*50 ವಿಮಾನಗಳಲ್ಲಿ ಟಿಕೆಟ್‌ ಬುಕ್‌ ಮಾಡಿದ್ದ ಸಚಿವರು ನಾಗ್ಪುರ: 500/1000 ರೂ. ಮುಖಬೆಲೆಯ ನೋಟುಗಳ ಅಮಾನ್ಯೀಕರಣದ ನಂತರವೂ ಸಿರಿವಂತ ಗಣ್ಯರ ಕುಟುಂಬಗಳಲ್ಲಿ ನಗದಿನ ಹಂಗಿಲ್ಲದೇ ಅದ್ಧೂರಿ ವಿವಾಹಗಳು ನಡೆಯುತ್ತಲೇ ಇವೆ. ಕೇಂದ್ರ ಸಚಿವ ನಿತಿನ್‌ ಗಡ್ಕರಿಯವರ ಪುತ್ರಿ ಕೇತ್ಕಿಯ ವಿವಾಹವೂ ಇದೇ ಕಾರಣಕ್ಕೆ ಸುದ್ದಿಯಾಗಿದೆ. ಮದುವೆಗೆ ಬರುವ ಅತಿಥಿಗಳಿಗೆಂದೇ 50 ವಿಮಾನಗಳನ್ನು ಬಾಡಿಗೆ ಪಡೆದು ಟಿಕೆಟ್‌ಗಳನ್ನು ಕಾಯ್ದಿರಿಸಲಾಗಿದ್ದು, ಅದರಂತೆ ಭಾನುವಾರ ಸಂಜೆ ಮದುವೆ ನಡೆದಿದೆ. ಕೇಂದ್ರ ಸಚಿವರಾದ ರಾಜನಾಥ್‌ ಸಿಂಗ್‌, ವೆಂಕಯ್ಯ ನಾಯ್ಡು, ಪ್ರಕಾಶ್‌ ಜಾವಡೇಕರ್‌, ಪಿಯೂಷ್‌ ಗೋಯಲ್‌, ಮೇನಕಾ ಗಾಂಧಿ, ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ, ಆರೆಸ್ಸೆಸ್‌ ಮುಖ್ಯಸ್ಥ ಮೋಹನ್‌ ಭಾಗವತ್‌, ಯೋಗ ಗುರು ಬಾಬಾ ರಾಮ್‌ದೇವ್‌, ಮಹಾರಾಷ್ಟ್ರ ಸಿಎಂ ದೇವೇಂದ್ರ ಫಡ್ನವಿಸ್‌, ಅಸ್ಸಾಂ ರಾಜ್ಯಪಾಲ ಭನ್ವರಿಲಾಲ್‌ ಪುರೋಹಿತ್‌, ಶಿವಸೇನಾ ಮುಖ್ಯಸ್ಥ ಉದ್ಧವ್‌ ಠಾಕ್ರೆ, ಎಂಎನ್‌ಎಸ್‌ ಅಧ್ಯಕ್ಷ ರಾಜ್‌ ಠಾಕ್ರೆ, ಎನ್‌ಸಿಪಿ ನಾಯಕ ಪ್ರಫುಲ್‌ ಪಟೇಲ್‌ ಸೇರಿದಂತೆ ಬಾಲಿವುಡ್‌ ತಾರೆಯರು ಆಗಮಿಸಿ, ವಧು-ವರರನ್ನು ಹರಿಸಿದರು. ಗಡ್ಕರಿಯವರ ಪುತ್ರಿ ಕೇತ್ಕಿ ಹಾಗೂ ಕುಟುಂಬ ಸ್ನೇಹಿತರ ಮಗ ಆದಿತ್ಯ ಕಶೇಡಿಕರ್‌ ಮದುವೆ ನಾಗ್ಪುರದ ವಾದ್ರಾ ರಸ್ತೆಯಲ್ಲಿರುವ ರಾಣಿ ಕೋಟಿಯಲ್ಲಿ ನೆರವೇರಿತು. ಆದಿತ್ಯ ಅವರು ಅಮೆರಿಕದಲ್ಲಿ ಫೇಸ್‌ಬುಕ್‌ ಸಂಸ್ಥೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದಾರೆಂದು ವರದಿಯಾಗಿದೆ. ವಿವಾಹಕ್ಕೆ ಆಗಮಿಸುವ ಗಣ್ಯರಿಗೆಂದೇ ಗಡ್ಕರಿ 50 ಬಾಡಿಗೆ ವಿಮಾನಗಳಲ್ಲಿ ಕೆಲ ದಿನಗಳ ಹಿಂದೆಯೇ ಟಿಕೆಟ್‌ಗಳನ್ನು ಬುಕ್‌ ಮಾಡಿದ್ದರಿಂದ, ಕಳೆದೊಂದು ದಿನದಲ್ಲಿ ನಿಗದಿಯಾಗದ 10 ವಿಮಾನಗಳು ನಾಗ್ಪುರ ಏರ್‌ಪೋರ್ಟ್‌ಗೆ ಬಂದಿಳಿದಿವೆ ಎಂದು ಮೂಲಗಳು ಹೇಳಿವೆ. ಗಡ್ಕರಿ ಮಾತ್ರ ಮಾಧ್ಯಮ ವರದಿಗಳು ಕಪೋಲಕಲ್ಪಿತ ಎಂದು ಹೇಳಿದ್ದಾರೆ.
↧
ಗಡ್ಕರಿ ಪುತ್ರಿ ಮದುವೆಗೆ ಗಣ್ಯರ ದಂಡು
↧