ಇಂಡಿಯನ್‌ ನ್ಯಾಷನಲ್‌ ಡ್ರ್ಯಾಗ್‌ ರೇಸಿಂಗ್‌ ಚಾಂಪಿಯನ್‌ಷಿಪ್‌ ಬೆಂಗಳೂರು: ಅನುಭವಿ ಪ್ರತಾಪ್‌ ಜಯರಾಮ್‌ ಮತ್ತು ರಿಜ್ವಾನ್‌ ಖಾನ್‌ ಇಲ್ಲಿ ನಡೆದ ಇಂಡಿಯನ್‌ ನ್ಯಾಷನಲ್‌ ಡ್ರ್ಯಾಗ್‌ ರೇಸಿಂಗ್‌ ಚಾಂಪಿಯನ್‌ಷಿಪ್‌ನಲ್ಲಿ ಕ್ರಮವಾಗಿ ಪ್ರತ್ಯೇಕ ವಿಭಾಗಗಳಲ್ಲಿ ಚಾಂಪಿಯನ್‌ ಆಗಿದ್ದಾರೆ. ತನೆಜಾ ಏರೋಸ್ಪೇಸ್‌ ಫೆಸಿಲಿಟಿ ಆವರಣದಲ್ಲಿ ನಡೆದ ರೇಸ್‌ನ ಮೊದಲ ಸುತ್ತಿನ ಇಂಡಿಯನ್‌ ಓಪನ್‌ ಕಾರ್‌ ವಿಭಾಗದಲ್ಲಿ ಹೊಸ ಮಾರ್ಪಾಡಿನ ರೇವಾ ಕಾರಿನೊಂದಿಗೆ ಮಿಂಚಿದ ಜಯರಾಮ್‌ ಟ್ರ್ಯಾಕ್‌ನಲ್ಲಿ ಸಂಚಲನ ಮೂಡಿಸುವ ಮೂಲಕ ವಿಜಯೋತ್ಸವ ಆಚರಿಸಿದರು. ಈ ಮಧ್ಯೆ, ರಿಜ್ವಾನ್‌ ಖಾನ್‌ ಸೂಪರ್‌ ಬೈಕ್‌ ವಿಭಾಗದಲ್ಲಿ ಮೊದಲ ಸ್ಥಾನ ಅಲಂಕರಿಸುವಲ್ಲಿ ಯಶಸ್ವಿಯಾದರು. ಮೈಸೂರಿನ ಅರ್ಥೊಪೆಡಿಕ್‌ ವೈದ್ಯರಾಗಿರುವ 29 ವರ್ಷದ ರಿಜ್ವಾನ್‌, 09.746 ಸೆಕೆಂಡ್‌ಗಳಲ್ಲಿ ಮುನ್ನಡೆ ಗಳಿಸಿ ಚಾಂಪಿಯನ್‌ ಪಟ್ಟ ಗೆದ್ದರು. 1995ರಲ್ಲಿ ಕೊನೆಯದಾಗಿ ರೇಸಿಂಗ್‌ನಲ್ಲಿ ಪಾಲ್ಗೊಂಡ ನಂತರ 2010ರಲ್ಲಿ ಮತ್ತೆ ಮರಳಿದ್ದ ಜಯರಾಮ್‌ ಕೇವಲ 11.055 ಸೆಕೆಂಡ್‌ಗಳಲ್ಲಿ 400ಮೀ. ಗುರಿ ಮುಟ್ಟಿ ಮೊದಲ ಸ್ಥಾನ ಗೆದ್ದುಕೊಂಡರು. ಅತಿ ವೇಗವಾಗಿ ಗುರಿ ತಲುಪಿದರೂ ಕೊನೆಯ 50ಮೀ. ಅಂತರದಲ್ಲಿ ಕಾರಿನ ಇಂಜಿನ್‌ಗೆ ಹಾನಿಯುಂಟಾಯಿತು. ಅನಿರ್ಬಂಧಿತವಲ್ಲದ ವಿಭಾಗದಲ್ಲಿ ಬೆಂಗಳೂರಿನ ಜೊಯೆಲ್‌ ಜೋಸೆಫ್‌ 11.992 ಸೆಕೆಂಡ್‌ಗಳಲ್ಲಿ 400ಮೀ. ಗುರಿ ತಲುಪಿ ಮೊದಲ ಸ್ಥಾನ ಪಡೆದರೆ, ಪವನ್‌ ರಂಗರಾಜ್‌(1450ಸಿಸಿ), ಧೀರಜ್‌ ಎಂ.(1450ಸಿಸಿ), ಸಿದ್ಧಾರ್ಥ್‌ ಸಿನ್ಹ ಜಾಲಾ (2550ಸಿಸಿ), ವಿನೀತ್‌ ಅಭಿರಾಮ್‌ (3050ಸಿಸಿ) ವಿಭಾಗದಲ್ಲಿ ಕ್ರಮವಾಗಿ ಅಗ್ರಸ್ಥಾನ ಕಾಯ್ದುಕೊಂಡರು.
↧
ಜಯರಾಮ್‌, ರಿಜ್ವಾನ್‌ ಚಾಂಪಿಯನ್‌
↧