ಎಟಿಎಂಗಳಲ್ಲಿ ಸಿಗುತ್ತಿದೆ 500 ರೂ, ವಿತ್‌ಡ್ರಾ ಮಿತಿ ಹೆಚ್ಚಳ

ಹೊಸದಿಲ್ಲಿ: ಕೇಂದ್ರ ಸರಕಾರದ ರೂಪಾಯಿ ಚಲಾವಣೆ ರದ್ದತಿ ಕ್ರಮದಿಂದ ಹೈರಾಣಾಗಿದ್ದ ದೇಶದ ಜನತೆ ಭಾನುವಾರ ತಕ್ಕಮಟ್ಟಿಗೆ ನಿಟ್ಟುಸಿರು ಬಿಟ್ಟಿದ್ದಾರೆ. ದೇಶದ ಅನೇಕ ಭಾಗಗಳಲ್ಲಿ ಭಾನುವಾರ 500ರ ಮುಖಬೆಲೆಯ ಹೊಸ ನೋಟುಗಳು ಲಭ್ಯವಾಗಿವೆ. ಅನೇಕ ಬ್ಯಾಂಕು ಮತ್ತು ಎಟಿಎಂಗಳಿಗೆ 500ರ ನೋಟುಗಳನ್ನು ಪೂರೈಕೆ ಮಾಡಲಾಗಿದೆ ಎಂದು ಹಣಕಾಸು ಸಚಿವಾಲಯ ತಿಳಿಸಿದೆ.

ದೇಶಾದ್ಯಂತ ಭಾನುವಾರವೂ ಬ್ಯಾಂಕುಗಳು ಕಾರ್ಯಾಚರಣೆ ನಡೆಸಿವೆ. ಕಳೆದ ಎರಡು ದಿನಗಳಿಂದ ಬ್ಯಾಂಕುಗಳು ತಮ್ಮ ದಿನನಿತ್ಯದ ಕೆಲಸದ ಅವಧಿಗಳನ್ನು ಮೀರಿ ಹಗಲು ರಾತ್ರಿಯೂ ಕಾರ್ಯ ನಿರ್ವಹಿಸಿ ಗ್ರಾಹಕರ ಮೆಚ್ಚುಗೆಗೆ ಪಾತ್ರವಾಗಿವೆ. ಬಹುರಾತ್ರಿಯ ವರೆಗೂ ಸರತಿ ಸಾಲಿನಲ್ಲಿ ಕಾದು ನಿಂತ ಜನರಿಗೆ ಹಳೆಯ ನೋಟುಗಳನ್ನು ವಿನಿಮಯ ಮಾಡಿಕೊಳ್ಳಲು ಅವಕಾಶ ಮಾಡಿಕೊಟ್ಟಿವೆ. ದಿಲ್ಲಿ ಮತ್ತು ಭೋಪಾಲ್‌ನಲ್ಲಿ ಈಗಾಗಲೇ 500ರ ನೋಟುಗಳು ಎಟಿಎಂನಲ್ಲಿ ಸಿಗುತ್ತಿವೆ. ಸಂಜೆ ಹೊತ್ತಿಗೆ ಮುಂಬೈನಲ್ಲೂ ಇವು ಲಭ್ಯವಾಗಿವೆ ಎಂದು ಮೂಲಗಳು ತಿಳಿಸಿವೆ.

ಸೋಮವಾರದ ಹೊತ್ತಿಗೆ ಪರಿಸ್ಥಿತಿ ತಕ್ಕಮಟ್ಟಿಗೆ ಹತೋಟಿಗೆ ಬರುವ ಸಾಧ್ಯತೆಯಿದೆ ಎಂದು ಹಣಕಾಸು ಸಚಿವಾಲಯದ ಮೂಲಗಳು ತಿಳಿಸಿವೆ. ದೇಶದ ಇನ್ನಷ್ಟು ನಗರಗಳಿಗೆ 500 ರೂ. ಮುಖಬೆಲೆಯ ನೋಟುಗಳನ್ನು ಸರಬರಾಜು ಮಾಡಲಾಗುತ್ತದೆ ಎಂದು ಭರವಸೆ ನೀಡಲಾಗಿದೆ.

ಇನ್ನೊಂದು ಮಹತ್ವದ ಬೆಳವಣಿಗೆಯಲ್ಲಿ ವಾರಕ್ಕೆ ಕೇವಲ 20 ಸಾವಿರ ರೂ. ಮಾತ್ರ ಇದ್ದ ವಿತ್‌ಡ್ರಾ ಸೌಲಭ್ಯವನ್ನು 24000 ರೂ.ಗೆ ಏರಿಸಲಾಗಿದೆ.

ದೇಶದ ವಿವಿಧ ಭಾಗಗಳಲ್ಲಿ ಎಟಿಎಂಗಳ ಮುಂದೆ ಜನರ ಸಾಲು ಕಡಿಮೆಯಾಗದೇ ಇರುವ ಹಿನ್ನೆಲೆಯಲ್ಲಿ ಮುಂದೆ ಕೈಗೊಳ್ಳಬೇಕಾದ ಕ್ರಮಗಳ ಬಗ್ಗೆ ಹಣಕಾಸು ಸಚಿವರ ಅರುಣ್‌ ಜೇಟ್ಲಿ ಮತ್ತು ಗೃಹ ಸಚಿವ ರಾಜನಾಥ್‌ ಸಿಂಗ್‌ ಪರಿಶೀಲನೆ ನಡೆಸಿದ್ದಾರೆ.