ಕಿರುತೆರೆ ಲೋಕದಲ್ಲಿ ಸಿನಿ ನಾಯಕಿಯರ ಮಿಂಚು

ಶರಣು ಹುಲ್ಲೂರು

ಸಿನಿಮಾಗಳ ಮೂಲಕ ಪ್ರೇಕ್ಷಕರಿಗೆ ರಂಜಿಸುತ್ತಿದ್ದ ನಾಯಕಿಯರು, ಈಗ ಕಿರುತೆರೆಯನ್ನು ಆಕ್ರಮಿಸಿಕೊಂಡಿದ್ದಾರೆ. ಬರೋಬ್ಬರಿ ಅರ್ಧ ಡಜನ್‌ ಧಾರಾವಾಹಿಗಳಲ್ಲಿ ಈ ಸ್ಯಾಂಡಲ್‌ವುಡ್‌ ನಾಯಕಿಯರು ಪ್ರಮುಖ ಪಾತ್ರ ನಿರ್ವಹಿಸುತ್ತಿದ್ದಾರೆ. ಕಿರುತೆರೆಯ ಕ್ಷೇತ್ರಕ್ಕೆ ಹೊಸ ಹೊಸ ಕಲಾವಿದೆಯರ ಆಗಮನ ಆಗುತ್ತಿದ್ದರೂ, ಸ್ಯಾಂಡಲ್‌ವುಡ್‌ನಿಂದ ನಾಯಕಿಯರನ್ನು ಆಮದು ಮಾಡುತ್ತಿರುವ ನಡೆ ಮಾತ್ರ ಅಚ್ಚರಿ ಮೂಡಿಸಿದೆ.

ಸಾಮಾನ್ಯವಾಗಿ ಸಿನಿಮಾ ರಂಗದಲ್ಲಿ ಅವಕಾಶ ಕಡಿಮೆ ಇರುವ ನಟಿಯರು ಮಾತ್ರ ಧಾರಾವಾಹಿಯಲ್ಲಿ ನಟಿಸಲು ಒಪ್ಪುತ್ತಿದ್ದರು. ಆದರೆ, ಸದ್ಯ ಸೀರಿಯಲ್‌ಗಳಲ್ಲಿ ಕಾಣಿಸಿಕೊಂಡಿರುವ ಈ ಹಿರೋಯಿನ್ಸ್‌ ಸಿನಿಮಾ ರಂಗದಲ್ಲೂ ಸಕ್ರೀಯರಾಗಿದ್ದಾರೆ. ಎರಡೂ ರಂಗದಲ್ಲೂ ತಮ್ಮ ಛಾಪು ಮೂಡಿಸಲು ಸನ್ನದ್ಧರಾಗಿದ್ದಾರೆ.

ದಕ್ಷಿಣ ಭಾರತದ ಅನೇಕ ಸಿನಿಮಾಗಳಲ್ಲಿ ನಟಿಸಿದವರು ನೇಹಾ ಸಕ್ಸೇನಾ. ಲಿಕ್ವಿಡ್‌ ಸೇರಿದಂತೆ ಮೂರು ಸಿನಿಮಾಗಳಲ್ಲಿ ಸದ್ಯ ನೇಹಾ ನಟಿಸುತ್ತಿದ್ದಾರೆ. ಇವುಗಳ ಜತೆ ಜತೆಗೆ 'ಹರ ಹರ ಮಹಾದೇವ' ಧಾರಾವಾಹಿಯಲ್ಲೂ ಮುಖ್ಯ ಪಾತ್ರ ನಿರ್ವಹಿಸುತ್ತಿದ್ದಾರೆ. ತಮಿಳು, ಮಲೆಯಾಳಂ, ಕನ್ನಡ ಚಿತ್ರರಂಗದಲ್ಲಿ ಬ್ಯುಸಿಯಾಗಿದ್ದರೂ, ಧಾರಾವಾಹಿಯನ್ನು ಒಪ್ಪಿಕೊಳ್ಳಲು ಕಾರಣ ಅದು ಪೌರಾಣಿಕ ಹಿನ್ನೆಲೆಯ ಕತೆ ಅನ್ನುವುದು.

'ಪೌರಾಣಿಕ ಸಿನಿಮಾ ಮತ್ತು ಸೀರಿಯಲ್‌ ಮೂಡಿ ಬರುವುದು ತೀರಾ ಕಡಿಮೆ. ಅಂಥದ್ದೊಂದು ಅವಕಾಶ ಸಿಕ್ಕಾಗ ಬೇಡ ಅನ್ನಲು ಮನಸು ಬರಲಿಲ್ಲ. ಹೀಗಾಗಿ ಧಾರಾವಾಹಿಯಲ್ಲಿ ನಟಿಸಲು ಒಪ್ಪಿಕೊಂಡೆ' ಅಂತಾರೆ ಸಕ್ಸೇನಾ.

ಗೊಂಬೆಗಳ ಲವ್‌ ಖ್ಯಾತಿಯ ಪಾವನಾ ಕೂಡ ಸೀರಿಯಲ್‌ ಲೋಕಕ್ಕೆ ಜಿಗಿದಿದ್ದಾರೆ. 'ಕಲರ್‌ಫುಲ್‌' ಸೇರಿದಂತೆ ಒಂದಿಷ್ಟು ಚಿತ್ರಗಳು ಕೈಯಲ್ಲಿದ್ದರೂ 'ಅನುರಾಗ' ಧಾರಾವಾಹಿ ಒಪ್ಪಿಕೊಂಡಿದ್ದಾರೆ. ಈ ಸೀರಿಯಲ್‌ ನಟನೆಗಾಗಿಯೇ ಒಂದಿಷ್ಟು ಚಿತ್ರಗಳನ್ನೂ ನಿರಾಕರಿಸಿದ್ದಾರೆ.

'ಧಾರಾವಾಹಿಯ ಪ್ರಪಂಚವೇ ಬೇರೆ. ಈ ಅನುಭವವೂ ನನಗಿರಲಿ ಅಂತ ಬಂದೆ. ತುಂಬಾ ದಿನಗಳಿಂದ ನಟಿಸಲು ಕೇಳುತ್ತಿದ್ದರು. ಒಳ್ಳೆಯ ಪ್ರಾಜೆಕ್ಟ್ ಸಿಕ್ಕಾಗ ಹೋಗೋಣ ಅಂತ ಕಾಯುತ್ತಿದ್ದೆ. ಈಗ ಸಿಕ್ಕಿದೆ. ಧಾರಾವಾಹಿಯಿಂದ ನನ್ನ ಸಿನಿಮಾ ಕೆರಿಯರ್‌ಗೂ ಸಹಾಯ ಆಗಬಹುದು ಅನ್ನುವ ನಂಬಿಕೆ ನನಗಿದೆ' ಅಂತಾರೆ ಪಾವನಾ.

ನಾಲ್ಕು ಸಿನಿಮಾಗಳಿಗೆ ಡೇಟ್‌ ಹೊಂದಾಣಿಕೆ ಮಾಡಿಕೊಂಡು 'ಜನುಮದ ಜೋಡಿ' ಧಾರಾವಾಹಿಯಲ್ಲಿ ನಟಿಸುತ್ತಿದ್ದಾರೆ ನೇಹಾ ಪಾಟೀಲ್‌. ಹುಲಿದುರ್ಗ, ಬತ್ತಾಸ್‌, ಸಂಯುಕ್ತ-2 ಹೀಗೆ ನಾಲ್ಕು ಸಿನಿಮಾಗಳ ಶೂಟಿಂಗ್‌ ಮಧ್ಯೆಯೂ ಸೀರಿಯಲ್‌ನಲ್ಲಿ ನಟಿಸುವ ಧೈರ್ಯ ತೋರಿದ್ದಾರೆ. ಈ ಎರಡೂ ದಂಡೆಯ ಮೇಲೆ ನಡೆಯುವುದು ಕಷ್ಟವಾದರೂ, ಧಾರಾವಾಹಿಯನ್ನು ಒಪ್ಪಿಕೊಳ್ಳಲು ಇವರು ತಮ್ಮದೇ ಆದ ಕಾರಣ ಕೊಟ್ಟಿದ್ದಾರೆ.

'ಜನುಮದ ಜೋಡಿ ಸೀರಿಯಲ್‌ ಅಂತ ನನಗೇನೂ ಅನಿಸುತ್ತಿಲ್ಲ. ಪಕ್ಕಾ ಸಿನಿಮಾ ಶೈಲಿಯಲ್ಲೇ ಶೂಟಿಂಗ್‌ ಮಾಡುತ್ತಿದ್ದಾರೆ. ಅಲ್ಲದೇ ರಾಕ್‌ಲೈನ್‌ ವೆಂಕಟೇಶ್‌ ಅವರ ಪ್ರೊಡಕ್ಷನ್‌ನಲ್ಲಿ ಧಾರಾವಾಹಿ ಮೂಡಿ ಬರುತ್ತಿದೆ. ಇಡೀ ಟೀಮ್‌ ಕೂಡ ಚೆನ್ನಾಗಿದೆ. ಈಗಾಗಲೇ ಈ ಧಾರಾವಾಹಿ ಮೂಲಕ ನನ್ನನ್ನು ಗುರುತಿಸುತ್ತಿದ್ದಾರೆ. ಈ ಎಲ್ಲಾ ಕಾರಣದಿಂದಾಗಿ ಕಿರುತೆರೆಯ ಲೋಕಕ್ಕೆ ಬಂದೆ' ಅನ್ನುವುದು ನೇಹಾ ಪಾಟೀಲ್‌ ಮಾತು.

ರಮೇಶ್‌ ಅರವಿಂದ್‌ ಅವರ ಚಿತ್ರಗಳಲ್ಲಿ ನಾಯಕಿಯಾಗಿ ನಟಿಸಿರುವ ಸನಾತನಿ ಕೂಡ 'ಗೃಹಲಕ್ಷ್ಮಿ' ಧಾರಾವಾಹಿಯಲ್ಲಿ ಮುಖ್ಯ ಪಾತ್ರ ಮಾಡುತ್ತಿದ್ದಾರೆ. ಸಿದ್ಧಗಂಗಾ ಚಿತ್ರದ ನಾಯಕಿ ತನ್ಮಯಿ 'ಸರ್ಪ ಸಂಬಂಧ' ಧಾರಾವಾಹಿಯ ನಾಯಕಿ. ಮತ್ತೊಂದು ಜನಪ್ರಿಯ ಧಾರಾವಾಹಿ 'ನಾಗಿಣಿ'ಯಲ್ಲಿ ದೀಪಿಕಾ ದಾಸ್‌ ಕೂಡ ಲೀಡ್‌ ರೂಲ್‌ನಲ್ಲಿ ಕಾಣಿಸಿಕೊಂಡಿದ್ದಾರೆ.