ಹೊಸದಿಲ್ಲಿ: ಭಾರತದ ಜಲಗಡಿಯ ಕಣ್ಗಾವಲು ಸಾಮರ್ಥ್ಯ‌ವನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಸ್ಥಳೀಯವಾಗಿ ಸಿದ್ದಪಡಿಸಲಾದ ನಾಲ್ಕು ಬಗೆಯ ಸೋನಾರ್‌ಗಳನ್ನು ( ಜಲಾಂತರ ಶಬ್ದಶೋಧಕ) ಭಾರತೀಯ ನೌಕಾಪಡೆಗೆ ಸೇರ್ಪಡೆಗೊಳಿಸಲಾಗಿದೆ. ಅಭಯ್‌-ಆಳವಲ್ಲದ ನೀರಿನಲ್ಲಿನ ವಸ್ತುಗಳನ್ನು ಪತ್ತೆ ಹಚ್ಚಬಲ್ಲ ಪುಟ್ಟ ಶೋಧಕ, ಹಂಸ ಯುಜಿ-ಈಗಾಗಲೇ ಲಭ್ಯವಿರುವ ಹಂಸ ಸೋನಾರ್‌ನ ಮೇಲ್ದರ್ಜೆಗೇರಿಸಲಾದ ತಂತ್ರಜ್ಞಾನ, ನ್ಯಾಕ್ಸ್‌- ಸಮೀಪದ ವಸ್ತುಗಳು, ಜಲಾಂತರ್ಗಾಮಿಗಳು, ವೈರಿ ನೌಕೆಗಳನ್ನು ಪತ್ತೆ ಹಚ್ಚುವ ಸಾಧನ. ಎಐಡಿಎಸ್‌ಎಸ್‌- ಎಷ್ಟೇ ಆಳದಲ್ಲಿ ಬಹುದೂರದಲ್ಲಿ ಅಡಗಿದ್ದರೂ ವೈರಿ ಜಲಾಂತರ್ಗಾಮಿಗಳನ್ನು ಪತ್ತೆ ಹಚ್ಚುವ ಸಾಮರ್ಥ್ಯ ಹೊಂದಿದೆ. ಈ ನಾಲ್ಕು ತರಹದ ಶಬ್ದಶೋಧಕಗಳು ಭಾರತೀಯ ನೌಕಾಪಡೆಯ ಬತ್ತಳಿಕೆ ಸೇರಿವೆ. ಸೋನಾರ್‌ಗಳನ್ನು ನೌಕಾಪಡೆಗೆ ಹಸ್ತಾಂತರಿಸಿದ ರಕ್ಷಣಾ ಸಚಿವ ಮನೋಹರ್‌ ಪರಕರ್‌, ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್‌ಡಿಓ) ಮತ್ತು ಭಾರತೀಯ ಸೇನೆಯನ್ನು ಪ್ರಶಂಸಿದರು. ಮುಂಬರುವ ದಿನಗಳಲ್ಲಿ ಇಂತಹ ದೇಶಿ ತಂತ್ರಜ್ಞಾನದ ನೆರವು ಸೇನೆಗೆ ಬೇಕು ಎಂದು ತಿಳಿಸಿದರು. ಈ ಸೋನಾರ್‌ಗಳನ್ನು ಡಿಆರ್‌ಡಿಒ ಅಂಗಸಂಸ್ಥೆಯಾದ ಕೊಚ್ಚಿ ಮೂಲದ ಎನ್‌ಪಿಒಎಲ್‌ ಪ್ರಯೋಗಾಲಯ ಸಿದ್ದಪಡಿಸಿದೆ. ಈ ಹೊಸ ತಂತ್ರಜ್ಞಾನದ ಅಳವಡಿಕೆಯಿಂದ ಭಾರತದ ಜಲಸೇನೆಯ ಕಣ್ಗಾವಲು ಸಾಮರ್ಥ್ಯ ಹೆಚ್ಚಲಿದೆ. ಅದಲ್ಲದೆ ಕಠಿಣ ತಂತ್ರಜ್ಞಾನದ ಕ್ಷೇತ್ರದಲ್ಲಿ ಸ್ವಾವಲಂಬಿ ಎಂಬ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಈ ಪುಟ್ಟ ಸೋನಾರ್‌ಗಳನ್ನು ಕಡಲ ಕಿನಾರೆಯಲ್ಲಿ ಅಥವ ಕಣ್ಗಾವಲು ನೌಕೆಯಲ್ಲಿ ಅಳವಡಿಸಿದರೆ ಸಾಕು. ನೌಕಾಪಡೆಯ ಅಗತ್ಯಕ್ಕೆ ತಕ್ಕಂತೆ ಕಾರ್ಯನಿರ್ವಹಿಸಲಿವೆ. ನೀರಿನ ಮೇಲ್ಮೆ ಮತ್ತು ನೀರೊಳಗಿನ ತರಂಗಗಳು, ದ್ವನಿ ಮತ್ತು ನೀರಿನ ಆಳವನ್ನು ಕರಾರುವಕ್ಕಾಗಿ ಪತ್ತೆ ಮಾಡಲಿವೆ. ಅತ್ಯಂತ ಸುಧಾರಿತ ಶಬ್ದಶೋಧಕಐಡಿಎಸ್‌ಎಸ್‌, ಅತೀ ದೂರದಲ್ಲಿ ಸಮುದ್ರದ ಆತೀ ಆಳದಲ್ಲಿ ಠಳಾಯಿಸುತ್ತಿರುವ ಅಥವಾ ಅಡಗಿಕೊಂಡಿರುವ ವೈರಿ ಜಲಾಂತರ್ಗಾಮಿಗಳನ್ನು ಪತ್ತೆ ಹೆಚ್ಚಿ ಸೈರನ್‌ ಮೂಲಕ ರಕ್ಷಣಾ ನೌಕೆಗಳಿಗೆ ಎಚ್ಚರಿಕೆ ನೀಡಲಿದೆ.
↧
ಭಾರತೀಯ ಜಲಸೇನೆಗೆ ದೇಸಿ ಸೋನಾರ್‌ಗಳ ಬಲ
↧