ಹೊಸದಿಲ್ಲಿ: ದೇಶದ ನಾನಾ ಹೈಕೋರ್ಟ್‌ಗಳಿಗೆ ನೇಮಿಸಲು ಶಿಫಾರಸ್ಸು ಮಾಡಲಾಗಿದ್ದ ಜಜ್‌ಗಳ ಪಟ್ಟಿಯಲ್ಲಿ 43 ಹೆಸರುಗಳನ್ನು ತಿರಸ್ಕರಿಸಿದ ಕೇಂದ್ರ ಸರಕಾರದ ಕ್ರಮವನ್ನು ಸುಪ್ರೀಂಕೋರ್ಟ್‌ ತಿರಸ್ಕರಿಸಿದೆ. ಭಾರತದ ಮುಖ್ಯ ನ್ಯಾಯಮೂರ್ತಿಗಳ ನೇತೃತ್ವದ ಐದು ಸದಸ್ಯರ ಶಿಫಾರಸ್ಸು ಮಂಡಳಿ (ಕೊಲಾಜಿಯಂ) ಒಟ್ಟು 77 ಹೆಸರುಗಳನ್ನು ಶಿಫಾರಸು ಮಾಡಿತ್ತು. ''ಹೈಕೋರ್ಟ್‌ಗಳಿಗೆ ನೇಮಿಸಲು ಶಿಫಾರಸ್ಸು ಮಾಡಲಾಗಿದ್ದ ಜಜ್‌ಗಳ ಹೆಸರುಗಳ ಪಟ್ಟಿಯಿಂದ 43 ಹೆಸರುಗಳನ್ನು ಪುನರ್‌ಪರಿಶೀಲಿಸುವಂತೆ ಸರಕಾರ ಹಿಂದೆ ಕಳಿಸಿದೆ,'' ಎಂದು ಮುಖ್ಯ ನ್ಯಾಯಮೂರ್ತಿ ಟಿ.ಎಸ್‌ ಠಾಕೂರ್‌ ಮತ್ತು ನ್ಯಾಯಮೂರ್ತಿ ಎ.ಆರ್‌ ದವೆ ತಿಳಿಸಿದ್ದಾರೆ. ''ಮಂಡಳಿ ಶಿಫಾರಸ್ಸು ಮಾಡಿದ್ದ 77ಜಜ್‌ಗಳಲ್ಲಿ ಸರಕಾರ 34 ಹೆಸರುಗಳನ್ನು ಸ್ವೀಕರಿಸಿ, ಉಳಿದ 43 ಹೆಸರುಗಳ ಪಟ್ಟಿಯನ್ನು ಹಿಂದಕ್ಕೆ ಕಳಿಸಿದೆ. ಈ ಕುರಿತು ಯಾವುದೇ ಕಡತಗಳನ್ನು ಬಾಕಿ ಉಳಿಸಿಕೊಂಡಿಲ್ಲ ,''ಎಂದು ಸರಕಾರದ ಪರವಾಗಿ ಅಟಾರ್ನಿ ಜನರಲ್‌ ಮುಕುಲ್‌ ರೋಹಟಗಿ ಹೇಳಿಕೆ ನೀಡಿದ್ದಾರೆ. ಸುಪ್ರೀಂಕೋರ್ಟ್‌ ಚಳಿಗಾಲದ ರಜೆಯ ನಂತರ ಪ್ರಕರಣದ ವಿಚಾರಣೆ ನಡೆಸಲಿದೆ.
↧
ಜಜ್‌ಗಳ ನೇಮಕ ತಿರಸ್ಕಾರ: ಕೇಂದ್ರಕ್ಕೆ ಸುಪ್ರೀಂ ಅಸಮ್ಮತಿ
↧