ಹೊಸದಿಲ್ಲಿ: ದೊಡ್ಡ ಮೊತ್ತದ ಟ್ಯಾಕ್ಸಿ ಬಿಲ್‌ಗಳನ್ನು ತಗ್ಗಿಸುವ ನಿಟ್ಟಿನಲ್ಲಿ ಜನಪ್ರಿಯ ಓಲಾ ಮತ್ತು ಉಬರ್‌ ಸೇವೆ ಬಳಸಲು ಸರಕಾರದ ಇಲಾಖೆಗಳು ಮತ್ತು ಸಾರ್ವಜನಿಕ ವಲಯದ ಘಟಕಗಳು(ಪಿಎಸ್‌ಯು) ಮುಂದಾಗಿವೆ. ಈ ಸೇವೆ ಸದ್ಯದಲ್ಲೇ ಜಾರಿಗೆ ಬರಲಿದೆ. ಸರಕಾರಿ ಅಧಿಕಾರಿಗಳ ಪ್ರಯಾಣದ ಅಗತ್ಯಗಳನ್ನು ಪೂರೈಸಲು ಮತ್ತು ಕಡಿಮೆ ದರದಲ್ಲಿ ಸೇವೆ ಒದಗಿಸುವುದಾಗಿ ಓಲಾ ಮತ್ತು ಉಬರ್‌ ಭರವಸೆ ನೀಡಿದ್ದು, ಸರಕಾರದ ಇ-ಮಾರುಕಟ್ಟೆ(ಜಿಇಎಂ) ಜಾಲತಾಣದಲ್ಲಿ ನೋಂದಣಿ ಮಾಡಿಕೊಂಡಿವೆ. ಇದರ ಜತೆಗೆ ನಾನಾ ಪಿಎಸ್‌ಯುಗಳ ಜತೆ ಮಾತುಕತೆ ನಡೆಸಿದ್ದು, ಕಾರ್ಪೊರೆಟ್‌ ಮಾದರಿಯಲ್ಲಿ ತನ್ನ ಸೇವೆ ಒದಗಿಸುವುದಾಗಿ ಹೇಳಿವೆ. ಉಬರ್‌, ಓಲಾ ಸೇವೆ ಪಡೆಯುವ ಮೂಲಕ ನಾನಾ ಇಲಾಖೆಗಳು ತಿಂಗಳಿಗೆ ಟ್ಯಾಕ್ಸಿಯೊಂದಕ್ಕೆ ಕನಿಷ್ಠ 40,000 ರೂ. ಉಳಿಸುವ ಅವಕಾಶವಿದೆ ಎನ್ನುವುದು ಸರಕಾರದ ಲೆಕ್ಕಾಚಾರ. ಎರಡನೇಯದಾಗಿ ಸಂದರ್ಭನುಸಾರ ದಿಢೀರ್‌ ಬೆಲೆ ಹೆಚ್ಚಿಸುವುದಿಲ್ಲ ಎಂದು ಉಬರ್‌ ಮತ್ತು ಓಲಾ ಭರವಸೆ ನೀಡಿವೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕೇಂದ್ರ ಸಚಿವರು, ಇಲಾಖೆಗಳಿಗೆ ಸರಕು ಮತ್ತು ಸೇವೆ ಒದಗಿಸಲು ಕಳೆದ ತಿಂಗಳಷ್ಟೆ ಜಿಇಎಂ ಜಾಲತಾಣ ಆರಂಭಗೊಂಡಿದೆ. ಇಲ್ಲಿ ಅಗತ್ಯ ಸರಕುಗಳನ್ನು ಸರಕಾರಿ ಇಲಾಖೆಗಳು ಖರೀದಿಸಬಹುದಾಗಿದ್ದು, ಪಾರದರ್ಶಕ ವ್ಯವಸ್ಥೆಯಿದೆ. ಇಲ್ಲಿನ ಸೇವೆಗಳ ಪಟ್ಟಿಯಲ್ಲಿ ಉಬರ್‌ ಮತ್ತು ಓಲಾ ಸಹ ಸೇರಿಕೊಂಡಿವೆ. ವಾರ್ಷಿಕ 10,000 ಕೋಟಿ ರೂ. ವಹಿವಾಟು ನಡೆಸುವ ಗುರಿಯನ್ನು ಸರಕಾರದ ಜಾಲತಾಣ ಹೊಂದಿದೆ.
↧
ಸರಕಾರಿ ಅಧಿಕಾರಿಗಳಿಗೆ ಓಲಾ, ಉಬರ್‌ ಸೇವೆ
↧