68 ದಿನ ಉಪವಾಸ ಮಾಡಿ ಪ್ರಾಣಬಿಟ್ಟ 13 ವರ್ಷದ ಬಾಲಕಿ

ಹೈದರಾಬಾದ್‌: ಜೈನರ ಪವಿತ್ರ ಚೌವ್‌ಮಾಸದಲ್ಲಿ ಉಪವಾಸ ವ್ರತ ಕೈಗೊಂಡಿದ್ದ ಹೈದರಾಬಾದ್‌ನ 13 ವರ್ಷದ ಬಾಲಕಿ ಕಳೆದ ವಾರ ಕೊನೆಯುಸಿರೆಳೆದಿದ್ದಾಳೆ.

8ನೇ ತರಗತಿ ವಿದ್ಯಾರ್ಥಿನಿ ಆರಾಧಾನಾಳನ್ನು ಕೆಲ ದಿನಗಳ ಹಿಂದೆ ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಹೃದಯಾಘಾತದಿಂದ ಮೃತಪಟ್ಟಳು ಎಂದು ಕುಟುಂಬ ಸದಸ್ಯರು ತಿಳಿಸಿದ್ದಾರೆ.

ಆರಾಧಾನಾಳನ್ನು 'ಬಾಲ ತಪಸ್ವಿ' ಎಂದು ಜನ ಕೊಂಡಾಡುತ್ತಿದ್ದು, ಆಕೆಯ ಅಂತ್ಯಕ್ರಿಯೆಯಲ್ಲಿ 600ಕ್ಕೂ ಹೆಚ್ಚು ಮಂದಿ ಪಾಲ್ಗೊಂಡಿದ್ದರು. ಅಂತಿಮೆ ಯಾತ್ರೆಯನ್ನು 'ಶೋಭಾ ಯಾತ್ರೆ' ಎಂದು ಕರೆಯಲಾಯಿತು ಎಂದು ಎನ್‌ಡಿಟಿವಿ ವರದಿ ಮಾಡಿದೆ.

ಶಾಲೆ ಬಿಟ್ಟು, ಉಪವಾಸ ಕುಳಿತುಕೊಳ್ಳಲು ಬಾಲಕಿಗೆ ಅವರು ಕುಟುಂಬದವರು ಅನುಮತಿ ನೀಡಿದ್ದೇಕೆ ಎಂಬ ಪ್ರಶ್ನೆ ಹುಟ್ಟಿದೆ. ಸಿಕಿಂದರಾಬಾದ್‌ನಲ್ಲಿ ಆರಾಧಾನಾ ಕುಟುಂಬ ಆಭರಣ ಮಳಿಗೆ ಹೊಂದಿದೆ.

'ಈ ಹಿಂದೆ ಆರಾಧಾನಾ 41 ದಿನಗಳ ಕಾಲ ಉಪವಾಸ ಮಾಡಿದ್ದಳು' ಎಂದು ಕುಟುಂಬದ ಆಪ್ತರು ಹೇಳಿದ್ದಾರೆ.

'ಅನ್ನ, ನೀರು ಬಿಟ್ಟು ಉಪವಾಸ ಮಾಡುವ ಕ್ರಮ ಇದೆ. ಧಾರ್ಮಿಕ ಮುಖಂಡರು, ಸಮುದಾಯದ ಸಭೆಗಳಲ್ಲಿ ಇಂಥ ವಿಷಯಗಳನ್ನು ವೈಭವೀಕರಿಸಲಾಗುತ್ತದೆ. ಉಡುಗೊರೆಗಳ ಸುರಿಮಳೆಯಾಗುವುದು. ದೊಡ್ಡವರು ಉಪವಾಸ ಮಾಡುವುದು ಬೇರೆ. ಆದರೆ, ಆರಾಧಾನಾ ಬಹಳ ಚಿಕ್ಕವಳು. ಹಾಗಾಗಿ ಈ ಬಗ್ಗೆ ಆಕ್ಷೇಪವಿದೆ. ಕೊಲೆ ಅಲ್ಲದಿದ್ದರೂ ಇದು ಆತ್ಮಹತ್ಯೆ,'ಎಂದು ಸಮುದಾಯದ ಲತಾ ಜೈನ್‌ ಹೇಳಿದ್ದಾರೆ.

Jain Girl Dies: A 13-year-old girl in Hyderabad died last week after fasting for 68 days as per Jain rituals during the holy period of 'Chaumasa'.