ಹೊಸದಿಲ್ಲಿ: ಕಳೆದ ವಾರವಷ್ಟೇ ಚೀನಾ ಓಪನ್‌ ಗೆಲ್ಲುವ ಮೂಲಕ ಚೊಚ್ಚಲ ಸೂಪರ್‌ ಸಿರೀಸ್‌ ಪ್ರೀಮಿಯರ್‌ ಕಿರೀಟ ಗೆದ್ದ ರಿಯೊ ಒಲಿಂಪಿಕ್‌ ಬೆಳ್ಳಿ ಪದಕ ವಿಜೇತೆ ಪಿ.ವಿ. ಸಿಂಧೂ ಬಿಡಬ್ಲ್ಯುಎಫ್‌ ಬಿಡುಗಡೆ ಮಾಡಿರುವ ನೂತನ ವಿಶ್ವ ರಾರ‍ಯಂಕಿಂಗ್‌ನ ಮಹಿಳೆಯರ ಸಿಂಗಲ್ಸ್‌ ವಿಭಾಗದಲ್ಲಿ ಅಗ್ರ ಹತ್ತರೊಳಗೆ ಸ್ಥಾನ ಪಡೆದಿದ್ದಾರೆ. ಆದರೆ ಇತ್ತೀಚೆಗೆ ಗಾಯದಿಂದ ಚೇತರಿಸಿಕೊಂಡು ಸ್ಪರ್ಧಾಕಣಕ್ಕೆ ಧುಮುಕಿರುವ ಭಾರತದ ಸ್ಟಾರ್‌ ಆಟಗಾರ್ತಿ ಸೈನಾ ನೆಹ್ವಾಲ್‌ ಅಗ್ರ 10ರಿಂದ ಹೊರಬಿದ್ದಿದ್ದಾರೆ. ಹೋದ ವಾರ ಚೀನಾ ಓಪನ್‌ ಪ್ರಶಸ್ತಿ ಜಯಿಸಿದ ಸಿಂಧೂ ಎರಡು ಸ್ಥಾನ ಮೇಲೇರಿ 9ನೇ ಸ್ಥಾನ ಗಳಿಸಿದರೆ, ವಿಶ್ವದ ಮಾಜಿ ನಂ.1 ಆಟಗಾರ್ತಿ ಸೈನಾ ಐದು ಸ್ಥಾನ ಕುಸಿದು 11ನೇ ಸ್ಥಾನ ಗಳಿಸಿದ್ದಾರೆ. ಚೀನಾ ಓಪನ್‌ನಲ್ಲಿ ಮೊದಲ ಸುತ್ತಿನಲ್ಲೇ ನಿರ್ಗಮಿಸಿದ್ದು, ಸೈನಾ ಹಿನ್ನಡೆಗೆ ಕಾರಣವಾಗಿದೆ. ಸೈನಾ ನೆಹ್ವಾಲ್‌ (38,080)ಗಿಂತಲೂ ಪ್ರಸ್ತುತ 38, 490 ಅಂಕ ಹೊಂದಿರುವ ಸಿಂಧೂ, ಸದ್ಯ ನಡೆಯುತ್ತಿರುವ ಹಾಂಕಾಂಗ್‌ ಓಪನ್‌ನಲ್ಲಿ ಇನ್ನಷ್ಟು ಉತ್ತಮ ಪ್ರದರ್ಶನ ನೀಡಿದರೆ, ಮುಂದಿನ ತಿಂಗಳು ನಡೆಯಲಿರುವ ಬಿಡಬ್ಲ್ಯುಎಫ್‌ ಸೂಪರ್‌ ಸಿರೀಸ್‌ ಫೈನಲ್ಸ್‌ಗೆ ಅರ್ಹತೆ ಹೊಂದುವ ಉತ್ತಮ ಅವಕಾಶ ಹೊಂದಿದ್ದಾರೆ. ಪುರುಷರ ಸಿಂಗಲ್ಸ್‌ನಲ್ಲಿ ಅಜಯ್‌ ಜಯರಾಮ್‌ 4 ಸ್ಥಾನ ಬಡ್ತಿ ಪಡೆದು 19ನೇ ಸ್ಥಾನಕ್ಕೆ ಏರಿದರೆ, ಎಚ್‌.ಎಸ್‌. ಪ್ರಣೋಯ್‌ 2 ಸ್ಥಾನ ಮುನ್ನಡೆದು 25 ಸ್ಥಾನದಲ್ಲಿದ್ದಾರೆ. ಚೀನಾ ಓಪನ್‌ನಿಂದ ಹೊರಗುಳಿದಿದ್ದ ಕಿಡಂಬಿ ಶ್ರೀಕಾಂತ್‌ 12ನೇ ಸ್ಥಾನಗಳಿಸಿದ್ದು, ಭಾರತೀಯರ ಪೈಕಿ ಅತ್ಯುನ್ನತ ಸ್ಥಾನದಲ್ಲಿದ್ದಾರೆ.
↧
ಬಿಡಬ್ಲ್ಯುಎಫ್‌ ರಾಂಕಿಂಗ್‌: ಸೈನಾ ಹಿಂದಿಕ್ಕಿದ ಸಿಂಧೂ
↧