* ಪದ್ಮಾ, ಶಿವಮೊಗ್ಗ
ಇತ್ತೀಚಿನ ದಿನಗಳಲ್ಲಿ ಹಾಡು ಮತ್ತು ಟ್ರೇಲರ್‌ನಿಂದ ಸುದ್ದಿಯಲ್ಲಿದ್ದ ಚಿತ್ರ ಕಿರಿಕ್ ಪಾರ್ಟಿ. ರಿಷಭ್‌ ಶೆಟ್ಟಿ ನಿರ್ದೇಶನದ ಈ ಚಿತ್ರಕ್ಕೆ ರಿಲೀಸ್‌ಗೆ ಮೊದಲೇ ಸಿಕ್ಕಾಪಟ್ಟೆ ಹೈಪ್‌ ಕ್ರಿಯೇಟ್‌ ಆಗಿತ್ತು. ಕಾಲೇಜು ಲೈಫ್‌ ಸ್ಟೋರಿ ಇರುವ ಚಿತ್ರದಲ್ಲಿ ಸಹಜವಾಗಿಯೇ ವಿದ್ಯಾರ್ಥಿಗಳ ಕಿರಿಕ್‌ಗಳು ಸ್ವಲ್ಪ ಜಾಸ್ತಿಯೇ ಇವೆ. ಹಾಗಾಗಿ ಈ ಚಿತ್ರ ಎಷ್ಟರ ಮಟ್ಟಿಗೆ ಸಾಮಾನ್ಯ ಪ್ರೇಕ್ಷಕನಿಗೆ ರುಚಿಸಬಲ್ಲದು ಎಂಬುದನ್ನು ಕಾದು ನೋಡಬೇಕಿದೆ.
ಎಂಜಿನಿಯರಿಂಗ್‌ ಓದಲು ಬಂದ ಕರ್ಣ (ರಕ್ಷಿತ್‌ ಶೆಟ್ಟಿ) ಮಹಾನ್‌ ತರಲೆ ಸ್ಟೂಡೆಂಟ್‌. ಇವನ ಹಿಂದೆ ಒಂದು ಪಟಾಲಂ ಇರುತ್ತೆ. ಓದೋದೊಂದನ್ನು ಬಿಟ್ಟು, ಕುಡಿಯೋದು, ಸಿಗರೇಟು ಸೇದೋದು, ಕಂಡ ಕಂಡವರಿಗೆ ಕಿರಿಕ್ ಮಾಡೋದು ಇವರ ದಿನಚರಿ. ಎಲ್ಲಾ ಕಾಲಮಾನದಲ್ಲಿ, ಎಲ್ಲಾ ಕಾಲೇಜುಗಳಲ್ಲಿ ನಡೆಯುವಂತೆಯೇ ಈ ಕಾಲೇಜಿನಲ್ಲೂ ಹುಡುಗಿಯೊಬ್ಬಳ ಹಿಂದೆ ಈ ಹುಡುಗರು ಬೀಳುತ್ತಾರೆ. ಅವಳು ಸಾನವಿ(ರಶ್ಮಿಕಾ ಮಂದಣ್ಣ), ಸ್ಟ್ರಿಕ್ಟ್ ಪೋಲಿಸ್‌ ಆಫೀಸರ್‌ ಮಗಳು. ಅವಳನ್ನು ಒಲಿಸಿಕೊಳ್ಳಲು ಹುಡುಗರು ಒಂದಷ್ಟು ಕಸರತ್ತು ನಡೆಸುತ್ತಾರೆ. ಮುದ್ದು ಮುಖದ, ಮೃಧು ಸ್ವಭಾವದ, ಸಭ್ಯ ಹುಡುಗಿ ಸಾನ್ವಿ ಕರ್ಣನ ತುಂಟತನಕ್ಕೆ ಸೋಲುತ್ತಾಳೆ. ಇದು ಕರ್ಣನಿಗೆ ಗೊತ್ತಾಗುವ ಹೊತ್ತಿಗೆ ಆಕಸ್ಮಿಕವಾಗಿ ಸಾನ್ವಿ ಸಾಯುತ್ತಾಳೆ. ಇದು ಕರ್ಣನಿಗೆ ದೊಡ್ಡ ಶಾಕ್‌. ಅಲ್ಲಿಂದ ಕರ್ಣ ಸೀರಿಯಸ್‌ ಆಗುತ್ತಾನೆ. ಆದರೆ, ಕಾಲೇಜಿನಲ್ಲಿ ಅವನ ರೌಡಿಸಂ ಕಡಿಮೆಯಾಗುವುದಿಲ್ಲ. ಮಧ್ಯಂತರದ ನಂತರ ತುಂಟ ಹುಡುಗಿ ಆರ್ಯ (ಸಂಯುಕ್ತಾ ಹೆಗಡೆ) ಅವನ ಹಿಂದೆ ಬೀಳುತ್ತಾಳೆ. ಸಾನ್ವಿ ಮುಖದಲ್ಲಿ ನಗು ತರಿಸಿದ್ದ ಕರ್ಣ, ನಂತರ ಕರ್ಣನ ಮುಖದಲ್ಲಿ ನಗು ತರಿಸೋಕೆ ಪ್ರಯತ್ನಿಸುತ್ತಾಳೆ ಆರ್ಯ. ಇವೆಲ್ಲದರ ನಡುವೆ ಕಾಲೇಜಿನ ಎಲೆಕ್ಷನ್‌ ಪಾಲಿಟಿಕ್ಸ್‌, ಪ್ರಿನ್ಸಿಪಾಲ್‌ ಕಿಡ್ನಾಪ್‌, ಉತ್ತರ ಪತ್ರಿಕೆ ಕದ್ದು ಬರೆಯುವುದು, ತಾವು ಮಾಡೋ ಕಿರಿಕ್‌ಗಳಿಗೆ ಇನ್ನೊಬ್ಬರನ್ನು ಸಿಕ್ಕಿಸುವುದು, ಹೀಗೆ ಒಂದಷ್ಟು ದೃಶ್ಯಗಳು ಸೇರ್ಪಡೆಯಾಗಿವೆ. ಪ್ರಿನ್ಸಿಪಾಲ್‌ ಕಿಡ್ನಾಪ್‌ ದೃಶ್ಯ ಹಾಲಿವುಡ್‌ನ ಹ್ಯಾಂಗ್‌ಓವರ್‌ ಚಿತ್ರ ನೆನಪಿಸಿದರೆ ಆಶ್ಚರ್ಯವಿಲ್ಲ.
ಮೊದಲರ್ಧ ಕಿರಿಕ್‌ಗಳನ್ನು ನೋಡಬಹುದು. ಸಾನ್ವಿ ಸಾವಿನ ನಂತರ ಚಿತ್ರ ಗಹನವಾದ ತಿರುವು ಪಡೆದುಕೊಳ್ಳುತ್ತದೆ ಎಂದು ಕಾದು ನೋಡಿದರೆ ನಿರಾಶೆಯಾಗುತ್ತದೆ. ಚಿತ್ರದ ಡ್ರಾಬ್ಯಾಕ್‌ ಅದರ ಅವಧಿ. ಸುಮಾರು 2 ಗಂಟೆ 40 ನಿಮಿಷಗಳ ಕಾಲ ಸ್ಟೂಡೆಂಟ್ಸ್‌ ಕಿರಿಕ್‌ಗಳನ್ನು ನೋಡಬೇಕಾಗುತ್ತೆ. ಇಂಟರ್‌ವಲ್‌ ನಂತರ ಅನಗತ್ಯ ದೃಶ್ಯಗಳು ಹೆಚ್ಚು ಸಮಯ ತಿಂದಿವೆ. ಹಾಗೆ ನೋಡಿದರೆ ಚಿತ್ರದಲ್ಲಿ ಟಚಿಂಗ್‌ ಆದ ಒಂದೆರಡು ವಿಷಯಗಳಿವೆ. ಸಾನ್ವಿ ಸತ್ತ ನಂತರ ಅವಳ ನಡತೆಯ ಬಗ್ಗೆ ವಿದ್ಯಾರ್ಥಿಗಳು ಹಗುರವಾಗಿ ಮಾತನಾಡುವುದು, ನಾಯಕ ಸೆಕ್ಸ್‌ ವರ್ಕರ್‌ಗೆ ಸಹಾಯ ಮಾಡುವುದು, ಕೊನೆಯಲ್ಲಿ ಸಾನ್ವಿ ಅಪ್ಪ 'ಡೈರಿ ಓದಿ ಮಗಳನ್ನು ಅರ್ಥ ಮಾಡಿಕೊಂಡೆ. ನಾನು ಒಳ್ಳೆಯ ಅಪ್ಪ ಆಗಬಹುದಿತ್ತು' ಎನ್ನುವ ದೃಶ್ಯಗಳಿಗೆ ಇನ್ನಷ್ಟು ಒತ್ತು ನೀಡಬಹುದಿತ್ತು. ಆದರೆ, ಕಿರಿಕ್ ಹಾವಳಿಯಲ್ಲಿ ಇವು ಮಂಕಾಗುತ್ತವೆ. ವಿದ್ಯಾರ್ಥಿಗಳಿಗೆ ಸಖತ್‌ ಡೋಸ್‌ ಕೊಡಬೇಕೆಂಬ ಹಂಬಲದಲ್ಲಿ, ಕಾಮಿಡಿಗೆ ಒತ್ತು ಕೊಡುವಲ್ಲಿ ನಿರ್ದೇಶಕ ನಿಯಂತ್ರಣ ಸಡಿಲಿಸಿದ್ದಾರೆ. ಹಾಗಾಗಿ ಎಲ್ಲದಕ್ಕೂ ಸುಮ್ಮಸುಮ್ಮನೆ ನಗುವ ಜಾಲಿ ಸ್ಟೂಡೆಂಟ್ಸ್‌ಗೆ ಮನರಂಜನೆ ನೀಡುತ್ತೆ.
ರಕ್ಷಿತ್‌ ಸಹಜ ಅಭಿನಯ ಇಷ್ಟವಾಗುತ್ತದೆ. ಮೊದಲ ಚಿತ್ರದಲ್ಲೇ ರಶ್ಮಿಕಾ ಮಂದಣ್ಣ ಮತ್ತು ಸಂಯುಕ್ತಾ ಹೆಗಡೆ ಗಮನ ಸೆಳೆಯುವ ಅಭಿನಯ ನೀಡಿದ್ದಾರೆ. ಉಳಿದವರೂ ಪಾತ್ರಕ್ಕೆ ನ್ಯಾಯ ಒದಗಿಸಿದ್ದಾರೆ. ಸಂಭಾಷಣೆ, ಅಜನೀಶ್‌ ಸಂಗೀತ ಮತ್ತು ಕರಮ್‌ ಚಾವ್ಲಾ ಛಾಯಾಗ್ರಹಣ ಚಿತ್ರಕ್ಕೆ ಪ್ಲಸ್‌ ಪಾಯಿಂಟ್‌. ಸಿದ್ಧ ಸೂತ್ರಕ್ಕೆ ಕಟ್ಟು ಬೀಳದೆ, ಹೊಸ ಪ್ರಯತ್ನ ಮಾಡಿರುವುದು ಮೆಚ್ಚಬೇಕಾದ ಸಂಗತಿ.
↧
ಚಿತ್ರ ವಿಮರ್ಶೆ: ಕಿರಿಕ್ ಪಾರ್ಟಿ
↧