ಬೀದರ್‌: ಜಿಲ್ಲಾಧಿಕಾರಿ ಅನುರಾಗ್‌ ತಿವಾರಿ ಅವರ ವರ್ಗಾವಣೆ ಖಂಡಿಸಿ ಶುಕ್ರವಾರ ನಗರದಲ್ಲಿ ಕನ್ನಡಾಂಬೆ ಗೆಳೆಯರ ಬಳಗದಿಂದ ಟೈಯರ್‌ ಸುಟ್ಟು ಪ್ರತಿಭಟನೆ ನಡೆಸಿ, ಆಕ್ರೋಶ ವ್ಯಕ್ತಪಡಿಸಲಾಯಿತು. ನಗರದ ಅಂಬೇಡ್ಕರ್‌ ವೃತ್ತದಿಂದ ಜಿಲ್ಲಾಧಿಕಾರಿಗಳ ಕಚೇರಿಯ ವರೆಗೆ ಕನ್ನಡಾಂಬೆ ಗೆಳೆಯರ ಬಳಗದ ಕಾರ್ಯಕರ್ತರು, ಬಳಗದ ವಿರೂಪಾಕ್ಷ ಗಾದಗಿ ನೇತೃತ್ವದಲ್ಲಿ ಪಾದಯಾತ್ರೆಯ ಮೂಲಕ ಮೆರವಣಿಗೆ ನಡೆಸಿದರು. ಈ ವೇಳೆ ಮಾತನಾಡಿದ, ವಿರೂಪಾಕ್ಷ ಗಾದಗಿ, ಬೀದರ್‌ ಹಿಂದುಳಿದ ಜಿಲ್ಲೆಯಾಗಿದೆ. ಈ ಭಾಗಕ್ಕೆ ಸರಕಾರ ಯಾವಾಗಲು ಮಲತಾಯಿ ಧೋರಣೆ ಮಾಡುತ್ತ ಬರುತ್ತಿದೆ. ಜಿಲ್ಲೆಯ ಎಲ್ಲ ಸರಕಾರಿ ಕಚೇರಿಗಳಲ್ಲಿ ಪ್ರಭಾರಿಗಳೇ ಇದ್ದಾರೆ. ಇಂತಹ ಪರಿಸ್ಥಿತಿಯಲ್ಲಿ ಜಿಲ್ಲೆಯ ಆಡಳಿತದ ಚುಕ್ಕಾಣಿ ಹಿಡಿದಿರುವ ಐಎಎಸ್‌, ಅಧಿಕಾರಿಗಳನ್ನು ಸರಕಾರ ಮನಬಂದಂತೆ ವರ್ಗಾವಣೆ ಮಾಡುತ್ತಿರುವುದು ಜಿಲ್ಲೆಯ ಅಭಿವೃದ್ಧಿಗೆ ಹಿನ್ನಡೆಯಾಗಲಿದೆ ಎಂದರು. ಕಲವೇ ದಿನಗಳ ಹಿಂದೆಯಷ್ಟೇ ಜಿಪಂ ಸಿಇಒ ಆಗಿದ್ದ ಪವನಕುಮಾರ ಮಾಲಪಾಟಿ ಅವರನ್ನು ವರ್ಗಾವಣೆ ಮಾಡಿರುವ ಸರಕಾರ, ಇದೀಗ ಜಿಲ್ಲಾಧಿಕಾರಿಯವರನ್ನು ವರ್ಗಾವಣೆ ಮಾಡಿದೆ. ಅನುರಾಗ್‌ ತಿವಾರಿ ಅವರು ಜಿಲ್ಲೆಯಲ್ಲಿ ಅನೇಕ ಜನುಪಯೋಗಿ ಕೆಲಸಗಳನ್ನು ಮಾಡುತ್ತಿದ್ದಾರೆ. ಇದೀಗ ಸರಕಾರವೇ ಕೆಲಸಗಳಿಗೆ ಬ್ರೇಕ್‌ ಹಾಕುವ ಕೆಲಸ ಮಾಡುತ್ತಿದೆ ಎಂದು ದೂರಿದರು. ಕೆಲ ಪಟ್ಟ ಭದ್ರ ಹಿತಾಸಕ್ತಿಗಳು ಹಾಗೂ ರಾಜಕೀಯ ನಾಯಕರ ಕೈಗೊಂಬೆಯಾದರೆ ಮಾತ್ರ ಇಲ್ಲಿ ಅಧಿಕಾರ ನಡೆಸಲು ಸಾಧ್ಯ ಎನ್ನುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಇಲ್ಲಿ ಪ್ರಾಮಾಣಿಕ ಹಾಗೂ ದಕ್ಷ ಅಧಿಕಾರಿಗಳಿಗೆ ಜಾಗವಿಲ್ಲ ಎಂಬಂತ ವ್ಯವಸ್ಥೆ ಇದ್ದು, ಇದನ್ನು ಖಂಡಿಸುತ್ತೇವೆ ಎಂದರು. ಸರಕಾರ ಈ ನಿಟ್ಟಿನಲ್ಲಿ ತನ್ನ ಗಂಭೀರತೆಯನ್ನು ಪ್ರದರ್ಶಿಸಬೇಕು ಹಾಗೂ ಜಿಲ್ಲೆಗೆ ಜಿಲ್ಲಾ ಮಟ್ಟದ ಕಚೇರಿಗಳಲ್ಲಿ ಕಾಯಂ ಅಧಿಕಾರಿಗಳನ್ನು ನೇಮಕ ಮಾಡಬೇಕು ಎಂದು ಆಗ್ರಹಿಸಿದರು. ಕರವೇ ಜಿಲ್ಲಾಧ್ಯಕ್ಷ ಸಾವನ್‌ ವಾಗ್ಲೆ, ಕರವೇ (ಸ್ವಾಭಿಮಾನಿ) ಬಣದ ಮಾಣಿಕೇಶ್‌ ಪಾಟೀಲ್‌, ಅವಿನಾಶ್‌ ಶಹಗಂಜ್‌, ಇಮಾನವೇಲ್‌, ಸಂಜು ಗಾದಗಿ, ಸುನಿಲ್‌ ಸ್ವಾಮಿ, ಜಗದೀಶ್‌ ಸ್ವಾಮಿ, ಶಾಂತವೀರ, ಬಸವರಾಜ, ಶಿವಕುಮಾರ, ರುಬೀನ, ಸುಮಂತ, ಬುದ್ಧಾನಂದ, ಅಲ್ತಾಫ್‌, ನಾಗೇಶ ಪಾಟೀಲ, ಪ್ರಭು ಬಿರಾದಾರ, ಸಂಗಮೇಶ ನೇಳಗೆ ಮತ್ತಿತರರು ಇದ್ದರು.
↧
ದಿಢೀರ್‌ ಡಿಸಿ ವರ್ಗಾವಣೆಗೆ ಖಂಡನೆ, ಪ್ರತಿಭಟನೆ
↧