ಹೊಸಬರ ಸಿನಿಮಾಗಳ ನಡುವೆ ಸ್ಟಾರ್‌ ನಟರ ಚಿತ್ರ ಮಂಕು

ಹೊಸಬರ ಹೊಸ ರೀತಿಯ ಸಿನಿಮಾಗಳ ನಡುವೆ, ಈ ಬಾರಿ ಸ್ಟಾರ್‌ ನಟರ ಚಿತ್ರಗಳು ಕೊಂಚ ಮಂಕಾದಂತೆ ಕಂಡಿವೆ. ಬಹುತೇಕ ಜನಪ್ರಿಯ ಕಲಾವಿದರು ಕೆಲವೇ ವಾರಗಳ ಪ್ರದರ್ಶನಕ್ಕೆ ಸೀಮಿತವಾಗಿ ಉಳಿದಿದ್ದಾರೆ. ಒಬ್ಬೊಬ್ಬ ಕಲಾವಿದರ ಎರಡ್ಮೂರು ಚಿತ್ರಗಳು ರಿಲೀಸ್‌ ಆಗಿದ್ದರೂ, 2016ರ ವರ್ಷ ಸ್ಟಾರ್‌ಗಳ ಪಾಲಿಗೆ ಆಶಾದಾಯಕವೇನೂ ಆಗಿಲ್ಲ.

- ಹರೀಶ್‌ ಬಸವರಾಜ್‌​

ಜನಪ್ರಿಯ ಕಲಾವಿದರ ಪಾಲಿಗೆ 2016ರ ವರ್ಷ ಅಷ್ಟೇನೂ ಆಶಾದಾಯಕವಾಗಿಲ್ಲ. ಸ್ಟಾರ್‌ ನಟರ ಚಿತ್ರಗಳು ಅಂದಾಕ್ಷಣ ಸಾಮಾನ್ಯವಾಗಿ ನಿರೀಕ್ಷೆ ಜಾಸ್ತಿ. ಅದು ಈ ಬಾರಿ ಹುಸಿಯಾಗಿದೆ. ಬಹುತೇಕ ಕಲಾವಿದರ ಸಿನಿಮಾಗಳು ಬಾಕ್ಸ್‌ ಆಫೀಸ್‌ನಲ್ಲಿ ಅಂದುಕೊಂಡಷ್ಟು ಕಮಾಲ್‌ ಮಾಡಲಿಲ್ಲ. ಜತೆಗೆ ಅಭಿಮಾನಿಗಳನ್ನು ರಂಜಿಸಲಿಲ್ಲ. ಆದರೆ, ಶಿವರಾಜ್‌ಕುಮಾರ್‌ ಚಿತ್ರಗಳು ಈ ಪಟ್ಟಿಯಿಂದ ಹೊರ ಉಳಿದಿವೆ. 'ಶಿವಲಿಂಗ' ಚಿತ್ರದ ಮೂಲಕ ಸೆಂಚುರಿ ಸ್ಟಾರ್‌ ಶತಕ ಬಾರಿಸಿದ್ದರೆ, 'ಕಿಲ್ಲಿಂಗ್‌ ವೀರಪ್ಪನ್‌' ಅರ್ಧ ಶತಕಕ್ಕೆ ತೃಪ್ತಿಪಟ್ಟುಕೊಂಡಿದ್ದಾನೆ. 'ಸಂತೆಯಲ್ಲಿ ನಿಂತ ಕಬೀರ' ಸಿನಿಮಾದ ಮೂಲಕ ಸದಭಿರುಚಿಯ ಪ್ರೇಕ್ಷಕರನ್ನೂ ಶಿವರಾಜ್‌ಕುಮಾರ್‌ ತಲುಪಿದ್ದಾರೆ.

ಇವರ 'ಕಿಲ್ಲಿಂಗ್‌ ವೀರಪ್ಪನ್‌' ಚಿತ್ರದ ಮೂಲಕ ಬಾಲಿವುಡ್‌ನ ಖ್ಯಾತ ನಿರ್ದೇಶಕ ರಾಮ್‌ ಗೋಪಾಲ್‌ ವರ್ಮಾ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಕೊಟ್ಟರೆ, ಪಿ.ವಾಸು ನಿರ್ದೇಶನದ ಮತ್ತೊಂದು ಚಿತ್ರ 'ಶಿವಲಿಂಗ' ಈಗ ತೆಲುಗು ಮತ್ತು ತಮಿಳಿಗೂ ರೀಮೇಕ್‌ ಆಗುತ್ತಿದೆ.

ಪುನೀತ್‌ ರಾಜ್‌ಕುಮಾರ್‌ ಅವರ ಎರಡು ಚಿತ್ರಗಳು ಈ ವರ್ಷ ರಿಲೀಸ್‌ ಆಗಿವೆ. ಸರವಣನ್‌ ನಿರ್ದೇಶನದ 'ಚಕ್ರವ್ಯೂಹ' ಪುನೀತ್‌ ಅವರ ಬಿಡುಗಡೆಯಾದ ಮೊದಲ ಚಿತ್ರ. ಅಭಿಮಾನಿಗಳನ್ನು ತಕ್ಕಮಟ್ಟಿಗೆ ರಂಜಿಸಿದರೂ ಅಂದುಕೊಂಡಷ್ಟು ಬಾಕ್ಸ್‌ ಆಫೀಸ್‌ನಲ್ಲಿ ಮಿಂಚಲಿಲ್ಲ. ನಂತರ ಬಿಡುಗಡೆಯಾಗಿದ್ದು ಇವರ ನಿರೀಕ್ಷಿತ 25ನೇ ಚಿತ್ರ 'ದೊಡ್ಮನೆ ಹುಡ್ಗ'. ಈ ಸಿನಿಮಾದಲ್ಲಿ ಅಭಿಮಾನಿಗಳನ್ನು ಸಖತ್‌ ಆಗಿಯೇ ರಂಜಿಸಿದರು ಪುನೀತ್‌. ಉತ್ತರ ಕರ್ನಾಟಕ ಸೇರಿದಂತೆ ಹಲವು ಭಾಗಗಳಲ್ಲಿ ಯಶಸ್ವಿ ಪ್ರದರ್ಶನವಾಗಿ, ಐವತ್ತು ದಿನ ಪೂರೈಸಿತು.

ಸುದೀಪ್‌ ಕೂಡ ಈ ಬಾರಿ ಎರಡು ಸಿನಿಮಾಗಳನ್ನು ನೀಡಿದ್ದಾರೆ. ಮೊದಲು ತೆರೆ ಕಂಡಿದ್ದು 'ಕೋಟಿಗೊಬ್ಬ-2' ಚಿತ್ರ. ನಿರ್ಮಾಪಕರಿಗೂ ಇದು ಕೋಟಿ ತಂದು ಕೊಟ್ಟ ಚಿತ್ರ. ನಂತರ ಬಂದದ್ದು 'ಮುಕುಂದ ಮುರಾರಿ' ಸಿನಿಮಾ. ಈ ಚಿತ್ರದಲ್ಲಿ ಉಪೇಂದ್ರ ಜತೆ ಸುದೀಪ್‌ ತೆರೆ ಹಂಚಿಕೊಂಡಿದ್ದರು. ಒಂದು ರೀತಿಯಲ್ಲಿ ಅದು ಅತಿಥಿ ಪಾತ್ರವಾಗಿತ್ತು.

ಒಂದೇ ಚಿತ್ರಕ್ಕೆ ತೃಪ್ತಿ ಪಟ್ಟುಕೊಂಡಿದ್ದು ಯಶ್‌. ಇವರ ಪಾಲಿಗೆ 2016 ಅಷ್ಟೇನೂ ಆಶಾದಾಯಕವಲ್ಲ. ವರ್ಷದ ಕೊನೆಯಲ್ಲಿ ತೆರೆಕಂಡ 'ಸಂತು ಸ್ಪ್ರೇಟ್‌ ಫಾರ್ವರ್ಡ್‌' ಚಿತ್ರ ಆರಂಭದಲ್ಲಿ ಅಬ್ಬರಿಸಿದರೂ, ನಿರೀಕ್ಷೆಯಷ್ಟು ಗಳಿಕೆಯೇನೂ ಮಾಡಲಿಲ್ಲ. ಹಾಕಿದ ಬಂಡವಾಳಕ್ಕೆ ಮೋಸ ಮಾಡಿಲ್ಲ ಅನ್ನುವುದು ಚಿತ್ರದ ನಿರ್ಮಾಪಕ ಕೆ.ಮಂಜು ಮಾತು.

'ಕಲ್ಪನಾ-2' ಮತ್ತು 'ಮುಕುಂದ ಮುರಾರಿ' ಚಿತ್ರಗಳ ಮೂಲಕ ಉಪೇಂದ್ರ ಕೂಡ ಈ ಬಾರಿಯೂ ಸ್ಟಾರ್‌ ಸಿನಿಮಾಗಳ ರೇಸ್‌ನಲ್ಲಿದ್ದರು. ಕಲ್ಪನಾ-2 ಚಿತ್ರ ಬಾಕ್ಸ್‌ ಆಪೀಸ್‌ನಲ್ಲಿ ಮುಗ್ಗರಿಸಿತು. ಮುಕುಂದ ಮುರಾರಿ ಒಂದಷ್ಟು ಸದ್ದು ಮಾಡಿದ್ದು ಬಿಟ್ಟರೆ ಹೇಳಿಕೊಳ್ಳುವಂತಹ ಕಾಸನ್ನು ನಿರ್ಮಾಪಕರಿಗೆ ತಂದುಕೊಡಲಿಲ್ಲ.

ಈ ವರ್ಷ ದರ್ಶನ್‌ ಅವರ ವಿರಾಟ್‌ ಚಿತ್ರ ನಿರೀಕ್ಷೆ ಹುಸಿಗೊಳಿಸಿತು. ಎರಡನೇ ವಾರಕ್ಕೆ 'ವಿರಾಟ್‌' ಥಿಯೇಟರ್‌ನಿಂದ ಎತ್ತಂಗಡಿಯಾದ. ಇನ್ನು ಎರಡನೇ ಸಿನಿಮಾ 'ಜಗ್ಗುದಾದಾ' ಬಾಕ್ಸ್‌ ಆಫೀಸ್‌ನ ಗಳಿಕೆಯಲ್ಲಿ ಯಶಸ್ವಿಯಾಗಿ ಅಭಿಮಾನಿಗಳನ್ನು ರಂಜಿಸಿತು.

ಗೋಲ್ಡನ್‌ ಸ್ಟಾರ್‌ ಗಣೇಶ್‌ ಅವರಿಗೆ 2016 ಸ್ವಲ್ಪ ಸಿಹಿ ಸ್ವಲ್ಪ ಕಹಿ ಎನ್ನಬಹುದು. ಆರಂಭದಲ್ಲಿ ಬಿಡುಗಡೆಯಾದ ಜೂಮ್‌ ಸಿನಿಮಾ ಶತ ದಿನ ಪೂರೈಸಿದರೆ. ಅವರ ಬಹು ನಿರೀಕ್ಷಿತ ಮುಂಗಾರುಮಳೆ-2 ಅಷ್ಟಾಗಿ ಸದ್ದು ಮಾಡಲಿಲ್ಲ. ಇನ್ನು ವರ್ಷದ ಕೊನೆಯಲ್ಲಿ ಬಿಡುಗಡೆಯಾಗಿರುವ ಸುಂದರಾಂಗ ಜಾಣ ಪ್ರೇಕ್ಷಕರನ್ನು ಸೆಳೆಯುತ್ತಿದೆ.

ಉಳಿದಂತೆ ದುನಿಯಾ ವಿಜಯ್‌ , ನೆನಪಿರಲಿ ಪ್ರೇಮ್‌ ಸೇರಿದಂತೆ ಸಾಕಷ್ಟು ಸ್ಟಾರ್‌ ನಟರ ತಲಾ ಒಂದೊಂದು ಸಿನಿಮಾಗಳು ಈ ವರ್ಷ ಬಿಡುಗಡೆ ಆಗಿವೆ. ಬಾಕ್ಸ್‌ ಆಫೀಸ್‌ ಮತ್ತು ಜನ ಮೆಚ್ಚುಗೆ ವಿಚಾರಕ್ಕೆ ಬಂದರೆ 2016ರಲ್ಲಿ ಶಿವರಾಜ್‌ಕುಮಾರ್‌ ಬಾಕ್ಸ್‌ ಆಫೀಸ್‌ ಕಿಂಗ್‌ ಎನ್ನಬಹುದು.

ಸ್ಟಾರ್‌ ನಾಯಕರಷ್ಟೇ ಜನಪ್ರಿಯ ನಾಯಕಿಯರೂ ಈ ಬಾರಿ ಅಭಿಮಾನಿಗಳನ್ನು ರಂಜಿಸುವಲ್ಲಿ ಹಿಂದೆ ಬಿದ್ದಿಲ್ಲ. ಕನ್ನಡಕ್ಕೆ ಪರಭಾಷೆಯ ನಾಯಕಿಯರು ಬಂದಿದ್ದರೂ, ಹೆಚ್ಚು ಸದ್ದು ಮಾಡಿದ್ದು ಕನ್ನಡದ ಹುಡುಗಿಯರು ಅನ್ನುವುದು ವಿಶೇಷ.

ರಾಧಿಧಿಕಾ ಪಂಡಿತ್‌ 2016ರ ಟಾಪ್‌ 1 ನಾಯಕಿ ಎನ್ನಬಹುದು. ಈ ವರ್ಷ ಇವರು ಜೂಮ್‌, ದೊಡ್ಮನೆ ಹುಡ್ಗ, ಸಂತು ಸ್ಪ್ರೇಟ್‌ ಫಾರ್ವರ್ಡ್‌ ಚಿತ್ರಗಳು ರಿಲೀಸ್‌ ಆಗಿವೆ. ಜೂಮ್‌ ನೂರು ದಿನ ಪೂರೈಸಿದ್ದರೆ, ದೊಡ್ಮನೆ ಹುಡ್ಗ ಮತ್ತು ಸಂತು ಅರ್ಧ ಶತಕ ಬಾರಿಸಿವೆ.

ಈ ಬಾರಿ ಹೆಚ್ಚು ಸಿನಿಮಾಗಳಲ್ಲಿ ಕಾಣಿಸಿಕೊಂಡ ಮತ್ತೊಬ್ಬ ಕನ್ನಡ ನಟಿ ಶ್ರುತಿ ಹರಿಹರನ್‌. ಈ ವರ್ಷದಲ್ಲಿ ಇವರ ಗೋಧಿಬಣ್ಣ ಸಾಧಾರಣ ಮೈಕಟ್ಟು, ಸಿಪಾಯಿ, ಜೈ ಮಾರುತಿ 800, ಮಾದ ಮತ್ತು ಮಾನಸಿ ಸಿನಿಮಾ ಬಿಡುಗಡೆ ಆದವು. ಗೋಧಿಧಿ ಬಣ್ಣ ಸಾಧಾರಣ ಮೈಕಟ್ಟು ಚಿತ್ರಕ್ಕೆ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಯಿತು. ಬಾಕ್ಸ್‌ ಆಫೀಸ್‌ನಲ್ಲೂ ದುಡ್ಡು ಮಾಡಿತು.

ಪ್ರಿಯಾಮಣಿ ಕೂಡ ಈ ಸಲ ನಾಲ್ಕು ಸಿನಿಮಾಗಳ ಮೂಲಕ ರಂಜಿಸಿದ್ದಾರೆ. ಕತೆ, ಚಿತ್ರಕತೆ, ನಿರ್ದೇಶನ ಪುಟ್ಟಣ್ಣ , ದನ ಕಾಯೋನು, ಕಲ್ಪನಾ-2, ಇದೊಳ್ಳೆ ರಾಮಾಯಣ ತೆರೆಕಂಡ ಚಿತ್ರಗಳು. ದನ ಕಾಯೋನು, ಪುಟ್ಟಣ್ಣ ಇವರ ಗೆದ್ದ ಚಿತ್ರಗಳು.

ಈ ವರ್ಷ ಬಿಡುಗಡೆಯಾದ ಸಿನಿಮಾಗಳಲ್ಲಿ ಹೆಚ್ಚು ಸದ್ದು ಮಾಡಿದ್ದು ಯು ಟರ್ನ್‌ ಚಿತ್ರ. ಈ ಸಿನಿಮಾ ಮೂಲಕ ಸ್ಯಾಂಡಲ್‌ವುಡ್‌ಗೆ ಎಂಟ್ರಿ ಕೊಟ್ಟವರು ಶ್ರದ್ಧಾ ಶ್ರೀನಾಥ್‌. ಬಿಡುಗಡೆಯಾಗಿದ್ದು ಇದೊಂದೇ ಸಿನಿಮಾವಾದರೂ, ನಂತರ ಸಾಕಷ್ಟು ಚಿತ್ರಗಳಲ್ಲಿ ಇವರು ಕಾಣಿಸಿಕೊಂಡರು. ಸದ್ಯ ತೆಲುಗು ಮತ್ತು ತಮಿಳು ಚಿತ್ರಗಳಲ್ಲೂ ನಟಿಸುತ್ತಿದ್ದಾರೆ.

ಟಾಪ್‌ ಹೀರೋಗಳು

1. ಶಿವರಾಜ್‌ಕುಮಾರ್‌ (ಕಿಲ್ಲಿಂಗ್‌ ವೀರಪ್ಪನ್‌, ಶಿವಲಿಂಗ, ಸಂತೆಯಲ್ಲಿ ನಿಂತ ಕಬೀರ)

2. ಪುನೀತ್‌ರಾಜ್‌ಕುಮಾರ್‌ (ಚಕ್ರವ್ಯೂಹ, ದೊಡ್ಮನೆ ಹುಡ್ಗ)

3. ಸುದೀಪ್‌ (ಕೋಟಿಗೊಬ್ಬ-2, ಮುಕುಂದ ಮುರಾರಿ)

4. ಗಣೇಶ್‌ (ಜೂಮ್‌, ಮುಂಗಾರು ಮಳೆ- 2, ಸುಂದರಾಂಗ ಜಾಣ)

5. ದರ್ಶನ್‌ (ವಿರಾಟ್‌, ಜಗ್ಗುದಾದಾ)

6. ಯಶ್‌ (ಸಂತು ಸ್ಪ್ರೇಟ್‌ಫಾರ್ವರ್ಡ್‌)

ಟಾಪ್‌ ಹಿರೋಯಿನ್ಸ್‌

1. ರಾಧಿಕಾ ಪಂಡಿತ್‌ (ಜೂಮ್‌, ದೊಡ್ಮನೆ ಹುಡ್ಗ, ಸಂತು ಸ್ಪ್ರೇಟ್‌ ಫಾರ್ವರ್ಡ್‌)

2. ಶ್ರುತಿ ಹರಿಹರನ್‌ (ಗೋಧಿ ಬಣ್ಣ ಸಾಧಾರಣ ಮೈಕಟ್ಟು, ಜೈ ಮಾರುತಿ 800, ಸಿಪಾಯಿ, ಮಾದ ಮತ್ತು ಮಾನಸಿ)

3. ಪ್ರಿಯಾಮಣಿ (ದನ ಕಾಯೋನು, ಇದೊಳ್ಳೆ ರಾಮಾಯಣ, ಕಲ್ಪನಾ-2, ಕತೆ, ಚಿತ್ರಕತೆ, ನಿರ್ದೇಶನ ಪುಟ್ಟಣ್ಣ)

4. ಶ್ರದ್ಧಾ ಶ್ರೀನಾಥ್‌ (ಯೂ ಟರ್ನ್‌)