ಕಡಂಬನ್‌ ಚಿತ್ರದ ಕತೆಯೇ ವಿಶೇಷವಾಗಿದೆಯಂತೆ. ಫಾರೆಸ್ಟ್‌ ಮಾಫಿಯಾದ ಸುತ್ತ ಕತೆ ಹೆಣೆದಿದ್ದು, ತಮಿಳಿನ ಹೆಸರಾಂತ ನಟರಾದ ಆರ್ಯ ಮುಖ್ಯಭೂಮಿಕೆಯಲ್ಲಿದ್ದಾರೆ. ಮೊದಲ ಸಿನಿಮಾದಲ್ಲೇ ಯತಿರಾಜ್‌ ಅವರಿಗೆ ವಿಭಿನ್ನ ಪಾತ್ರ ಸಿಕ್ಕಿದೆಯಂತೆ.
ಪತ್ರಕರ್ತ ಯತಿರಾಜ್‌ ನಟರಾಗಿಯೂ ಸಿನಿಮಾ ರಂಗದಲ್ಲಿ ಗುರುತಿಸಿಕೊಂಡವರು. ನೂರಕ್ಕೂ ಹೆಚ್ಚು ಚಿತ್ರಗಳಲ್ಲಿ ಅಭಿನಯಿಸಿರುವ ಇವರು, ಸದ್ಯ ತಮಿಳಿನ ಕಡಂಬನ್‌ ಚಿತ್ರದಲ್ಲಿ ನಟಿಸುತ್ತಿದ್ದಾರೆ. ಮೊನ್ನೆಯಷ್ಟೇ ಈ ಚಿತ್ರದ ತಮ್ಮ ಪಾತ್ರಕ್ಕೆ ತಾವೇ ಡಬ್‌ ಮಾಡಿರುವ ಯತಿರಾಜ್‌, ಡಬ್ಬಿಂಗ್‌ ಕಾರ‍್ಯಕ್ಕಾಗಿ ಹೋಗಿದ್ದು ಕಬಾಲಿಯ ಡಬ್ಬಿಂಗ್‌ ನಡೆದ ಸ್ಟುಡಿಯೋಗೆ. ಆ ಅನುಭವನ್ನು ಅವರು ಹಂಚಿಕೊಂಡಿದ್ದು ಹೀಗೆ, ‘ನಾನು ಡಬ್ಬಿಂಗ್‌ ಮುಗಿಸಿ, ಸ್ಟುಡಿಯೋದಿಂದ ಆಚೆ ಬರುವ ತನಕ ಅಲ್ಲಿ ಕಬಾಲಿ ಚಿತ್ರಕ್ಕೆ ಡಬ್ಬಿಂಗ್‌ ಆಗಿದ್ದ ವಿಷಯ ಗೊತ್ತಿರಲಿಲ್ಲ. ಅಲ್ಲದೇ ರಜನೀಕಾಂತ್‌ ಅವರು ಯಾವ ಕುರ್ಚಿಯಲ್ಲಿ ಕೂತು ಮಾತಿನ ಮರುಲೇಪನ ಮಾಡಿದ್ದರೋ, ನಾನೂ ಅದೇ ಕುರ್ಚಿಯಲ್ಲೇ ಕೂತಿದ್ದೆ ಅನ್ನುವುದು ಕೇಳಿ ಥ್ರಿಲ್‌ ಆದೆ. ಯಾವತ್ತಿಗೂ ಈ ಸನ್ನಿವೇಶ ನನ್ನ ಮನದಲ್ಲಿ ಉಳಿಯುತ್ತದೆ’ ಅಂತಾರೆ.