-ಹರೀಶ್‌ಬಸವರಾಜ್‌
ಕನ್ನಡ ಚಿತ್ರರಂಗ ಮಾತ್ರವಲ್ಲದೆ ಇಡೀ ರಾಜ್ಯ ‘ಜಾಗ್ವಾರ್’ ಚಿತ್ರಕ್ಕಾಗಿ ಎದುರು ನೋಡುತ್ತಿತ್ತು. ಮಾಜಿ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಪುತ್ರನ ಸಿನಿಮಾ ಎನ್ನುವ ಕಾರಣಕ್ಕೆ ಹೆಚ್ಚು ಹವಾ ಸೃಷ್ಟಿಸಿತ್ತು. ವೈದ್ಯ ಲೋಕದ ಕರಾಳ ಮುಖ ಬಿಚ್ಚಿಡುವ ಚಿತ್ರ ಪಕ್ಕಾ ಕಮರ್ಷಿಯಲ್‌ ಆಗಿ ಮೂಡಿ ಬಂದಿದೆ. ಲಾಜಿಕ್‌ಗಳಿಗೆ ಆಸ್ಪದವಿಲ್ಲದ ಕಥೆಯಲ್ಲಿ ಅಬ್ಬರ ಜೋರಾಗಿದೆ.
ಒಂದು ಕೊಲೆಯನ್ನು ಲೈವ್‌ ಆಗಿ ತೋರಿಸುವುದರಿಂದ ಆರಂಭವಾಗುವ ಸಿನಿಮಾ ಕೊನೆಯಾಗುವುದು ಸಹ ಸುದ್ದಿವಾಹಿನಿಯ ಲೈವ್‌ನಲ್ಲಿಯೇ. ಖಾಸಗಿ ಸುದ್ದಿ ವಾಹಿನಿಯ ಸಿಸ್ಟಮ್‌ ಹ್ಯಾಕ್‌ ಮಾಡಿ ಮಾಡುವ ಕೊಲೆಯನ್ನು ನೇರವಾಗಿ ಟೆಲೆಕಾಸ್ಟ್‌ ಆಗುವಂತೆ ಮಾಡುವ ಜಾಗ್ವಾರ್, ಕಟ್‌ ಮಾಡಿದರೆ ಮುಂದಿನ ದೃಶ್ಯದಲ್ಲಿ ಮೆಡಿಕಲ್‌ ವಿದ್ಯಾರ್ಥಿಯಾಗಿ ನಿಂತಿರುತ್ತಾನೆ.
ಕಾಲೇಜ್‌ನಲ್ಲಿ ಲವಲವಿಕೆಯಿಂದ ಓಡಾಡಿಕೊಂಡಿರುವ ಕೃಷ್ಣ, ಯಾರೇ ಹೆಸರು ಕೇಳಿದರೆ ನಾನೊಬ್ಬ ಅನಾಥ ಎಂದು ಹೇಳುತ್ತಾನೆ. ಹೀಗೆ ಹೇಳಿಕೊಂಡೇ ಕಾಲೇಜಿನ ವಿದ್ಯಾರ್ಥಿ ನಾಯಕನ ತಂಗಿಯನ್ನು ಪ್ರೇಮದಲ್ಲಿ ಬೀಳಿಸಿಕೊಳ್ಳುತ್ತಾನಲ್ಲದೆ, ಆಗಾಗ ಜಾಗ್ವಾರ್ ಆಗಿ ಕಿಕ್‌ ಕೊಡುತ್ತಾನೆ. ಇಡೀ ಸಿನಿಮಾದ ಮುಕ್ಕಾಲು ಭಾಗ ಮೆಡಿಕಲ್‌ ಕಾಲೇಜ್‌ನಲ್ಲಿ ಸಾಗಿದರೂ, ಒಂದೇ ಒಂದು ಕ್ಲಾಸ್‌ ನಡೆಯವುದಿಲ್ಲ ಅನ್ನೋದೇ ಸೋಜಿಗ.
ಪ್ರತಿ ಕಾಲೇಜ್‌ನಲ್ಲಿರುವಂತೆ ಇಲ್ಲಿಯೂ ಒಬ್ಬ ಕೆಟ್ಟ ಸ್ಟೂಡೆಂಟ್‌ ಇರುತ್ತಾನೆ. ಅವನೋ ಕಾಲೇಜ್‌ ಚೇರ್ಮನ್‌ರ ಮಗ. ಹುಡುಗಿಯರನ್ನು ಹಿಂಸಿಸಿ ವಿಕೃತ ಆನಂದ ವಿಕೃತಿ ಇವನು. ವಿದ್ಯಾರ್ಥಿಗಳು ಆಡಳಿತ ಮಂಡಳಿ ವಿರುದ್ಧ ಸಿಡಿದೇಳಲಿ ಎನ್ನುವ ಕಾರಣಕ್ಕೆ ನಾಯಕ ಕೃಷ್ಣ ಹೆಲ್ಮೆಟ್‌ ಹಾಕಿಕೊಂಡು ಬಂದು ಚೇರ್ಮನ್‌ ಮಗಳನ್ನು ಲೈಂಗಿಕವಾಗಿ ಹಿಂಸಿಸುತ್ತಾನೆ. ಇವನ ಪ್ಲಾನ್‌ ವರ್ಕೌಟ್‌ ಆಗಿ ವಿದ್ಯಾರ್ಥಿಗಳು ಮ್ಯಾನೇಜ್‌ಮೆಂಟ್‌ ವಿರುದ್ಧ ತಿರುಗಿ ಬೀಳುತ್ತಾರೆ.
ಸಿನಿಮಾ ಮೇಕಿಂಗ್‌ ಅದ್ಧೂರಿಯಾಗಿದೆ. ವಿಜಯೇಂದ್ರ ಪ್ರಸಾದ್‌ ಅವರ ಕಥೆಗೆ ಇನ್ನಷ್ಟು ವೇಗದ ಅವಶ್ಯಕತೆ ಇತ್ತು. ನಾಯಕ ನಟ ನಿಖಿಲ್‌ ಕುಮಾರ್‌ ನೃತ್ಯ ಮತ್ತು ಆ್ಯಕ್ಷನ್‌ ದೃಶ್ಯಗಳಲ್ಲಿ ಪರ್ಫೆಕ್ಟ್. ನಟನೆಯಲ್ಲಿ ಪಳಗಬೇಕಿದ್ದರೂ ಮೊದಲ ಸಿನಿಮಾದಲ್ಲೇ ಉತ್ತಮ ಪ್ರದರ್ಶನ ನೀಡಿದ್ದಾರೆ. ಡಬಲ್‌ ಶೇಡ್‌ನಲ್ಲಿ ಕಷ್ಟಪಟ್ಟು ನಟಿಸಿದ್ದಾರೆ. ಕ್ಯಾಮೆರಾ ಕೆಲಸ ಅಚ್ಚುಕಟ್ಟಾಗಿದೆ. ನಾಯಕಿ ದೀಪ್ತಿ ಸತಿ ಪರವಾಗಿಲ್ಲ. ಗ್ಲಾಮರ್‌ ಲುಕ್‌ನಲ್ಲಿ ನೋಡಿದರೆ ಸೂಪರ್. ಥಮನ್‌ ಸಂಗೀತದಲ್ಲಿ ಬಂದಿರುವ ಹಾಡುಗಳಲ್ಲಿ ತೆಲುಗಿನ ಛಾಯೆ ಇದೆ. ಜಗಪತಿ ಬಾಬು, ಸಂಪತ್‌ಕುಮಾರ್‌, ಆದಿತ್ಯ ಮೆನನ್‌ ತಮಗೊಪ್ಪಿಸಿದ ಕೆಲಸವನ್ನು ಅಚ್ಚುಕಟ್ಟಾಗಿ ನಿರ್ವಹಿಸಿದ್ದಾರೆ. ಹಾಗೆ ಬಂದು ಹೀಗೆ ಹೋಗುವ ರಮ್ಯಕೃಷ್ಣ ಗಮನ ಸೆಳೆಯುತ್ತಾರೆ. ಇನ್ನು ಭಜರಂಗಿ ಲೋಕಿ ಇಲ್ಲೂ ತಮ್ಮ ಅಬ್ಬರದ ನಟನೆಯನ್ನು ಮುಂದುವರಿಸಿದ್ದಾರೆ. ಆ್ಯಕ್ಷನ್‌ ಪ್ರಿಯರಿಗೆ ‘ಜಾಗ್ವಾರ್’ ಒಂದೊಳ್ಳೆ ರಸದೌತಣ ಎನ್ನಬಹುದು.
ಸ್ವತಃ ಸುದ್ದಿ ವಾಹಿನಿ ಹೊಂದಿರುವ ನಿರ್ಮಾಪಕರ ಈ ಚಿತ್ರದಲ್ಲಿ ಸುದ್ದಿ ವಾಹಿನಿಗಳು ಟಿಆರ್‌ಪಿಗಾಗಿ ಏನು ಬೇಕಾದರೂ ಮಾಡುತ್ತವೆ ಎಂದು ಹೇಳಿಸಿರುವುದು ಹೆಚ್ಚು ಗಮನ ಸೆಳೆಯುತ್ತದೆ!
ಕನ್ನಡ ಸಿನಿಮಾ: ಜಾಗ್ವಾರ್