ಸೆನ್ಸೆಕ್ಸ್‌ 115 ಅಂಕ ಪತನ

ಮುಂಬಯಿ: ಮುಂಬಯಿ ಷೇರು ಮಾರುಕಟ್ಟೆಯಲ್ಲಿ ಕರಡಿ ಕುಣಿತ ಮುಂದುವರಿದಿದ್ದು, ಗುರುವಾರ ಸೆನ್ಸೆಕ್ಸ್‌ 115 ಅಂಕ ಪತನವಾಯಿತು. ಐರೋಪ್ಯ ಮಾರುಕಟ್ಟೆಯಲ್ಲಿ ದುರ್ಬಲ ವಹಿವಾಟು ನಕಾರಾತ್ಮಕ ಪ್ರಭಾವ ಬೀರಿತು. ಇತ್ತೀಚೆಗೆ ಸೆನ್ಸೆಕ್ಸ್‌ ಏರುಗತಿಯಲ್ಲಿದ್ದ ಕಾರಣ ಹೂಡಿಕೆದಾರರು ಷೇರು ವಿಕ್ರಯದ ಮೂಲಕ ಲಾಭ ಗಳಿಸಲು ಮುಂದಾಗಿದ್ದ ಪರಿಣಾಮ ಸೂಚ್ಯಂಕ ಇಳಿಯಿತು. ಸೆನ್ಸೆಕ್ಸ್‌ 28,106ಕ್ಕೆ ದಿನದ ವಹಿವಾಟು ಮುಕ್ತಾಯಗೊಳಿಸಿದರೆ, ನಿಫ್ಟಿ 34 ಅಂಕ ಕಳೆದುಕೊಂಡು 8,709ಕ್ಕೆ ಸ್ಥಿರವಾಯಿತು.

ರಿಯಾಲ್ಟಿ ವಲಯದ ಷೇರುಗಳು ಅತಿ ಹೆಚ್ಚು ನಷ್ಟಕ್ಕೀಡಾಯಿತು. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು 243 ಕೋಟಿ ರೂ. ಮೌಲ್ಯದ ಷೇರುಗಳನ್ನು ಬುಧವಾರ ಮಾರಾಟ ಮಾಡಿದ್ದರು.