಂಗ ಗೋಶಾಲಾ; ರಾಜಾರಾಮ ಗೋಶಾಲಾ, ತಂತೋಡಾ -ಬಾನಸಕಂತಾ ಇಲ್ಲಿ ಸಂಪರ್ಕಿಸಬಹುದು.

ಅಣಬೆ ಬೆಳೆಯಲು ಆಸಕ್ತಿಯಿದೆ. ಸಣ್ಣ ಪ್ರಮಾಣದ ಅಣಬೆ ಘಟಕ ಸ್ಥಾಪಿಸಲು ಎಷ್ಟು ಹಣ ಬೇಕಾಗಬಹುದು? ಮೈಸೂರು ಸಮೀಪ ತರಬೇತಿ ಎಲ್ಲಿ ಸಿಗುತ್ತದೆ.
- ಸಚಿನ್‌

ಸಣ್ಣ ಪ್ರಮಾಣದ (50 ಬ್ಯಾಗ್‌) ಅಣಬೆ ಘಟಕ ಸ್ಥಾಪಿಸಲು ರೂ.620 ರೂ. ಖರ್ಚು ಬರುತ್ತದೆ. ದಾವಣಗೆರೆ ಭಾಗದಲ್ಲಿ ಹಲವು ರೈತರು ಅಣಬೆ ಘಟಕಗಳನ್ನು ಟೆಕ್ನೋ ಸರ್ವ್‌ ಸಂಸ್ಥೆ ನೆರವಿನಿಂದಸ್ಥಾಪಿಸಿದ್ದಾರೆ. ಹೆಚ್ಚಿನ ವಿವರಗಳಿಗಾಗಿ ಸರಕಾರೇತರ ಸಂಸ್ಥೆಯಾದ ಟೆಕ್ನೋ ಸರ್ವ್‌ (ಮೊ. 9513201104) ಸಂಪರ್ಕಿಸಬಹುದು. ತರಬೇತಿಗಾಗಿ ತಾವು ತೋಟಗಾರಿಕೆ ಮಹಾವಿದ್ಯಾಲಯ, ಮೈಸೂರು ಅಥವಾ ಉಪತೋಟಗಾರಿಕೆ ನಿರ್ದೇಶಕರು, ಜೈವಿಕ ಘಟಕ, ಹುಳಿಮಾವು, ಬೆಂಗಳೂರು ಅಥವಾ ಭಾರತೀಯ ತೋಟಗಾರಿಕೆ ಸಂಶೋಧನಾ ಸಂಸ್ಥೆ, ಹೆಸರಘಟ್ಟ, ಬೆಂಗಳೂರು ಇಲ್ಲಿಗೆ ಸಂಪರ್ಕಿಸಿ.

- 20 ಗುಂಟೆ ಮಳೆಯಾಶ್ರಿತ ಭೂಮಿ ಇದ್ದು ಅರಣ್ಯ ಮರಗಳನ್ನು ಬೆಳೆಸುವ ವಿಚಾರವಿದೆ. ಉತ್ತಮ ಆದಾಯ ಬರುವ ಮರ ಯಾವುದು? ಸಸಿಗಳು ಎಲ್ಲಿ ಸಿಗುತ್ತವೆ? ಇದಲ್ಲದೇ ಅರ್ಧ ಎಕರೆ ನೀರಾವರಿ ಜಾಗವಿದ್ದು, ಪಪ್ಪಾಯದ ಜತೆ ಅಂತರ ಬೆಳೆಯಾಗಿ ನಾಟಿ ಬಿನ್ಸ್‌ / ದಂಟಿನಸೊಪ್ಪು ಬೆಳೆಯಬೇಕೆಂದಿದ್ದೇನೆ.

- ಸಿ.ಚಂದ್ರಶೇಖರ, ದಂಡಿಗಾನಹಳ್ಳಿ

ಉತ್ತಮ ಆದಾಯಕ್ಕೆ 8-9 ವರ್ಷಕ್ಕೆ ಕಟಾವಿಗೆ ಬರುವ ಮರಗಳಾದ ಮ್ಯಾಂಜಿಯಮ್‌, ಸಿಲ್ವರ ಓಕ್‌, ಗಾಳಿ ಮರ ಬೆಳೆಸಬಹುದು. ಸುಮಾರು 20 ವರ್ಷಕ್ಕೆ ಬರುವ ಮರಗಳಾದ ಸಾಗುವಾನಿ, ಬೀಟೆ, ಹೊನ್ನೆ ಮತ್ತು ಶ್ರೀಗಂಧ ಬೆಳೆಯಬಹುದು. ಬೇಸಿಗೆ ಹಂಗಾಮಿನಲ್ಲಿ 15 ದಿನಕ್ಕೊಮ್ಮೆ ನೀರು ಕೊಡುವುದು ಉತ್ತಮ. ಸಸಿಗಳಿಗಾಗಿ ತಾವು ಹತ್ತಿರದ ಅರಣ್ಯ ಇಲಾಖೆ ಕಚೇರಿ ಭೇಟಿ ಮಾಡಿ. ಪಪ್ಪಾಯ ಜತೆಗೆ ಅಂತರ ಬೆಳೆಯಾಗಿ ನಾಟಿ ಬೀನ್ಸ್‌ ಹಾಕಬಹುದು. ಪಪ್ಪಾಯ ಹೂಬಿಡಲು ಪ್ರಾರಂಭಿಸಿದಾಗ ಯಾವುದೇ ಅಂತರ ಬೆಳೆ ಬೇಡ. ಹೊಲದ ಸುತ್ತಲೂ ಎರಡು ಸಾಲು ಸಜ್ಜೆ / ಜೋಳ / ಮೆಕ್ಕೆ ಜೋಳ ಹಾಕಿರಿ. ಇದರಿಂದ ನಂಜಾಣು ರೋಗ ಕಡಿಮೆ ಆಗಲು ಸಹಾಯವಾಗುತ್ತದೆ. ಯಾವುದೇ ಕಾರಣಕ್ಕೂ ಪಪ್ಪಾಯದಲ್ಲಿ ಕುಂಬಳ ಜಾತಿಯ ಬಳ್ಳಿ ಸಸ್ಯಗಳನ್ನು ಬೆಳೆಸತಕ್ಕದ್ದಲ್ಲ.