ಆನ್‌ಲೈನ್‌ನಲ್ಲಿ ಹೆಚ್ಚು ಸರ್ಚ್‌ ಆದ ಆರ್ಟಿಸ್ಟ್‌

ತಮ್ಮ ನೆಚ್ಚಿನ ನಟ-ನಟಿಯರ ಸಿನಿಮಾ ಮತ್ತು ಖಾಸಗಿ ಬದುಕಿನ ಬಗ್ಗೆ ತಿಳಿದುಕೊಳ್ಳಲು ಅವರ ಬಹುತೇಕ ಅಭಿಮಾನಿಗಳಿಗೆ ಕಾತರ. ಹಾಗಾಗಿಯೇ ಸಾಮಾಜಿಕ ಜಾಲತಾಣದಲ್ಲಿ ಅವರ ಬಗ್ಗೆ ಜಾಲಾಡುತ್ತಲೇ ಇರುತ್ತಾರೆ. ಈ ವರ್ಷದಲ್ಲಿ ಅತಿ ಹೆಚ್ಚು ಬಾರಿ ಸರ್ಚ್‌ ಆದವರ ಮಾಹಿತಿ ಇಲ್ಲಿದೆ.

- ಹರೀಶ್‌ ಬಸವರಾಜ್‌

ಕಲಾವಿದರ ಖಾಸಗಿ ಬದುಕು ಮತ್ತು ಅವರ ಸಿನಿಮಾ ಸಂಬಂಧಿ ವಿಷಯಗಳನ್ನು ತಿಳಿದುಕೊಳ್ಳಲು ಅವರ ಅಭಿಮಾನಿಗಳು ಆನ್‌ಲೈನ್‌ ಮೊರೆ ಹೋಗುವುದು ಸಾಮಾನ್ಯ. 2016ನೇ ವರ್ಷದಲ್ಲಿ ಅತಿ ಹೆಚ್ಚು ಬಾರಿ ಹುಡುಕಾಟಕ್ಕೆ ಒಳಗಾದವರು ಯಾರು ಎಂಬ ಕುತೂಹಲ ಎಲ್ಲರದ್ದು. ಈ ವರ್ಷ ಸಾಮಾಜಿಕ ಜಾಲತಾಣಗಳಲ್ಲಿ ಅತಿ ಹೆಚ್ಚು ಸುದ್ದಿಯಾಗಿದ್ದ ನಟ-ನಟಿ ಯಾರಾರ‍ಯರು ಎಂಬುದರ ಮಾಹಿತಿ ಇಲ್ಲಿದೆ.

ಮೊದಲ ಸ್ಥಾನದಲ್ಲಿ ದರ್ಶನ್‌

ಈ ಬಾರಿ ಗೂಗಲ್‌ ಬಿಡುಗಡೆ ಮಾಡಿರುವ ಪಟ್ಟಿಯಂತೆ ಸ್ಯಾಂಡಲ್‌ವುಡ್‌ ಕಲಾವಿದರಲ್ಲಿ ದರ್ಶನ್‌ ಹೆಚ್ಚು ಬಾರಿ ಸರ್ಚ್‌ ಆಗಿದ್ದಾರೆ. ಅಲ್ಲದೇ ಅತಿ ಹೆಚ್ಚು ಅಭಿಮಾನಿಗಳನ್ನು ಹೊಂದಿರುವ ನಟ ಎಂದು ಮತ್ತೊಂದು ಬಾರಿ ಸಾಬೀತು ಪಡಿಸಿದ್ದಾರೆ. ಈ ವರ್ಷದಲ್ಲಿ ಇವರ 'ವಿರಾಟ್‌' ಹಾಗೂ 'ಜಗ್ಗುದಾದಾ' ಚಿತ್ರಗಳು ರಿಲೀಸ್‌ ಆಗಿವೆ. ಅಲ್ಲದೇ ಭಾರೀ ಬಜೆಟ್‌ನ 'ಚಕ್ರವರ್ತಿ' ಚಿತ್ರ ಸೆಟ್ಟೇರಿದೆ. ರಾಜಕಾಲುವೆ ಜಾಗದಲ್ಲಿ ದರ್ಶನ್‌ ಮನೆಯಿದೆ ಎಂಬ ಕಾರಣಕ್ಕೂ ಇವರು ಸದ್ದು ಮಾಡಿದರು. ಹಾಗಾಗಿ ಗೂಗಲ್‌ನಲ್ಲಿ ಹೆಚ್ಚು ಇವರ ಹೆಸರು ಹರಿದಾಡಿದೆ.

ಯಶ್‌ಗೆ ಎರಡನೇ ಸ್ಥಾನ

ಹುಡುಕಾಟದಲ್ಲಿ ಎರಡನೇ ಸ್ಥಾನದಲ್ಲಿದ್ದಾರೆ ಯಶ್‌. 2016ರಲ್ಲಿ ಇವರು ನಟನೆಗಿಂತ ಹೆಚ್ಚು ಸುದ್ದಿಯಾಗಿದ್ದು ಖಾಸಗಿ ಸಂಗತಿಗಳಿಂದಾಗಿ. ರೈತರಪರ ಕಾಳಜಿಯ ವಿಷಯಕ್ಕಾಗಿ ವಾಹಿನಿಗಳ ವಿರೋಧ ಕಟ್ಟಿಕೊಂಡರು. ಈ ಮಾಧ್ಯಮಗಳ ಜತೆಗಿನ ಸಮರ ಸಾಮಾಜಿಕ ಜಾಲತಾಣಗಳಲ್ಲಿ ಹೆಚ್ಚು ಸುದ್ದಿ ಆಯಿತು. ಅಲ್ಲದೇ, ಬಹುಕಾಲದ ಗೆಳತಿ ರಾಧಿಧಿಕಾ ಪಂಡಿತ್‌ರನ್ನು ಅದ್ಧೂರಿಯಾಗಿ ಮದುವೆಯಾದರು. ಇವರು ಬ್ಯಾಚಲರ್‌ಲೈಫ್‌ಗೆ ಗುಡ್‌ಬಾಯ್‌ ಹೇಳಿದ ವಿಷಯ ಕೂಡ ಹೆಚ್ಚು ಚರ್ಚೆ ಆಯಿತು. ರಾಧಿಕಾ ಮತ್ತು ಯಶ್‌ ನಟನೆಯ 'ಸಂತು' ಚಿತ್ರ ಕೂಡ ಬಿಡುಗಡೆಯಾಗಿ ಸದ್ದು ಮಾಡಿತು.

ಮೂರಕ್ಕೆ ಸುದೀಪ್‌

ಕನ್ನಡದಲ್ಲಿ ಮಾತ್ರವಲ್ಲ, ತೆಲುಗು ಮತ್ತು ತಮಿಳಿನಲ್ಲೂ ಅಭಿಮಾನಿಗಳನ್ನು ಹೊಂದಿರುವ ಸುದೀಪ್‌, ಈ ಬಾರಿ ಆನ್‌ಲೈನ್‌ ಸರ್ಚಿಂಗ್‌ನಲ್ಲಿ ಮೂರನ ಸ್ಥಾನಕ್ಕೆ ತೃಪ್ತಿ ಪಟ್ಟಿದ್ದಾರೆ. ಇವರ 'ಕೋಟಿಗೊಬ್ಬ-2', 'ಮುಕುಂದ ಮುರಾರಿ' ಚಿತ್ರಗಳು ಈ ವರ್ಷ ಬಿಡುಗಡೆ ಆದವು. ಜತೆಗೆ ಬಿಗ್‌ಬಾಸ್‌ ಕಾರ್ಯಕ್ರಮದ ನಿರೂಪಣೆ ಕೂಡ ಹಿಟ್‌ ಆಯಿತು. ಅಲ್ಲದೆ ಅವರ ಬಹು ನಿರೀಕ್ಷಿತ 'ಹೆಬ್ಬುಲಿ' ಸಿನಿಮಾದ ಕ್ರೇಜ್‌ ದಿನೇ ದಿನೇ ಜಾಸ್ತಿಯಾಗುತ್ತಿದೆ. ಹೀಗಾಗಿ ಸುದೀಪ್‌ ಅವರನ್ನು ಗೂಗಲ್‌ನಲ್ಲಿ ಹೆಚ್ಚು ಜನರು ಹುಡುಕಿದ್ದು, ಅವರು ಮೂರನೇ ಸ್ಥಾನದಲ್ಲಿದ್ದಾರೆ.

ಪುನೀತ್‌ ನಾಲ್ಕನೇ ಸ್ಥಾನಕ್ಕೆ

ಪುನೀತ್‌ ರಾಜ್‌ಕುಮಾರ್‌ ಈ ಬಾರಿ ನಾಲ್ಕನೇ ಸ್ಥಾನಕ್ಕೆ ಇಳಿದಿದ್ದಾರೆ. ಈ ವರ್ಷ ಇವರ 25ನೇ ಸಿನಿಮಾ ದೊಡ್ಮನೆ ಹುಡ್ಗ ರಿಲೀಸ್‌ ಆಗಿ ಬಾಕ್ಸ್‌ ಆಫೀಸ್‌ನಲ್ಲಿ ಕಮಾಲ್‌ ಮಾಡಿತ್ತು. 'ಚಕ್ರವ್ಯೂಹ' ಚಿತ್ರ ಕೂಡಾ ಇದೇ ವರ್ಷ ಬಿಡುಗಡೆ ಆಗಿತ್ತು. ಅಲ್ಲದೇ ರಾಜಕುಮಾರ ಸಿನಿಮಾದ ಫಸ್ಟ್‌ ಟೀಸರ್‌ ವೈರಲ್‌ ಆದರೂ, ನಾಲ್ಕನೇ ಸ್ಥಾನದಲ್ಲಿದ್ದಾರೆ ಪವರ್‌ ಸ್ಟಾರ್‌.

ಐದಕ್ಕೆ ಉಪ್ಪಿ

'ಕಲ್ಪನಾ-2', 'ಮುಕುಂದ ಮುರಾರಿ' ಚಿತ್ರಗಳು ಬಿಡುಗಡೆಯಾದರೂ, 'ಮತ್ತೆ ಹುಟ್ಟಿ ಬಾ ಉಪೇಂದ್ರ', 'ಡಾ.ಮೋದಿ', 'ಕನ್ನೇಶ್ವರ' ಸೇರಿದಂತೆ ಹಲವು ಚಿತ್ರಗಳು ಸೆಟ್ಟೇರಿದರೂ, ಉಪೇಂದ್ರ ಅವರಿಗೆ ಐದನೇ ಸ್ಥಾನ ಲಭಿಸಿದೆ.

ನಾಯಕಿಯರಲ್ಲಿ ರಮ್ಯಾನೇ ಟಾಪ್‌

ಇದು ನಾಯಕರ ವಿಚಾರವಾದರೆ ನಾಯಕಿಯರನ್ನೂ ಜನ ಗೂಗಲ್‌ ಸರ್ಚ್‌ ಮಾಡಿದ್ದಾರೆ. ಅದರಂತೆ ಈ ಬಾರಿ ಅತಿ ಹೆಚ್ಚು ಹುಡುಕಲ್ಪಟ್ಟ ನಾಯಕಿ ಎಂದರೆ ರಮ್ಯಾ. ಇವರು ನಟಿಸಿರುವ 'ನಾಗರಹಾವು' ಸಿನಿಮಾ ತೆರೆಕಂಡರೂ ಚಿತ್ರರಂಗದಿಂದ ಸ್ವಲ್ಪ ದೂರವೇ ಉಳಿದು ರಾಜಕಾರಣದಲ್ಲಿ ತೊಡಗಿಸಿಕೊಂಡಿದ್ದಾರೆ. ಆದರೂ ಅವರನ್ನು ಅತಿ ಹೆಚ್ಚು ಜನ ಇಂಟರ್‌ನೆಟ್‌ನಲ್ಲಿ ಹುಡುಕಿದ್ದಾರೆ.

ರಾಧಿಕಾ ಪಂಡಿತ್‌ಗೆ ಐದನೇ ಸ್ಥಾನ

ಇನ್ನು ನಾಯಕಿ ಪ್ರಧಾನ ಸಿನಿಮಾಗಳಲ್ಲಿ ಹೆಚ್ಚು ಕಾಣಿಸಿಕೊಳ್ಳುತ್ತಿರುವ ನಟಿ ರಾಗಿಣಿ, ಗೂಗಲ್‌ ಸರ್ಚ್‌ನಲ್ಲಿ ಎರಡನೇ ಸ್ಥಾನ ಪಡೆದಿದ್ದಾರೆ. ಡಿಂಪಲ್‌ ಸುಂದರಿ ರಚಿತಾರಾಮ್‌ ಅವರು ಮೂರನೇ ಸ್ಥಾನ ಪಡೆದರೆ, ಅಮೂಲ್ಯ ನಾಲ್ಕನೇ ಸ್ಥಾನ ಪಡೆದಿದ್ದಾರೆ. ಈ ಬಾರಿ ರಾಕಿಂಗ್‌ ಸ್ಟಾರ್‌ ಯಶ್‌ ಜತೆ ಸಪ್ತಪದಿ ತುಳಿದ ನಟಿ ರಾಧಿಧಿಕಾ ಪಂಡಿತ್‌ ಐದನೇ ಸ್ಥಾನಕ್ಕೆ ತೃಪ್ತಿಪಟ್ಟುಕೊಂಡಿದ್ದಾರೆ.