ಲಂಡನ್‌: ಉದ್ಯಮ, ವಾಣಿಜ್ಯ ವಹಿವಾಟು, ಸಂಶೋಧನೆ, ಸಂಸ್ಕೃತಿಗೆ ಸಂಬಂಧಿಸಿದಂತೆ ಸಮೀಕ್ಷೆ ನಡೆಸಿ ಗ್ಲೋಬಲ್‌ ಪವರ್‌ ಸಿಟಿ ಇಂಡೆಕ್ಸ್‌(ಜಿಪಿಸಿಐ) ಅನ್ನು ರೂಪಿಸಲಾಗಿದ್ದು, ಈ ಪಟ್ಟಿಯಲ್ಲಿ ಲಂಡನ್‌ ನಗರವು ಮೊದಲ ಸ್ಥಾನದಲ್ಲಿದೆ. ಸತತ ಐದು ವರ್ಷಗಳಿಂದ ಮೊದಲ ಸ್ಥಾನವನ್ನು ಕಾಯ್ದುಕೊಂಡಿದೆ. ಇತ್ತ 39ನೇ ರಾರ‍ಯಂಕ್‌ ಅನ್ನು ಮುಂಬಯಿ ಪಡೆದಿದ್ದು, ಭಾರತದ ಪೈಕಿ ಈ ಪಟ್ಟಿಯಲ್ಲಿರುವ ಏಕೈಕ ನಗರ ಎನ್ನುವ ಹೆಗ್ಗಳಿಕೆಗೆ ಪಾತ್ರವಾಗಿದೆ. ಜಿಪಿಸಿಐ ವರದಿಯನ್ನು ಮೋರಿ ಮೆಮೊರಿಯಲ್‌ ಫೌಂಡೇಶನ್ಸ್‌ ಸಂಸ್ಥೆ ಮಂಗಳವಾರ ಬಿಡುಗಡೆ ಮಾಡಿದ್ದು, ವಿಶ್ವದ 42 ಪ್ರಮುಖ ನಗರಗಳಿಗೆ ರಾರ‍ಯಂಕ್‌ಗಳನ್ನು ನೀಡಿದೆ. ನಗರಗಳಲ್ಲಿನ ಹಣಕಾಸು, ಸಂಶೋಧನೆ- ಅಭಿವೃದ್ಧಿ, ಸಂಸ್ಕೃತಿ, ಪರಿಸರ, ಸಂಪನ್ಮೂಲ ಲಭ್ಯತೆ ಮತ್ತು ಜನಜೀವನ ಎನ್ನುವ ಮೂರು ಪ್ರಮುಖಾಂಶಗಳನ್ನು ಪರಾಮರ್ಶಿಸಿ ರಾರ‍ಯಂಕ್‌ಗಳನ್ನು ನೀಡಲಾಗುತ್ತದೆ. ಬ್ರಿಟನ್‌ನ ರಾಜಧಾನಿಯಾದ ಲಂಡನ್‌ನಲ್ಲಿ ಬಲವಾದ ಸಾಂಸ್ಕೃತಿಕ ಪರಂಪರೆಯಿದೆ, ವಾಣಿಜ್ಯ ವಹಿವಾಟಿಗೆ ಉತ್ತಮ ನೆಲೆಯಿದೆ ಅಲ್ಲದೇ ಜಾಗತಿಕವಾಗಿ ಸಾರಿಗೆ ಸಂಪರ್ಕ ವ್ಯವಸ್ಥಿತವಾಗಿದೆ ಎಂದು ವರದಿಯಲ್ಲಿ ಹೇಳಲಾಗಿದೆ. 2012ರಲ್ಲಿ ಒಲಿಂಪಿಕ್ಸ್‌ ಮತ್ತು ಪ್ಯಾರಾಲಿಂಪಿಕ್‌ ಕ್ರೀಡಾಕೂಟವನ್ನು ಯಶಸ್ವಿಯಾಗಿ ನಡೆಸಿದ ಲಂಡನ್‌ ಆ ವರ್ಷದಿಂದ ಈ ತನಕ ಮೊದಲ ಸ್ಥಾನದಲ್ಲಿದೆ. ನ್ಯೂಯಾರ್ಕ್‌, ಟೋಕಿಯೊ, ಪ್ಯಾರಿಸ್‌ ನಗರಗಳು ನಂತರದ ಸ್ಥಾನದಲ್ಲಿವೆ.
↧
ಗ್ಲೋಬಲ್‌ ಪವರ್‌ ಸಿಟಿ ಇಂಡೆಕ್ಸ್‌: ಮುಂಬಯಿಗೆ 39ನೇ ರಾಂಕ್
↧