ಪಿಎಫ್ ವಾಪಸ್: ಉದ್ಯೋಗದಾತರ ಹಂಗಿಲ್ಲ

ಪಿಎಫ್ ಹಿಂಪಡೆಯಲು ಯುಎಎನ್ ಜತೆ ಅರ್ಜಿ ಸಲ್ಲಿಸಿದರೆ ಸಾಕು / ಸದ್ಯದಲ್ಲೇ ಆನ್‌ಲೈನ್ ಸೇವೆ

ಹೊಸದಿಲ್ಲಿ: ಭವಿಷ್ಯ ನಿಧಿ(ಪಿಎಫ್) ಹಣ ಹಿಂಪಡೆಯುವುದು ಬಹುತೇಕ ಉದ್ಯೋಗಿಗಳಿಗೆ ತ್ರಾಸದಾಯಕ ಕೆಲಸವಾಗಿ ಪರಿಣಮಿಸಿದೆ. ಏಕೆಂದರೆ, ಹಣ ವರ್ಗಾವಣೆ ಅಥವಾ ಹಿಂಪಡೆತಕ್ಕೆ ಉದ್ಯೋಗದಾತರ ದೃಢೀಕರಣ ಅಗತ್ಯ. ಈ ಪ್ರಕ್ರಿಯೆಗಳು ಕಿರಿಕಿರಿ ಮತ್ತು ದೀರ್ಘವಾಗಿದ್ದು, ಉದ್ಯೋಗಿ-ಸ್ನೇಹಿಯಾಗಿಲ್ಲ. ಇದೆಲ್ಲವನ್ನೂ ಮುಗಿಸಿ ಹಣ ಕೈಸೇರುವ ಹೊತ್ತಿಗೆ ‘ಸಾಕಪ್ಪಾ ಸಾಕು’ ಅನ್ನಿಸಿ ಬಿಡುತ್ತದೆ. ಆದರೆ, ಆ ತಲೆನೋವು ಇನ್ನಿಲ್ಲ.

ಪಿಎಫ್ ಹಿಂತೆಗೆತದ ವಿಧಾನವನ್ನು ಉದ್ಯೋಗಿಗಳ ಭವಿಷ್ಯ ನಿಧಿ ಸಂಸ್ಥೆ(ಇಪಿಎಫ್‌ಒ) ಈಗ ಸರಳಗೊಳಿಸಿದೆ. ಅಂದರೆ, ಯುಎಎನ್ ಸಂಖ್ಯೆ(ಯುನಿವರ್ಸಲ್ ಅಕೌಂಟ್ ನಂಬರ್) ಇದ್ದರೆ ಪಿಎಫ್ ಹಿಂತೆಗೆತಕ್ಕೆ ಉದ್ಯೋಗದಾತರ ಸಹಿಯ ಅಗತ್ಯ ಇರುವುದಿಲ್ಲ. ಇದಕ್ಕಾಗಿ ಹೊಸ ಅರ್ಜಿಯನ್ನು(ಫಾರಂ 19) ಬಳಸಬೇಕಾಗುತ್ತದೆ.

ಯುಎಎನ್ ಸಕ್ರಿಯವಾಗಿರುವ, ಅಲ್ಲದೇ ಬ್ಯಾಂಕ್ ಖಾತೆ ಮತ್ತು ಆಧಾರ್ ಸಂಖ್ಯೆಯಂಥ ಕೆವೈಸಿ ಮಾಹಿತಿಗಳನ್ನು ದಾಖಲಿಸಿರುವ ಪಿಎಫ್ ಸದಸ್ಯರಿಗೆ ಪಿಎಫ್ ಹಿಂಪಡೆತದ ಸರಳ ವ್ಯವಸ್ಥೆ ನೆರವಿಗೆ ಬರಲಿದೆ. ಪ್ರಸ್ತುತ ಈ ಅರ್ಜಿಯನ್ನು ಆಫ್‌ಲೈನ್‌ನಲ್ಲಿ ಮಾತ್ರ ಸಲ್ಲಿಸಲು ಅವಕಾಶವಿದೆ. ಆದರೆ, ಆನ್‌ಲೈನ್‌ನಲ್ಲೇ ಈ ಪ್ರಕ್ರಿಯೆ ಪೂರ್ಣಗೊಳಿಸುವ ವ್ಯವಸ್ಥೆ ಸದ್ಯದಲ್ಲೇ ಜಾರಿಗೆ ಬರುವ ನಿರೀಕ್ಷೆ ಇದೆ.

ಇಪಿಎಫ್ ಕಾಯ್ದೆ ಪ್ರಕಾರ, ಉದ್ಯೋಗಿಯು ಪಿಎಫ್ ಸೆಟಲ್‌ಮೆಂಟ್ ಮಾಡಿಕೊಳ್ಳಬೇಕಾದರೆ, ಆತನಿಗೆ 55 ವರ್ಷ ಆಗಿರಬೇಕು. ಆಗ ಉದ್ಯೋಗಿ ಮತ್ತು ಉದ್ಯೋಗದಾತರು ಪಾವತಿಸಿರುವ ಹಣ ಮತ್ತು ಅದಕ್ಕೆ ಬಂದಿರುವ ಬಡ್ಡಿ ಸೇರಿದಂತೆ ಒಟ್ಟು ಹಣವನ್ನು ಪಡೆಯಬಹುದು. ಆದಾಗ್ಯೂ, ನಿವೃತ್ತಿ ಸಮೀಪಿಸಿದ ಸಂದರ್ಭದಲ್ಲಿ ಭಾಗಶಃ ಹಣವನ್ನು ಹಿಂಪಡೆಯಲು ಅವಕಾಶವಿದೆ. 54 ವರ್ಷ ಪೂರ್ಣಗೊಂಡಿದ್ದ ಪಕ್ಷದಲ್ಲಿ ಯಾರೇ ಆದರೂ ತಮ್ಮ ಪಿಎಫ್ ಹಣ ಮತ್ತು ಅದಕ್ಕೆ ಬಂದಿರುವ ಬಡ್ಡಿಯಲ್ಲಿ ಶೇ.90ರಷ್ಟು ಮೊತ್ತವನ್ನು ಹಿಂಪಡೆಯಬಹುದಾಗಿದೆ.

55 ವರ್ಷಕ್ಕೆ ಮುನ್ನ ಪಿಎಫ್ ಹಿಂಪಡೆಯಬಹುದಾ?

55 ವರ್ಷಕ್ಕೆ ಮುನ್ನವೇ ಉದ್ಯೋಗ ತೊರೆದರೆ ಹೇಗೆ ಎನ್ನುವ ಪ್ರಶ್ನೆ ಸಹಜ. ನಿಯಮಗಳ ಅನುಸಾರ - ಕೆಲವು ಸಂದರ್ಭಗಳಲ್ಲಿ, ಅಂದರೆ ಉದ್ಯೋಗ ತೊರೆದ 60 ದಿನಗಳ ನಂತರ ಪೂರ್ತಿ ಪಿಎಫ್ ಹಣ ಹಿಂಪಡೆಯಬಹುದಾಗಿದೆ.

ಕೆಲಸಗಾರರು ತಮ್ಮ ವೃತ್ತಿ ಬದುಕಿನಲ್ಲಿ ಉದ್ಯೋಗ ತೊರೆದ ನಂತರ ಅವರಿಗೆ ಎರಡು ಆಯ್ಕೆಗಳು ಇರುತ್ತವೆ. ಉದ್ಯೋಗ ತೊರೆದ 60 ದಿನಗಳ ನಂತರ ಪಿಎಫ್ ವಾಪಸ್ ಪಡೆಯಬಹುದು, ಇಲ್ಲವೇ ಹೊಸ ಕೆಲಸದ ಖಾತೆಗೆ ಪಿಎಫ್ ಹಣವನ್ನು ವರ್ಗಾಯಿಸಬಹುದು.

ತೆರಿಗೆ ಕಟ್ಟಬೇಕಾ?

ಉದ್ಯೋಗಿಯು ಸತತ 5 ವರ್ಷ ಸೇವೆಯನ್ನು ಮುಂದುವರಿಸಿದ್ದ ಪಕ್ಷದಲ್ಲಿ, ಆತ ಹಿಂಪಡೆಯುವ ಪಿಎಫ್ ಹಣಕ್ಕೆ ತೆರಿಗೆ ಅನ್ವಯವಾಗದು. ಉದ್ಯೋಗಿಯ ನಿರಂತರ ಸೇವೆಯು 5 ವರ್ಷದೊಳಗೆ ಇದ್ದರೇ, ತೆರಿಗೆ ಕಟ್ಟದೇ ವಿಧಿಯಿಲ್ಲ. ಉದ್ಯೋಗಿಯ ಕೊಡುಗೆ ಮತ್ತು ಅದಕ್ಕೆ ಬಂದಿರುವ ಬಡ್ಡಿಗೆ ತೆರಿಗೆಯನ್ನು ವಿಧಿಸಲಾಗುತ್ತದೆ. ಸೆಕ್ಷನ್ 80ಸಿ ಅನ್ವಯ ಪಿಎಫ್ ಹಣವನ್ನು ಘೋಷಿಸಬೇಕಾಗುತ್ತದೆ.

ಒಂದು ಉದ್ಯೋಗ ತೊರೆದು ಮತ್ತೊಂದು ಕಂಪನಿ ಸೇರಿದಾಗಲೂ ಪಿಎಫ್ ವರ್ಗಾವಣೆಯನ್ನು ನಿರಂತರ ಸೇವೆ ಎಂದೇ ಪರಿಗಣಿಸಲಾಗುತ್ತದೆ.

ಪಿಎಫ್ ಹಿಂಪಡೆತದ ವೇಳೆ ಮೂಲದಲ್ಲೇ ತೆರಿಗೆ ಕಡಿತ(ಟಿಡಿಎಸ್) ಮಾಡುವ ಸರಕಾರದ ನೀತಿಯು, ಮಧ್ಯದಲ್ಲೇ ಹಣ ಪಡೆಯುವ ಸದಸ್ಯರಿಗೆ ತೊಡಕಾಗಿದೆ. ಸುದೀರ್ಘ ಉಳಿತಾಯಕ್ಕೆ ಇದು ಉತ್ತೇಜನ ನೀಡುವಂತಿದೆ. 5 ವರ್ಷಗಳ ನಿರಂತರ ಸೇವೆ ಸಲ್ಲಿಸಿದ ಉದ್ಯೋಗಿಯು ಪಿಎಫ್ ಹಿಂಪಡೆದರೆ/ವರ್ಗಾಯಿಸಿದರೆ ತೆರಿಗೆ ಅನ್ವಯವಾಗದು.

2016ರ ಜೂನ್ 1ರಿಂದ ಟಿಡಿಎಸ್ ಮಿತಿಯನ್ನು ವಿಸ್ತರಿಸಲಾಗಿದೆ. ಅಂದರೆ, ಹಿಂಪಡೆಯುವ ಪಿಎಫ್ ಮೊತ್ತವನ್ನು 30,000ದಿಂದ 50,000 ರೂ.ಗೆ ಏರಿಸಲಾಗಿದೆ. ಶೇ.10ರಷ್ಟು ಟಿಡಿಎಸ್ ಅನ್ವಯವಾಗುತ್ತದೆ. ಆದಾಗ್ಯೂ, ಫಾರಂ 15ಜಿ ಅಥವಾ 15ಎಚ್ ಸಲ್ಲಿಸಿದರೆ, ಟಿಡಿಎಸ್ ಕಡಿತ ಮಾಡುವುದಿಲ್ಲ.