- ಪದ್ಮಾ ಶಿವಮೊಗ್ಗ
ಶಿವರಾಜ್ ಕುಮಾರ್ ಒಂದಾದ ಮೇಲೆ ಒಂದರಂತೆ ಬಿಡುವಿಲ್ಲದಂತೆ ಸಿನಿಮಾ ಶೂಟಿಂಗ್‌ನಲ್ಲಿ ಸಿಕ್ಕಾಪಟ್ಟೆ ಬಿಝಿ. ಪ್ರೇಮ್ ನಿರ್ದೇಶನದಲ್ಲಿ ಸುದೀಪ್ ಜತೆ ನಟಿಸಲಿರುವ 'ಕಲಿ' ಚಿತ್ರದ ಟೈಟಲ್ ಲಾಂಚ್ ಮಾಡಿದ ಮರುದಿನವೇ ಆರ್. ಚಂದ್ರು ನಿರ್ದೇಶನದ 'ಬಾದ್‌ಷಾ' ಚಿತ್ರಕ್ಕೂ ಹಸಿರು ನಶಾನೆ ತೋರಿಸಿದ್ದಾರೆ. ವಿಶೇಷವೆಂದರೆ, ಈ ಚಿತ್ರದಲ್ಲಿ ಇವರದ್ದು ದ್ವಿಪಾತ್ರ. ದ್ವಿಪಾತ್ರವೆಂದಾಕ್ಷಣ ಒಂದು ಪಾಸಿಟಿವ್ ಮತ್ತು ಇನ್ನೊಂದು ನೆಗೆಟಿವ್ ಪಾತ್ರಗಳಿರುತ್ತವೆ. ಅಥವಾ ತಂದೆ ಮಗನ ರೋಲ್ ಆಗಿರುತ್ತದೆ. ಆದರೆ, ಬಾದ್‌ಷಾದಲ್ಲಿ ಡಿಫರೆಂಟ್ ಆಗಿವೆ.
ಈ ಮೊದಲು ಶಿವರಾಜ್, ಸಾರ್ವಭೌಮ ಚಿತ್ರದಲ್ಲಿ ದ್ವಿಪಾತ್ರದಲ್ಲಿ ನಟಿಸಿದ್ದರು. ಬಾದ್‌ಷಾದಲ್ಲಿ ದ್ವಿಪಾತ್ರವೇ ಆದರೂ, ನೆಗೆಟಿವ್ ಶೇಡ್ ಇಲ್ಲ. ಎರಡೂ ಪಾತ್ರಗಳೂ ಪಾಸಿಟಿವ್ ಆಗಿವೆ. 'ಶಿವರಾಜ್ ಕುಮಾರ್ ಅವರ ಎರಡೂ ಪಾತ್ರಗಳು ಸ್ಟ್ರಾಂಗ್ ವ್ಯಕ್ತಿಗಳದ್ದೆ. ಇವರ ನಡುವೆ ಒಂದು ವಿಷಯದಲ್ಲಿ ಭಿನ್ನಾಭಿಪ್ರಾಯ ಮೂಡಿ ಟಗ್ ಆಫ್ ವಾರ್ ಶುರುವಾಗುತ್ತದೆ. ಬಾದ್‌ಷಾ ಎಂದರೆ ಕಿಂಗ್. ಚಿತ್ರದಲ್ಲಿ ಅವರ ಪಾತ್ರವೂ ಹಾಗೇ ಇದೆ. ಹಲವು ವಿಚಾರಗಳಲ್ಲಿ ಹೋರಾಡುವ ಪಾತ್ರ ಅವರದು' ಎನ್ನುತ್ತಾರೆ ಆರ್. ಚಂದ್ರು.
'ಎರಡೂ ಪಾತ್ರಗಳು ಚೆನ್ನಾಗಿವೆ. ಇಬ್ಬರ ನಡುವಿನ ಜಿದ್ದಾಜಿದ್ದಿಯಲ್ಲಿ ಯಾರು ಬಾದ್‌ಷಾ ಆಗುತ್ತಾನೆ ಅನ್ನೋದು ಸಿನಿಮಾ' ಎಂಬುದು ಶಿವರಾಜ್ ಕುಮಾರ್ ಅವರ ವಿವರ. ಗುರು ಕಿರಣ್ ಹಾಡುಗಳಿಗೆ ಸಂಗೀತ ಸಂಯೋಜನೆ ಶುರುಮಾಡಿದ್ದಾರೆ. ಚಿತ್ರ ಮಾರ್ಚ್‌ನಲ್ಲಿ ಸೆಟ್ಟೇರಲಿದೆ.
ಸಂತ, ಪೊಲೀಸ್ ಆಫೀಸರ್, ಸ್ವಾತಂತ್ರ ಹೋರಾಟಗಾರ ಹೀಗೆ ವಿಭಿನ್ನ ಪಾತ್ರಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿರುವ ಶಿವರಾಜ್ ಕುಮಾರ್ ಇದೀಗ ಆರ್. ಚಂದ್ರು ನಿರ್ದೇಶನದ 'ಬಾದ್‌ಷಾ' ಸಿನಿಮಾದ ದ್ವಿಪಾತ್ರದಲ್ಲಿ ನಟಿಸಲಿದ್ದಾರೆ.