ಟಿಎಸ್‌ಎಸ್‌ನಿಂದ 1.60ಲಕ್ಷ ಕ್ವಿಂ. ಅಡಕೆ ವಹಿವಾಟು

ಶಿರಸಿ: ಅಂತಾರಾಜ್ಯ ಅಡಕೆ ವಹಿವಾಟು ಸಹಕಾರಿ ಸಂಸ್ಥೆಯಾದ ತೋಟಗಾರ್ಸ್‌ ಕೋ-ಆಪರೇಟಿವ್‌ ಸೇಲ್‌ ಸೊಸೈಟಿ(ಟಿಎಸ್‌ಎಸ್‌) ಕಳೆದ ಆರ್ಥಿಕ ವರ್ಷದಲ್ಲಿ 1.60 ಲಕ್ಷ ಕ್ವಿಂಟಾಲ್‌ ಅಡಕೆ ವಹಿವಾಟು ನಡೆಸಿದೆ. ಸಂಸ್ಥೆಯ ಸಿಹಿ ಅಡಕೆಪುಡಿ ಮಾರಾಟ ಹನ್ನೆರಡು ರಾಜ್ಯಗಳನ್ನು ತಲುಪಿದೆ.

ಕಳೆದ ಸಾಲಿನಲ್ಲಿ ಒಟ್ಟು 630 ಕೋಟಿ ರೂ. ವಹಿವಾಟು ನಡೆದಿದೆ. ಸಂಸ್ಥೆಯ ದಲಾಲಿ ವಿಭಾಗದಲ್ಲಿ 403 ಕೋಟಿ ರೂ. ಮೌಲ್ಯದ ಅಡಕೆ ವಹಿವಾಟು ಮಾಡಲಾಗಿದೆ. ಸಿದ್ದಾಪುರ ಶಾಖೆಯಲ್ಲಿ 27 ಸಾವಿರ ಕ್ವಿಂಟಾಲ್‌, ಯಲ್ಲಾಪುರ ಶಾಖೆಯಲ್ಲಿ 30 ಸಾವಿರ ಕ್ವಿಂಟಾಲ್‌ ಅಡಕೆ ಮಾರಾಟವಾಗಿದೆ. ಟಿಎಸ್‌ಎಸ್‌ ಸ್ವತಃ 70 ಸಾವಿರ ಕ್ವಿಂಟಲ್‌ ಅಡಕೆ ಖರೀದಿಸಿದ್ದು, 45 ಲಕ್ಷ ರೂ. ಲಾಭ ಗಳಿಸಿದೆ. ಸಿಹಿ ಅಡಕೆ ಪುಡಿ ವಿಭಾಗದಲ್ಲಿ 42 ಕೋಟಿ ರೂ. ವಹಿವಾಟು ನಡೆಸಿದೆ. ಇದಕ್ಕೆ 8,500 ಕ್ವಿಂಟಲ್‌ ಅಡಕೆ ಬಳಸಿದೆ. ಅಲ್ಲದೇ ಸಂಘದ ಸೂಪರ್‌ ಮಾರ್ಕೆಟ್‌ನ ಕಿರಾಣಿ ಹಾಗೂ ಕೃಷಿ ವಿಭಾಗದಲ್ಲಿ 41 ಕೋಟಿ ರೂ. ವಹಿವಾಟು ಮೂಲಕ 1.25 ಕೋಟಿ ರೂ. ಲಾಭ ಗಳಿಸಿದೆ. ಸದಸ್ಯರಿಗೆ 82 ಕೋಟಿ ರೂ. ಮತ್ತು ಪ್ರಾಥಮಿಕ ಸಹಕಾರಿ ಸಂಘಗಳಿಗೆ 10.49 ಕೋಟಿ ರೂ. ಸಾಲ ನೀಡಿದೆ. ಅಡಕೆ ಖರೀದಿದಾರರಿಗೂ 63.81 ಕೋಟಿ ರೂ. ಉದ್ರಿ ನೀಡಿದೆ.

''2015-16ನೇ ಸಾಲಿನಲ್ಲಿ 2 ಕೋಟಿ ರೂ. ನಿವ್ವಳ ಲಾಭ ಗಳಿಸಿದ್ದು ಷೇರುದಾರ ಸದಸ್ಯರಿಗೆ ಶೇ.20 ಲಾಭಾಂಶ ನೀಡಲು ಉದ್ದೇಶಿಸಿದೆ. ಸಂಸ್ಥೆಯ ಅಡಕೆ ಬೆಳೆಗಾರ ಸದಸ್ಯರ ಸಭೆ ಸೆ. 16ರಂದು ನಡೆಯಲಿದೆ,'' ಎಂದು ಸಂಸ್ಥೆ ಅಧ್ಯಕ್ಷ ಶಾಂತಾರಾಮ ಹೆಗಡೆ ಶೀಗೆಹಳ್ಳಿ ಮತ್ತು ಪ್ರಧಾನ ವ್ಯವಸ್ಥಾಪಕ ರವೀಶ ಹೆಗಡೆ ತಿಳಿಸಿದ್ದಾರೆ.