ಬೆಂಗಳೂರು: ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಹೇಳಿಕೆಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿರುವ ಸಿಎಂ ಸಿದ್ದರಾಮಯ್ಯ, ಭ್ರಷ್ಟರನ್ನು ಪೋಷಿಸಿ ಬೆಳೆಸುವ ಶಾ ಅವರಂಥ ನಾಯಕರಿಂದ ನೈತಿಕ ಪಾಠ ಕಲಿಯಬೇಕಿಲ್ಲ ಎಂದು ತಿರುಗೇಟು ನೀಡಿದ್ದಾರೆ. ಅರಮನೆ ಮೈದಾನದಲ್ಲಿ ಸೋಮವಾರ 'ಬೆಂಗಳೂರು ಐಟಿಇ.ಬಿಜ್‌ 2016' ಸಮಾರಂಭದಲ್ಲಿ ಪಾಲ್ಗೊಂಡ ಬಳಿಕ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು ''ರಾಜ್ಯದಲ್ಲಿ ಅತಿ ಭ್ರಷ್ಟ ಸರಕಾರ ನೀಡಿದ ಕುಖ್ಯಾತಿ ಬಿಜೆಪಿಗಿದೆ. ಭ್ರಷ್ಟ ಸರಕಾರದ ನೇತೃತ್ವ ವಹಿಸಿದ್ದ ಯಡಿಯೂರಪ್ಪ ಜತೆ ವೇದಿಕೆ ಹಂಚಿಕೊಂಡಿದ್ದ ಅಮಿತ್‌ ಶಾ ಭ್ರಷ್ಟಾಚಾರದ ವಿರುದ್ಧ ದನಿ ಎತ್ತಿದ್ದು ಅಚ್ಚರಿ ತಂದಿದೆ. ಜೈಲಿಗೆ ಹೋದವರು, ನೋಟು ಎಣಿಕೆ ಯಂತ್ರ ಇಟ್ಟುಕೊಂಡ ಮುಖಂಡರನ್ನು ಜತೆಯಲ್ಲಿ ಕೂರಿಸಿ ಶಾ ನಮ್ಮ ವಿರುದ್ಧ ಮಾತನಾಡುವ ನೈತಿಕತೆ ಹೊಂದಿಲ್ಲ,'' ಎಂದು ಪ್ರತಿಕ್ರಿಯಿಸಿದರು. ''ಶಾ ಕೊಲೆ ಪ್ರಕರಣದಲ್ಲಿ ಸಿಲುಕಿ ಆರೋಪ ಹೊತ್ತಿದ್ದರು. ಮೋದಿ ಪ್ರಧಾನಿ ಆಗದಿದ್ದಲ್ಲಿ ಶಾ ಜೈಲಿಗೆ ಹೋಗಬೇಕಿತ್ತು. ಆದರೆ, ಸಿಬಿಐ ಸಂಸ್ಥೆಯನ್ನು ದುರುಪಯೋಗ ಪಡಿಸಿಕೊಂಡ ಕಾರಣ ಶಾ ನುಣುಚಿಕೊಂಡರು. ಇಂತಹ ಹಿನ್ನೆಲೆಯುಳ್ಳವರು ಬೇರೊಬ್ಬರನ್ನು ಟೀಕಿಸುವ ನೈತಿಕತೆ ಹೊಂದಿಲ್ಲ,'' ಎಂದರು. ''ಕಾವೇರಿ, ಮಹದಾಯಿ ವಿಚಾರದಲ್ಲಿ ರಾಜ್ಯಕ್ಕೆ ಅನ್ಯಾಯವಾಗಿದೆ ಎಂದು ಬೊಬ್ಬೆ ಹಾಕುವ ಮಾಜಿ ಸಿಎಂ ಯಡಿಯೂರಪ್ಪ ಅವರೇ ಅಧಿಕಾರದಲ್ಲಿದ್ದರೂ, ಸಮಸ್ಯೆಗೆ ಪರಿಹಾರ ಹುಡುಕಲಿಲ್ಲ. ಈಗ ಪ್ರತಿಪಕ್ಷದಲ್ಲಿರುವ ಕಾರಣ ರಾಜಕಾರಣಕ್ಕಾಗಿ ಮುಂದಿನ ಚುನಾವಣೆಯಲ್ಲಿ ಪಕ್ಷ ಅಧಿಕಾರಕ್ಕೆ ಬಂದಲ್ಲಿ ಪರಿಹಾರ ಹುಡುಕುವ ಮಾತನ್ನಾಡಿರುವುದು ಜನರನ್ನು ವಂಚಿಸುವ ಕೆಲಸವಷ್ಟೇ,'' ಎಂದು ಟೀಕಿಸಿದರು.
↧
ಅತಿ ಭ್ರಷ್ಟ ಸರಕಾರ ನೀಡಿದ ಕುಖ್ಯಾತಿ ಬಿಜೆಪಿಗಿದೆ : ಅಮಿತ್‌ ಶಾ ಹೇಳಿಕೆಗೆ ಸಿಎಂ ತಿರುಗೇಟು
↧