ಚೆನ್ನೈ: ವಾರದಲ್ಲಿ ಎರಡು ದಿನ ಮನೆಯಿಂದಲೇ ಕೆಲಸ ಮಾಡಲು ಕಾಗ್ನಿಜೆಂಟ್ ಟೆಕ್ನಾಲಜಿ ಸಲ್ಯೂಷನ್ಸ್‌ ಉದ್ಯೋಗಿಗಳಿಗೆ ಅವಕಾಶ ನೀಡಿದೆ. ಐಟಿ ದಿಗ್ಗಜಗಳಲ್ಲಿ ಒಂದಾದ ಕಾಗ್ನಿಜೆಂಟ್, ಭಾರತೀಯ ಉದ್ಯೋಗಿಗಳಿಗೆ ಕಚೇರಿ ಕೆಲಸಗಳನ್ನು ಮನೆಯಿಂದಲೇ ಮಾಡಲು ಉತ್ತೇಜಿಸಿದೆ. ಉದ್ಯೋಗಿಗಳಿಗೆ ಈ ಬಗ್ಗೆ ಇ-ಮೇಲ್‌ ರವಾನಿಸಲಾಗಿದೆ. ಮಾನವ ಸಂಪನ್ಮೂಲ, ಹಣಕಾಸು, ಕಾರ್ಪೊರೆಟ್‌ ಮಾರ್ಕೆಂಟಿಂಗ್‌ ಮತ್ತು ಇತರೆ ವಿಭಾಗದ ಉದ್ಯೋಗಿಗಳಿಗೆ ಈ ಅವಕಾಶ ದೊರೆಯಲಿದೆ. ಗ್ರಾಹಕರೊಂದಿಗೆ ನೇರ ಸಂಬಂಧ ಇಲ್ಲದ ಉದ್ಯೋಗಿಗಳು ಸೌಲಭ್ಯ ಪಡೆಯಲಿದ್ದಾರೆ. ''ಇದು ಕಡ್ಡಾಯ ನಿಯಮವೇನಲ್ಲ. ಉದ್ಯೋಗಿಗಳು ತಮ್ಮ ವೈಯಕ್ತಿಕ ಮತ್ತು ವೃತ್ತಿಪರ ಅಗತ್ಯಗಳನ್ನು ತೀರಿಸಿಕೊಳ್ಳುವ ನಿಟ್ಟಿನಲ್ಲಿ ನಿಯಮ ಅನುಕೂಲ ಕಲ್ಪಿಸುತ್ತದೆ,'' ಎಂದು ಕಂಪನಿಯು ಟೈಮ್ಸ್‌ ಆಫ್‌ ಇಂಡಿಯಾಗೆ ಇಮೇಲ್‌ನಲ್ಲಿ ಪ್ರತಿಕ್ರಿಯೆ ನೀಡಿದೆ. ಮನೆಯಲ್ಲಿ ಕೆಲಸ ಮಾಡುವ ಉದ್ಯೋಗಿಗಳಿಗೆ ಬ್ರ್ಯಾಡ್‌ಬ್ಯಾಂಡ್‌ ಸೇವೆಗೆ ಸಂಬಂಧಿಸಿದಂತೆ ನಿರ್ದಿಷ್ಟ ಹಣವನ್ನು ಕಂಪನಿ ಪಾವತಿಸಲಿದೆ. ''ತಿಂಗಳಿಗೆ 1,500 ರೂಪಾಯಿ ಅಂತರ್ಜಾಲ ಭತ್ಯೆಯನ್ನು ಕಂಪನಿ ನೀಡಲಿದೆ,'' ಎಂದು ಉದ್ಯೋಗಿಯೊಬ್ಬರು ಖಚಿತ ಪಡಿಸಿದ್ದಾರೆ. ''ಕಾಗ್ನಿಜೆಂಟ್‌ನ ಬಹುತೇಕ ಎಂಜಿನಿಯರ್‌ಗಳು ಪಾಳಿಗಳಲ್ಲಿ ಕೆಲಸ ಮಾಡುತ್ತಿದ್ದಾರೆ. ಇವರು ಮನೆಯಲ್ಲೇ ಕೆಲಸ ಮಾಡಿದರೆ, ಆ ಸಮಯದಲ್ಲಿ ಇನ್ನಷ್ಟು ಉದ್ಯೋಗಿಗಳಿಗೆ ಸ್ಥಳಾವಾಕಾಶ ಕಲ್ಪಿಸಬಹುದು. ಚೆನ್ನೈನ ಕಚೇರಿಯಲ್ಲಿ ಶೇ.90ರಷ್ಟು ಕಾರ್ಪೊರೆಟ್‌ ಕಾರ್ಯಗಳ ಉದ್ಯೋಗಿಗಳೇ ತುಂಬಿಕೊಂಡಿದ್ದಾರೆ. ಹೊಸ ನಿಯಮ ಜಾರಿಯಾದರೆ, ಬಿಸಿನೆಸ್‌ ವಿಭಾಗದ ಉದ್ಯೋಗಿಗಳಿಗೆ ಸ್ಥಳಾವಕಾಶವಾಗುತ್ತದೆ,'' ಎಂದು ಚೆನ್ನೈನ ನೌಕರರೊಬ್ಬರು ಹೇಳಿದ್ದಾರೆ. 11 ನಗರಗಳಲ್ಲಿ ಕಚೇರಿಗಳನ್ನು ಹೊಂದಿರುವ ಕಾಗ್ನಿಜೆಂಟ್ ಕಂಪನಿಯು ಭಾರತದಲ್ಲಿ 1,60,000 ಉದ್ಯೋಗಿಗಳನ್ನು ಹೊಂದಿದೆ.
↧
ವಾರದಲ್ಲಿ 2 ದಿನ ಮನೆಯಿಂದ ಕೆಲಸ: ಕಾಗ್ನಿಜೆಂಟ್ ಆಫರ್
↧