ಕಾನ್ಪುರ: ಚಿಕುನ್‌ಗುನ್ಯಾದಿಂದ ಬಳಲುತ್ತಿರುವ ವೇಗಿ ಇಶಾಂತ್‌ ಶರ್ಮಾ ಗುರುವಾರ ಆರಂಭವಾಗಲಿರುವ ಪ್ರವಾಸಿ ನ್ಯೂಜಿಲೆಂಡ್‌ ವಿರುದ್ಧದ ಪ್ರಥಮ ಟೆಸ್ಟ್‌ ಪಂದ್ಯಕ್ಕೆ ಅಲಭ್ಯರಾಗಿದ್ದಾರೆ. ಈ ವಿಚಾರವನ್ನು ಟೀಮ್‌ ಇಂಡಿಯಾ ಕೋಚ್‌ ಅನಿಲ್‌ ಕುಂಬ್ಳೆ, ಗ್ರೀನ್‌ ಪಾರ್ಕ್‌ ಕ್ರೀಡಾಂಗಣದಲ್ಲಿ ಮಂಗಳವಾರ ನಡೆದ ಸುದ್ದಿಗೋಷ್ಠಿಯಲ್ಲಿ ಖಚಿತ ಪಡಿಸಿದ್ದಾರೆ. ''ಇಶಾಂತ್‌ ಶರ್ಮಾ ಚಿಕುನ್‌ಗುನ್ಯಾದಿಂದ ಚೇತರಿಸಿಕೊಳ್ಳುತ್ತಿದ್ದು, ಪ್ರಥಮ ಟೆಸ್ಟ್‌ಗೆ ಲಭ್ಯರಿಲ್ಲ. ಇಶಾಂತ್‌ಗೆ ಬದಲಿ ಆಟಗಾರನನ್ನು ನಾವು ಕೇಳಿಲ್ಲ. ಲಭ್ಯವಿರುವ 14 ಆಟಗಾರರಲ್ಲಿ ಅಂತಿಮ 11ರ ಬಳಗವನ್ನು ಆಯ್ಕೆ ಮಾಡಲಿದ್ದೇವೆ,'' ಎಂದು ತಿಳಿಸಿದರು. ದಿಲ್ಲಿಯಲ್ಲಿ ಚಿಕುನ್‌ಗುನ್ಯಾ ವ್ಯಾಪಿಸಿದ್ದು, ಪಶ್ಚಿಮ ದಿಲ್ಲಿಯ ಪಟೇಲ್‌ ನಗರದ ನಿವಾಸಿಯಾಗಿರುವ ಇಶಾಂತ್‌ ಶರ್ಮಾ ಕೆಲ ದಿನಗಳ ಹಿಂದೆ ಚಿಕುನ್‌ಗುನ್ಯಾಗೆ ಗುರಿಯಾಗಿದ್ದರು. ಭಾರತ ತಂಡದ ಅನುಭವಿ ವೇಗಿಯಾಗಿರುವ ಇಶಾಂತ್‌ 72 ಟೆಸ್ಟ್‌ ಪಂದ್ಯಗಳಿಂದ 209 ವಿಕೆಟ್‌ ಪಡೆದಿದ್ದಾರೆ. ಇಶಾಂತ್‌ ಅನುಪಸ್ಥಿತಿಯಲ್ಲಿ ಕಿವೀಸ್‌ ವಿರುದ್ಧದ ಪ್ರಥಮ ಟೆಸ್ಟ್‌ ವೇಳೆ ಬಂಗಾಳ ವೇಗಿ ಮೊಹಮ್ಮದ್‌ ಶಮಿ ಟೀಮ್‌ ಇಂಡಿಯಾದ ವೇಗದ ಬೌಲಿಂಗ್‌ನ ಮುಂಚೂಣಿಯಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.
↧
ಪ್ರಥಮ ಟೆಸ್ಟ್‌ನಿಂದ ಇಶಾಂತ್‌ ಔಟ್‌
↧