200 ✅! @karun126 brings up his maiden double hundred in Test cricket #INDvENG pic.twitter.com/MDmFdIlmh2
71 ರನ್‌ಗಳೊಂದಿಗೆ ದಿನದಾಟ ಮುಂದುವರಿಸಿದ ಕರುಣ್, 4ನೇ ದಿನ ತಮ್ಮ ಮೊತ್ತಕ್ಕೆ 232 ರನ್ ಸೇರಿಸಿ ಐತಿಹಾಸಿಕ ತ್ರಿಶತಕದ ಸಾಧನೆ ಮಾಡಿದರು. ದಿಲ್ಲಿಯ ಸ್ಫೋಟಕ ಬ್ಯಾಟ್ಸ್ಮನ್ ವೀರೇಂದ್ರ ಸೆಹ್ವಾಗ್‌ ತಮ್ಮ 2ನೇ ತ್ರಿಶತಕ ಸಿಡಿಸಿ ಅಬ್ಬರಿಸಿದ ನೆಲದಲ್ಲಿಯೇ ಕರುಣ್ ಚೊಚ್ಚಲ ತ್ರಿಶತಕದ ಸಾಧನೆ ಮಾಡಿದ್ದು ವಿಶೇಷ.
ಕರುಣ್ ಅವರ ಅತ್ಯದ್ಭುತ ಆಟದ ಪರಿಣಾಮ ಭಾರತ ಮೊದಲ ಇನಿಂಗ್ಸ್‌ನಲ್ಲಿ 7 ವಿಕೆಟ್‌ಗೆ 759 ರನ್ ಗಳಿಸಿ ಡಿಕ್ಲೇರ್‌ ಮಾಡಿಕೊಂಡಿತು. ಇದು ಭಾರತೀಯ ಟೆಸ್ಟ್ ಇತಿಹಾಸದಲ್ಲೇ ಇನಿಂಗ್ಸ್‌ ಒಂದರಲ್ಲಿ ದಾಖಲಾದ ಗರಿಷ್ಠ ಮೊತ್ತ. 282 ರನ್‌ಗಳ ಭಾರಿ ಹಿನ್ನಡೆಯೊಂದಿಗೆ 2ನೇ ಇನಿಂಗ್ಸ್‌ ಆರಂಭಿಸಿದ ಇಂಗ್ಲೆಂಡ್‌ ದಿನದಂತ್ಯಕ್ಕೆ ವಿಕೆಟ್‌ ನಷ್ಟವಿಲ್ಲದೆ 12 ರನ್ ಗಳಿಸಿತು.
ಚೆನ್ನೈನ ಎಂಎ ಚಿದಂಬರಂ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಐದನೇ ಟೆಸ್ಟ್ ಪಂದ್ಯದಲ್ಲಿ, 25ರ ಹರೆಯದ ಕರುಣ್ ನಾಯರ್ ಅಜೇಯವಾಗಿ ಈ ಸಾಧನೆ ಮಾಡಿದರು. ಮತ್ತೊಬ್ಬ ಕನ್ನಡಿಗ ಆಟಗಾರ ಕೆ.ಎಲ್.ರಾಹುಲ್ ಅವರು ಭಾನುವಾರ ಕೇವಲ 1 ರನ್‌ನಿಂದ ದ್ವಿಶತಕ ವಂಚಿತರಾಗಿದ್ದರು.
3ನೇ ಟೆಸ್ಟ್, 3ನೇ ಇನಿಂಗ್ಸ್‌, 300 ರನ್
ಮೊಹಾಲಿಯಲ್ಲಿ ನಡೆದ ಸರಣಿಯ 3ನೇ ಪಂದ್ಯದ ಮೂಲಕ ಟೆಸ್ಟ್ ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದ್ದ ಕರುಣ್‌ಗೆ ಮೊದಲೆರೆಡು ಇನಿಂಗ್ಸ್‌ಗಳಲ್ಲಿ ಯಶಸ್ಸು ಸಿಕ್ಕಿರಲಿಲ್ಲ. ಆದರೆ ವೃತ್ತಿಜೀವನದ 3ನೇ ಟೆಸ್ಟ್ ಇನಿಂಗ್ಸ್‌ನಲ್ಲಿ ಕರುಣ್ 300ರ ಸಾಧನೆ ಮಾಡಿದ್ದು ವಿಶೇಷ. ಲೆಗ್‌ಸ್ಪಿನ್ನರ್‌ ಆದಿಲ್‌ ರಶೀದ್‌ ಎಸೆತವನ್ನು ಬ್ಯಾಕ್‌ಫುಟ್‌ ಪಾಯಿಂಟ್‌ ವಿಭಾಗದಲ್ಲಿ ಬೌಂಡರಿಗಟ್ಟುವ ಮೂಲಕ ಕರುಣ್ ಚೊಚ್ಚಲ ತ್ರಿಶತಕ ಪೂರ್ತಿಗೊಳಿಸಿದರು.
ದ್ವಿಶತಕದ ನಂತರ ಕೊಂಚ ನಿಧಾನಗತಿಯ ಆಟವಾಡಿದ ಕರುಣ್, 250ರ ಗಡಿ ದಾಟಿದ ನಂತರ ಬಿರುಸಿನ ಆಟಕ್ಕಿಳಿದರು. ಈ ವೇಳೆ ಇನಿಂಗ್ಸ್‌ ಡಿಕ್ಲೇರ್‌ ಘೋಷಿಸುವ ಹಾದಿಯಲ್ಲಿದ್ದ ನಾಯಕ ವಿರಾಟ್, ತಮ್ಮ ನಿರ್ಧಾರವನ್ನು ಸ್ವಲ್ಪ ಹೊತ್ತು ಮುಂದೂಡಿದರು. ಈ ಅವಕಾಶವನ್ನು ಬಳಸಿಕೊಂಡ ಕರುಣ್, ತಮ್ಮ ತ್ರಿಶತಕದ ಕೊನೆಯ 50 ರನ್‌ಗಳನ್ನು ಕೇವಲ 33 ಎಸೆತಗಳಲ್ಲಿ ಪೂರೈಸಿದರು.
ಕರುಣ್ ಸಾಧನೆಗೆ ಸಾಕ್ಷಿಯಾದ ಕುಟುಂಬ
ಕರುಣ್ ನಾಯರ್ ತ್ರಿಶತಕದ ವೈಭವಕ್ಕೆ ಅವರ ಕುಟುಂಬ ಸಾಕ್ಷಿಯಾಗಿದ್ದು ವಿಶೇಷ. ಮಗನ ಶತಕವನ್ನು ಕಣ್ತುಂಬಿಕೊಳ್ಳಲು ತಂದೆ ಕಲಾಧರನ್‌ ನಾಯರ್ ಪತ್ನಿಯೊಂದಿಗೆ ಸೋಮವಾರ ಬೆಳಗ್ಗೆಯೇ ಚೆಪಾಕ್‌ ಮೈದಾನಕ್ಕೆ ಆಗಮಿಸಿದ್ದರು. ಹೆತ್ತವರ ನಿರೀಕ್ಷೆಯನ್ನು ಕರುಣ್ ಹುಸಿ ಮಾಡಲಿಲ್ಲ. ಶತಕಕ್ಕೆ ಸಾಕ್ಷಿಯಾಗಲು ಬಂದಿದ್ದ ತಂದೆ-ತಾಯಿಗೆ ಕರುಣ್ ಶತಕದ ನಂತರ ದ್ವಿಶತಕ, ಬಳಿಕ ತ್ರಿಶತಕದ ಸಂಭ್ರಮವನ್ನು ಉಣ ಬಡಿಸಿದರು.
ಒಂದೇ ದಿನ ಶತಕ, ದ್ವಿಶತಕ, ತ್ರಿಶತಕ
4ನೇ ದಿನದಾಟ ಆರಂಭವಾದ ಕೆಲ ಹೊತ್ತಿನಲ್ಲೇ ಕರುಣ್ ಚೊಚ್ಚಲ ಶತಕದ ಸಂಭ್ರಮ ತಮ್ಮದಾಗಿಸಿಕೊಂಡರು. 122 ರನ್‌ಗಳೊಂದಿಗೆ ಭೋಜನ ವಿರಾಮಕ್ಕೆ ತೆರಳಿದ ಕರ್ನಾಟಕದ ಆಟಗಾರ, ನಂತರ 150ರ ಗಡಿ ದಾಟಿದರು. ಚಹಾ ವಿರಾಮಕ್ಕೆ ತೆರಳುವ ಸಂದರ್ಭದಲ್ಲಿ 195 ರನ್‌ಗಳೊಂದಿಗೆ ಅಜೇಯರಾಗುಳಿದಿದ್ದ ಕರುಣ್, ಪಂದ್ಯದ ಕೊನೆಯ ಅವಧಿಯ ಆರಂಭದಲ್ಲೇ ಕೀಟನ್‌ ಜೆನಿಂಗ್ಸ್‌ ಎಸೆತವನ್ನು ಕವರ್ಸ್‌ನಲ್ಲಿ ಬೌಂಡರಿಗಟ್ಟಿ ದ್ವಿಶತಕ ಪೂರ್ತಿಗೊಳಿಸಿದರು. ದ್ವಿಶತಕದ ನಂತರವೂ ಕರುಣ್ ಅವರ ದಣಿವರಿಯದ ಆಟ ಮುಂದುವರಿಯಿತು. 201ರಿಂದ 303 ರನ್‌ಗಳನ್ನು ಕೇವಲ 75 ಎಸೆತಗಳಲ್ಲಿ ಗಳಿಸಿದ ಕರುಣ್, ಟೆಸ್ಟ್‌ನಲ್ಲಿ ಒಂದೇ ದಿನ ಶತಕ, ದ್ವಿಶತಕ, ತ್ರಿಶತಕ ದಾಖಲಿಸಿದ ಅಪರೂಪದ ಸಾಧನೆ ಮಾಡಿದರು.
300ರಲ್ಲಿ 3 ಶತಕದ ಜತೆಯಾಟ
ಮುನ್ನೂರರ ಇನಿಂಗ್ಸ್‌ ವೇಳೆ ಕರುಣ್ ನಾಯರ್ 3 ಶತಕದ ಜತೆಯಾಟದಲ್ಲಿ ಭಾಗಿಯಾದರು. 3ನೇ ದಿನ ರಾಜ್ಯದ ಮತ್ತೊಬ್ಬ ಆಟಗಾರ ಕೆ.ಎಲ್ ರಾಹುಲ್ (199) ಅವರೊಂದಿಗೆ 4ನೇ ವಿಕೆಟ್‌ಗೆ 161 ರನ್ ಸೇರಿಸಿದ್ದ ಕರುಣ್, 4ನೇ ದಿನ ಅಶ್ವಿನ್(67) ಜತೆ 6ನೇ ವಿಕೆಟ್‌ಗೆ 181 ಮತ್ತು 7ನೇ ವಿಕೆಟ್‌ಗೆ ರವೀಂದ್ರ ಜಡೇಜಾ (51) ಜತೆ 138 ರನ್‌ಗಳ ಜತೆಯಾಟವಾಡಿದರು.
ಕನ್ನಡಿಗರ ಅಪರೂಪದ ಸಾಧನೆ
ಕರ್ನಾಟಕದ ಆಟಗಾರರಿಬ್ಬರು ಒಂದೇ ಟೆಸ್ಟ್ ಪಂದ್ಯದಲ್ಲಿ ಶತಕ ಗಳಿಸಿದ್ದು ಇದೇ ಮೊದಲು. ಪಂದ್ಯದ 3ನೇ ದಿನ ಶತಕ ಬಾರಿಸಿದ್ದ ಕೆ.ಎಲ್ ರಾಹುಲ್ (199) ದ್ವಿಶತಕದ ಹೊಸ್ತಿಲಲ್ಲಿ ಎಡವಿದರೆ, ಕರುಣ್ ನಾಯರ್ (303*) ಚೊಚ್ಚಲ ಶತಕವನ್ನು ತ್ರಿಶತಕವನ್ನಾಗಿ ಪರಿವರ್ತಿಸಿದರು. ಪಂದ್ಯದಲ್ಲಿ ಕನ್ನಡಿಗರಿಬ್ಬರ ಒಟ್ಟು ಗಳಿಕೆ 502 ರನ್. ಇದು ಟೆಸ್ಟ್ ಇನಿಂಗ್ಸ್‌ ಒಂದರಲ್ಲಿ ಭಾರತೀಯ ಬ್ಯಾಟ್ಸ್‌ಮನ್‌ಗಳಿಬ್ಬರು ಜತೆಯಾಗಿ ಕಲೆ ಹಾಕಿದ 2ನೇ ಗರಿಷ್ಠ ರನ್. 2004ರ ಮುಲ್ತಾನ್‌ ಟೆಸ್ಟ್ ಪಂದ್ಯದಲ್ಲಿ ಪಾಕಿಸ್ತಾನ ವಿರುದ್ಧ ಒಟ್ಟು 503 ರನ್ ಕಲೆ ಹಾಕಿದ್ದ ಸೆಹ್ವಾಗ್‌ (309) ಮತ್ತು ಸಚಿನ್‌ (194*) ಮೊದಲ ಸ್ಥಾನದಲ್ಲಿದ್ದಾರೆ.
ಸಂಕ್ಷಿಪ್ತ ಸ್ಕೋರ್:
ಇಂಗ್ಲೆಂಡ್‌: ಪ್ರಥಮ ಇನಿಂಗ್ಸ್‌ 477 (157.2)
ಭಾರತ: ಪ್ರಥಮ ಇನಿಂಗ್ಸ್‌ 759/7 ಡಿ. (190.4)
(3ನೇ ದಿನದಂತ್ಯಕ್ಕೆ 108 ಓವರ್‌ಗಳಲ್ಲಿ 391/4)
ಸ್ಕೋರ್ ಕಾರ್ಡ್‌ಗಾಗಿ ಇಲ್ಲಿ ಕ್ಲಿಕ್ ಮಾಡಿ.
ಅಜಿಂಕ್ಯ ರಹಾನೆ ಹಾಗೂ ರೋಹಿತ್ ಶರ್ಮಾ ಅವರು ಫಿಟ್ನೆಸ್ ಸಮಸ್ಯೆಯಿಂದಾಗಿ ಭಾರತೀಯ ತಂಡದಲ್ಲಿ ಸ್ಥಾನ ಪಡೆದಿದ್ದ ಕರುಣ್ ನಾಯರ್, ಚೆನ್ನೈಯಲ್ಲಿ ಬ್ಯಾಟಿಂಗ್‌ಗೆ ನೆರವಾಗುವ ಪಿಚ್‌ನಲ್ಲಿ ದೊರೆತ ಅವಕಾಶವನ್ನು ಸದುಪಯೋಗಪಡಿಸಿಕೊಂಡರು. ಮೂರನೇ ಟೆಸ್ಟ್ ಪಂದ್ಯದಲ್ಲಿಯೇ ಉತ್ತಮ ಆಟ ಪ್ರದರ್ಶಿಸಿರುವ ನಾಯರ್ ಭವಿಷ್ಯದ ಬ್ಯಾಟ್ಸ್ಮನ್ ಆಗಿ ಭರವಸೆ ಮೂಡಿಸಿದ್ದಾರೆ. ನಾಯರ್ ಅವರು ರವಿಚಂದ್ರನ್ ಅಶ್ವಿನ್ ಜತೆ ಸೇರಿಕೊಂಡು ಆರನೇ ವಿಕೆಟಿಗೆ ಅಜೇಯ 147 ರನ್ ಸೇರಿಸಿದ್ದಾರೆ.
ಚೆನ್ನೈ: ಅದ್ಭುತ... ಅಮೋಘ... ಆಕರ್ಷಕ... ಮನಮೋಹಕ... ಕನ್ನಡಿಗ ಕರುಣ್ ನಾಯರ್ (303*) ಅವರ ತ್ರಿಶತಕದ ಆಟದ ಐತಿಹಾಸಿಕ ಸಾಧನೆಯ ಸೊಬಗನ್ನು ಬಣ್ಣಿಸಲು ಪದಗಳೇ ಸಾಲವು. ಅದು ಸಾಟಿಯಿಲ್ಲದ ಆಟ. ಎಂ.ಎ ಚಿದಂಬರಂ ಕ್ರೀಡಾಂಗಣದಲ್ಲಿ ನಡೆಯುತ್ತಿರುವ ಇಂಗ್ಲೆಂಡ್‌ ವಿರುದ್ಧದ 5ನೇ ಟೆಸ್ಟ್ ಪಂದ್ಯದ 4ನೇ ದಿನವಾದ ಸೋಮವಾರ, ಕರುಣ್ ನಾಯರ್ ತ್ರಿಶತಕದ ಸಂಭ್ರಮದಲ್ಲಿ ಮಿಂದೆದ್ದರು.