ಡಾಲರ್ ಎದುರು 67ಕ್ಕೆ ಕುಸಿದ ರೂಪಾಯಿ

ಕಳೆದ 2 ವರ್ಷಗಳಲ್ಲಿ ಕನಿಷ್ಠ ಮಟ್ಟಕ್ಕೆ ರೂಪಾಯಿ ಅಪಮೌಲ್ಯ / ಅಮೆರಿಕದಲ್ಲಿ ಬಡ್ಡಿ ದರ ಏರಿಕೆ ಸಂಭವ ಹಿನ್ನೆಲೆ
ಮುಂಬಯಿ : ಡಾಲರ್ ಎದುರು ರೂಪಾಯಿ ಮೌಲ್ಯವು ಸೋಮವಾರ, ಕಳೆದ ಎರಡು ವರ್ಷಗಳಲ್ಲೇ ಕನಿಷ್ಠ ಪ್ರಮಾಣದಲ್ಲಿ ಕುಸಿತ ಕಂಡು ರೂ.67.09ಕ್ಕೆ ಸ್ಥಿರವಾಯಿತು. ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ರೂಪಾಯಿ ಎದುರು ಡಾಲರ್ ಬೆಲೆ 21 ಪೈಸೆ ಹೆಚ್ಚಳವಾಗಿದೆ.

ಕಳೆದ ವಾರಂತ್ಯದಲ್ಲಿ ರೂಪಾಯಿ ಮೌಲ್ಯವು 17 ಪೈಸೆ ಕಳೆದುಕೊಂಡು 66.88ರಷ್ಟಿತ್ತು. ಸೋಮವಾರ ರೂಪಾಯಿಯು ಡಾಲರ್ ಎದುರು 21 ಪೈಸೆ ಅಥವಾ ಶೇ.30ರಷ್ಟು ಅಪಮೌಲ್ಯಕ್ಕೆ ಒಳಗಾಗಿದ್ದು, ರೂ.67.09 ತಲುಪಿದೆ.

''ರೂಪಾಯಿ ಮತ್ತಷ್ಟು ಕುಸಿಯದಂತೆ ರಿಸರ್ವ್ ಬ್ಯಾಂಕ್ ಮಧ್ಯೆ ಪ್ರವೇಶಿಸಿ ಸೂಕ್ತ ನಿರ್ಧಾರ ಕೈಗೊಳ್ಳಬೇಕು,'' ಎಂದು ಡೀಲರ್‌ಗಳು ಹೇಳಿದ್ದಾರೆ. ಏತನ್ಮಧ್ಯೆ, ಮಾರುಕಟ್ಟೆ ಸುಧಾರಣೆಗೆ ರಿಸರ್ವ್ ಬ್ಯಾಂಕ್ ಸಹ ಮುಂದಾಗಿದೆ.

''ಅಮೆರಿಕ ಫೆಡ್ ಬಡ್ಡಿ ದರವನ್ನು ಹೆಚ್ಚಳ ಮಾಡುತ್ತದೆ ಎನ್ನುವ ಆತಂಕವಿದೆ. ಅಲ್ಲದೇ, ಚೀನಾದ ಯುವಾನ್ ಕಳೆದ ನಾಲ್ಕೂವರೆ ವರ್ಷಗಳಲ್ಲಿಯೇ ಗರಿಷ್ಠ ಮಟ್ಟಕ್ಕೆ ಕುಸಿದಿರುವುದರಿಂದ ಏಷ್ಯಾ ದೇಶಗಳ ಕರೆನ್ಸಿ ದುರ್ಬಲವಾಗಿದೆ,'' ಎಂದು ಕೋಟಕ್ ಸೆಕ್ಯೂರಿಟೀಸ್‌ನ ಕರೆನ್ಸಿ ವಿಶ್ಲೇಷಕರಾದ ಅನಿಂದ್ಯ ಬ್ಯಾನರ್ಜಿ ಅಭಿಪ್ರಾಯಪಟ್ಟಿದ್ದಾರೆ. ''ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಕಚ್ಚಾ ತೈಲದ ದರ ಕುಸಿಯುತ್ತಿದ್ದು, ತೈಲ ಆಮದು ಮಾಡುವ ದೇಶಗಳು ನಷ್ಟಕ್ಕೆ ಸಿಲುಕಿವೆ. ಬಂಡವಾಳ ಮಾರುಕಟ್ಟೆ ನಿಧಾನಗತಿಯಲ್ಲಿದೆ,'' ಎಂದೂ ಹೇಳಿದ್ದಾರೆ.

ಸಗಟು ಮಾರಾಟ ದರ ಸೂಚ್ಯಂಕವು ನವೆಂಬರ್‌ನಲ್ಲಿ ಮೈನಸ್ 1.99 ತಲುಪಿದ್ದು, ಹಣದುಬ್ಬರಕ್ಕೆ ದಾರಿ ಮಾಡಿದೆ.

* ಈ ವರ್ಷ ನವೆಂಬರ್ ತನಕ ಡಾಲರ್ ಮುಂದೆ ರೂಪಾಯಿಯು ಶೇ 5.90ರಷ್ಟು ಕುಸಿದಿದೆ.

* 2013ರ ಸೆ.3ರಿಂದ ಈ ಪ್ರಮಾಣದಲ್ಲಿ ರೂಪಾಯಿ ಅಪಮೌಲ್ಯವಾಗಿರುವುದು ಇದೇ ಮೊದಲು.

* ಯುಎಸ್ ಫೆಡ್ ರಿಸರ್ವ್ ಬಡ್ಡಿ ದರ ಹೆಚ್ಚಿಸಬಹುದು ಎನ್ನುವ ವಿಶ್ಲೇಷಣೆಗಳಿದ್ದು, ದೇಶೀಯ ಮಾರುಕಟ್ಟೆ ಮೇಲೂ ಇದರ ಪರಿಣಾಮ ಇರಲಿದೆ.

* ವಿದೇಶಿ ಹೂಡಿಕೆದಾರರು ದೇಶೀಯ ಷೇರು ಮಾರುಕಟ್ಟೆಯಿಂದ ಡಿಸೆಂಬರ್ ಆರಂಭದಿಂದ ಈ ತನಕ 5,500 ಕೋಟಿ ರೂ. ಹೂಡಿಕೆಯನ್ನು ವಾಪಸ್ ಪಡೆದಿದ್ದಾರೆ.

ಎಲೆಕ್ಟ್ರಾನಿಕ್ಸ್ ಸಲಕರಣೆಗಳು ದುಬಾರಿ?

ರೂಪಾಯಿ ಕುಸಿತದಿಂದ ವಿದ್ಯುನ್ಮಾನ ಸೇರಿದಂತೆ ಗ್ರಾಹಕರ ಉತ್ಪನ್ನಗಳ ಬೆಲೆಗಳು ಹೆಚ್ಚಳವಾಗುವ ಸಾಧ್ಯತೆ ಇದೆ. ''ವಿದೇಶಿ ವಿನಿಮಯ ಮಾರುಕಟ್ಟೆಯಲ್ಲಿ ರೂಪಾಯಿ ಕುಸಿತವು ಉತ್ಪನ್ನಗಳ ದರಗಳು ಶೇ.1.5 ಹೆಚ್ಚಳವಾಗುವಂತೆ ನೇರವಾಗಿ ಪರಿಣಾಮ ಬೀರುತ್ತದೆ. ಡಾಲರ್ ಎದುರು ರೂಪಾಯಿ ಮೌಲ್ಯವು ನಮ್ಮ ನಿರೀಕ್ಷೆಯನ್ನು ಮೀರಿ 67 ರೂ. ಮುಟ್ಟಿದೆ. ಅದು 68 ರೂ. ತಲುಪಿದರೆ, ಹೊಸ ವರ್ಷದ ಸಂದರ್ಭದಲ್ಲಿ ಎಲೆಕ್ಟ್ರಾನಿಕ್ ಸೇರಿದಂತೆ ಬಹುತೇಕ ವಸ್ತುಗಳ ಬೆಲೆ ಹೆಚ್ಚಳವಾಗುತ್ತದೆ,'' ಎಂದು ವಿಡಿಯೊಕಾನ್ ಕಂಪನಿಯ ಸಿಒಒ ಸಿ.ಎಂ.ಸಿಂಗ್ ಅಭಿಪ್ರಾಯಪಟ್ಟಿದ್ದಾರೆ.

''ಕಂಪನಿಗಳು ಗ್ರಾಹಕರ ಬೆಲೆಬಾಳುವ ವಸ್ತುಗಳು ಮತ್ತು ಎಲೆಕ್ಟ್ರಾನಿಕ್ಸ್ ಸಾಧನ ಸಲಕರಣೆಗಳಿಗೆ ಆಮದನ್ನೇ ಅವಲಂಭಿಸಿವೆ. ರೂಪಾಯಿ ಕುಸಿತದಿಂದ ಬೆಲೆ ಹೆಚ್ಚಳ ಸಾಮಾನ್ಯ,'' ಎಂದು ಮಾರುಕಟ್ಟೆ ವಿಶ್ಲೇಷಕರು ಹೇಳುತ್ತಾರೆ.

ಕುಸಿತಕ್ಕೆ ಕಾರಣವೇನು?

ಡಿ.15 ಮತ್ತು 16ರಂದು ಅಮೆರಿಕದ ಫೆಡರಲ್ ರಿಸರ್ವ್ ಪಾಲಿಸಿ ನಿರ್ಧಾರ ಹೊರಬೀಳಲಿದ್ದು, ಬಡ್ಡಿದರ ಹೆಚ್ಚಳವಾಗಲಿದೆ ಎನ್ನುವ ವಿಶ್ಲೇಷಣೆಗಳಿವೆ. ಇದರಿಂದಾಗಿ ವಿಶ್ವದ ಆರ್ಥಿಕ ಜಗತ್ತಿನಲ್ಲಿ ಅಸ್ಥಿರತೆ ತಲೆದೋರಿದೆ. ವಿದೇಶಿ ಹೂಡಿಕೆದಾರರು ತಮ್ಮ ಮಾರುಕಟ್ಟೆ ಹೂಡಿಕೆಗಳನ್ನು ಮಾರಾಟ ಮಾಡಲು ಮುಂದಾಗಿದ್ದು, ಡಾಲರ್‌ಗೆ ಹೆಚ್ಚಿನ ಬೇಡಿಕೆ ವ್ಯಕ್ತವಾಗಿದೆ. ಇದರಿಂದ ಷೇರು ಮಾರುಕಟ್ಟೆ ತತ್ತರಿಸಿದೆ. ಈ ಎಲ್ಲ ಕಾರಣದಿಂದ ರೂಪಾಯಿ ದುರ್ಬಲವಾಗಿದೆ.