ಅಮೆರಿಕ ನೆಲದಲ್ಲಿ ಭಾರತಕ್ಕೆ ಮೊದಲ ಅಂತಾರಾಷ್ಟ್ರೀಯ ಪಂದ್ಯ | ವಿಶ್ವ ಚಾಂಪಿಯನ್ನರ ವಿರುದ್ಧ ಶುಭಾರಂಭದ ನಿರೀಕ್ಷೆ ಲಾಡರ್‌ಹಿಲ್‌ (ಫ್ಲೋರಿಡಾ): ಅಮೆರಿಕ ನೆಲದಲ್ಲಿ ತನ್ನ ಮೊಟ್ಟ ಮೊದಲ ಅಂತಾರಾಷ್ಟ್ರೀಯ ಕ್ರಿಕೆಟ್‌ ಪಂದ್ಯವಾಡುತ್ತಿರುವ ಸಂಭ್ರಮದಲ್ಲಿರುವ ಭಾರತ, 2 ಪಂದ್ಯಗಳ ಟಿ20 ಸರಣಿಯ ಮೊದಲ ಕದನದಲ್ಲಿ ವಿಶ್ವ ಚಾಂಪಿಯನ್‌ ವೆಸ್ಟ್‌ ಇಂಡೀಸ್‌ ತಂಡವನ್ನು ಎದುರಿಸಲಿದೆ. ಸೆಂಟ್ರಲ್‌ ಬ್ರೊವಾರ್ಡ್‌ ರೀಜನಲ್‌ ಪಾರ್ಕ್‌ ಕ್ರೀಡಾಂಗಣ ಈ ಪಂದ್ಯಕ್ಕೆ ಆತಿಥ್ಯ ವಹಿಸಲಿದೆ. ಕಳೆದ 4 ದಿನಗಳಿಂದ ಒಬಾಮಾ ನಾಡಿನಲ್ಲಿ ಬೀಡು ಬಿಟ್ಟಿರುವ ಮಹೇಂದ್ರ ಸಿಂಗ್‌ ಧೋನಿ ಸಾರಥ್ಯದ ಟೀಮ್‌ ಇಂಡಿಯಾ ಸರಣಿಯಲ್ಲಿ ಶುಭಾರಂಭವನ್ನು ಎದುರು ನೋಡುತ್ತಿದೆ. ಈಗಾಗಲೇ ವಿರಾಟ್ ಕೊಹ್ಲಿ ಸಾರಥ್ಯದಲ್ಲಿ ವೆಸ್ಟ್‌ ಇಂಡೀಸ್‌ ವಿರುದ್ಧದ 4 ಪಂದ್ಯಗಳ ಟೆಸ್ಟ್‌ ಸರಣಿಯನ್ನು 2-0 ಅಂತರದಲ್ಲಿ ಗೆದ್ದಿರುವ ಭಾರತ, ಧೋನಿ ನಾಯಕತ್ವದಲ್ಲಿ ಟಿ20 ಸರಣಿ ಜಯದ ಮೇಲೆ ಕಣ್ಣಿಟ್ಟಿದೆ. ಸರಣಿ ಗೆಲ್ಲುವುದರೊಂದಿಗೆ ಟಿ20 ವಿಶ್ವಕಪ್‌ ಸೆಮಿಫೈನಲ್‌ನಲ್ಲಿ ವಿಂಡೀಸ್‌ ವಿರುದ್ಧ ಎದುರಾದ ಸೋಲಿಗೆ ಸೇಡು ತೀರಿಸಿಕೊಳ್ಳುವ ಅವಕಾಶ ಭಾರತದ ಮುಂದಿದೆ. ವಿರಾಟ್, ಬುಮ್ರಾ ಟ್ರಂಪ್‌ಕಾರ್ಡ್ಸ್‌ ಐಸಿಸಿ ಟಿ20 ಬ್ಯಾಟಿಂಗ್‌ ರಾರ‍ಯಂಕಿಂಗ್‌ನಲ್ಲಿ ನಂ.1 ಸ್ಥಾನದಲ್ಲಿರುವ ರನ್‌ ಮಷಿನ್‌ ವಿರಾಟ್ ಕೊಹ್ಲಿ ಭಾರತದ ಆಧಾರಸ್ಥಂಭ. ಈ ವರ್ಷ ಆಡಿರುವ 13 ಟಿ20 ಪಂದ್ಯಗಳಲ್ಲಿ ವಿರಾಟ್ 125ರ ಶ್ರೇಷ್ಠ ಸರಾಸರಿಯಲ್ಲಿ 7 ಅರ್ಧಶತಕಗಳ ಸಹಿತ 625 ರನ್‌ ಗಳಿಸಿದ್ದಾರೆ. ಕಳೆದ ಐಪಿಎಲ್‌ನಲ್ಲೂ ನಾಲ್ಕು ಶತಕ ಸಿಡಿಸಿದ್ದ ವಿರಾಟ್, ಅಮೆರಿಕ ನೆಲದಲ್ಲೂ ಅಬ್ಬರಿಸುವ ತವಕದಲ್ಲಿದ್ದಾರೆ. ಅಂತಿಮ ಓವರ್‌ಗಳಲ್ಲಿ ಕರಾರುವಾಕ್‌ ದಾಳಿಗೆ ಹೆಸರಾಗಿರುವ ಯುವ ವೇಗಿ ಜಸ್‌ಪ್ರೀತ್‌ ಬುಮ್ರಾ ಭಾರತದ ಪ್ರಮುಖ ಬೌಲಿಂಗ್‌ ಅಸ್ತ್ರ. ಐಸಿಸಿ ರಾರ‍ಯಂಕಿಂಗ್‌ನಲ್ಲಿ 2ನೇ ಸ್ಥಾನದಲ್ಲಿರುವ ಬುಮ್ರಾ2016ರಲ್ಲಿ ಆಡಿದ 19 ಪಂದ್ಯಗಳಿಂದ 24 ವಿಕೆಟ್‌ ಪಡೆದಿದ್ದಾರೆ. ರಾಹುಲ್‌ಗೆ ಅವಕಾಶ? ವಿಂಡೀಸ್‌ ವಿರುದ್ಧದ ಟೆಸ್ಟ್‌ ಸರಣಿಯಲ್ಲಿ ಮಿಂಚಿದ್ದ ಕರ್ನಾಟಕದ ಆರಂಭಿಕ ಬ್ಯಾಟ್ಸ್‌ಮನ್‌ ಕೆ.ಎಲ್‌ ರಾಹುಲ್‌ ಟಿ20 ಸರಣಿಯಲ್ಲೂ ಅವಕಾಶದ ನಿರೀಕ್ಷೆಯಲ್ಲಿದ್ದಾರೆ. ಆರಂಭಿಕರಾಗಿ ಶಿಖರ್‌ ಧವನ್‌-ರೋಹಿತ್‌ ಶರ್ಮಾ ಜೋಡಿ, 3ನೇ ಕ್ರಮಾಂಕದಲ್ಲಿ ವಿರಾಟ್ ಕೊಹ್ಲಿ ಕಣಕ್ಕಿಳಿಯುವುದರಿಂದ ರಾಹುಲ್‌ಗೆ ಮಧ್ಯ ಕ್ರಮಾಂಕದಲ್ಲಿ ಅವಕಾಶ ಸಿಗುವ ಸಾಧ್ಯತೆಯಿದೆ. ನಾಯಕ ಧೋನಿ, ಆಲ್‌ರೌಂಡರ್‌ಗಳಾದ ಆರ್‌.ಅಶ್ವಿನ್‌ ಮತ್ತು ರವೀಂದ್ರ ಜಡೇಜಾ ಕೆಳ ಕ್ರಮಾಂಕಕ್ಕೆ ಆಸರೆಯಾಗಲಿದ್ದಾರೆ. ಮೊದಲ ಬಾರಿ ಧೋನಿ-ಕುಂಬ್ಳೆ ಕಾಂಬಿನೇಶನ್‌ ನಾಯಕ ಎಂ.ಎಸ್‌ ಧೋನಿ ಹಾಗೂ ತಂಡದ ಮುಖ್ಯ ಕೋಚ್‌ ಅನಿಲ್‌ ಕುಂಬ್ಳೆ ಕಾಂಬಿನೇಶನ್‌ಗೆ ಇದು ಮೊದಲ ಅಂತಾರಾಷ್ಟ್ರೀಯ ಪಂದ್ಯ. ಕುಂಬ್ಳೆ-ಕೊಹ್ಲಿ ಕಾಂಬಿನೇಶನ್‌ ವಿಂಡೀಸ್‌ ವಿರುದ್ಧದ ಟೆಸ್ಟ್‌ ಸರಣಿಯಲ್ಲಿ ಯಶಸ್ಸು ಕಂಡಿತ್ತು. ಇದೀಗ ಧೋನಿ ಅವರೊಂದಿಗೆ ಕೆಲಸ ಮಾಡುವುದನ್ನು ಕುಂಬ್ಳೆ ಎದುರು ನೋಡುತ್ತಿದ್ದಾರೆ. ''ಎಂ.ಎಸ್‌ ಅವರೊಂದಿಗೆ ಮೊದಲ ಬಾರಿ ಕೆಲಸ ಮಾಡುತ್ತಿದ್ದೇನೆ. ನಾವು ತುಂಬಾ ವರ್ಷಗಳವರೆಗೆ ಜತೆಯಾಗಿ ಆಡಿದ್ದೇವೆ. ಕಳೆದೆರಡು ದಿನಗಳಿಂದ ಕಾರ್ಯತಂತ್ರಗಳ ಬಗ್ಗೆ ಇಬ್ಬರೂ ಸಾಕಷ್ಟು ಚರ್ಚೆ ನಡೆಸಿದ್ದೇವೆ,'' ಎಂದು ಕುಂಬ್ಳೆ ತಿಳಿಸಿದ್ದಾರೆ. ಆತ್ಮವಿಶ್ವಾಸದಲ್ಲಿ ವಿಶ್ವಚಾಂಪಿಯನ್ನರು ಕಳೆದ ಮಾರ್ಚ್‌ ಹಾಗೂ ಏಪ್ರಿಲ್‌ನಲ್ಲಿ ಭಾರತದಲ್ಲಿ ನಡೆದ ಐಸಿಸಿ ಟಿ20 ವಿಶ್ವಕಪ್‌ ಟೂರ್ನಿಯಲ್ಲಿ ಚಾಂಪಿಯನ್‌ ಪಟ್ಟಕ್ಕೇರಿದ್ದ ವೆಸ್ಟ್‌ ಇಂಡೀಸ್‌ ತಂಡದಲ್ಲಿ ಟಿ20 ಪರಿಣತ ಆಟಗಾರ ದಂಡೇ ಇದೆ. ಡರ್ರೆನ್‌ ಸಾಮಿ ಬದಲು ತಂಡದ ನಾಯಕತ್ವ ವಹಿಸಿರುವ ಟಿ20 ವಿಶ್ವಕಪ್‌ ಹೀರೊ ಕಾರ್ಲೋಸ್‌ ಬ್ರಾತ್‌ವೇಟ್‌, ಕ್ರಿಸ್‌ ಗೇಲ್‌, ಲೆಂಡ್ಲ್‌ ಸಿಮೊನ್ಸ್‌, ಡ್ವೇನ್‌ ಬ್ರಾವೊ, ಕೀರನ್‌ ಪೊಲಾರ್ಡ್‌, ಸ್ಯಾಮುಯೆಲ್‌ ಬದ್ರಿ, ಸುನಿಲ್‌ ನರೈನ್‌ ವಿಂಡೀಸ್‌ ಪಾಳೆಯದಲ್ಲಿರುವ ಅಪಾಯಕಾರಿ ಆಟಗಾರರು. ಅಮೆರಿಕದಲ್ಲಿ 3ನೇ ಅಂತಾರಾಷ್ಟ್ರೀಯ ಸರಣಿ ಇದು ಅಮೆರಿಕದಲ್ಲಿ ನಡೆಯುತ್ತಿರುವ 3ನೇ ಅಂತಾರಾಷ್ಟ್ರೀಯ ಟಿ20 ಸರಣಿ. ಇದಕ್ಕೂ ಮುನ್ನ 2010ರಲ್ಲಿ ನ್ಯೂಜಿಲೆಂಡ್‌ ಹಾಗೂ ಶ್ರೀಲಂಕಾ ನಡುವೆ 2 ಪಂದ್ಯ, 2012ರಲ್ಲಿ ನ್ಯೂಜಿಲೆಂಡ್‌ ಮತ್ತು ವೆಸ್ಟ್‌ ಇಂಡೀಸ್‌ ಮಧ್ಯೆ 2 ಪಂದ್ಯಗಳ ಸರಣಿ ನಡೆದಿತ್ತು. ರೀಜನಲ್‌ ಪಾರ್ಕ್‌ ಮೈದಾನ ಐಸಿಸಿ ಮಾನ್ಯತೆ ಪಡೆದ ಅಮೆರಿಕದ ಏಕೈಕ ಕ್ರಿಕೆಟ್‌ ಕ್ರೀಡಾಂಗಣವಾಗಿದ್ದು, ಕಳೆದ ತಿಂಗಳು ನಡೆದ ಕೆರಿಬಿಯನ್‌ ಪ್ರೀಮಿಯರ್‌ ಲೀಗ್‌ನ 6 ಪಂದ್ಯಗಳಿಗೆ ಆತಿಥ್ಯ ವಹಿಸಿದೆ. ಈಗ ಭಾರತ ಮತ್ತು ವಿಂಡೀಸ್‌ ನಡುವಣ ಮೊದಲ ಟಿ20 ಪಂದ್ಯಕ್ಕೆ ಸುಮಾರು 15 ಸಾವಿರ ಪ್ರೇಕ್ಷ ಕರು ಆಗಮಿಸುವ ನಿರೀಕ್ಷೆಯಿದೆ. ತಂಡಗಳ ವಿವರ ಭಾರತ: ಎಂ.ಎಸ್‌ ಧೋನಿ (ನಾಯಕ), ಶಿಖರ್‌ ಧವನ್‌, ರೋಹಿತ್‌ ಶರ್ಮಾ, ವಿರಾಟ್ ಕೊಹ್ಲಿ, ಕೆ.ಎಲ್‌ ರಾಹುಲ್‌, ಎಂ.ಎಸ್‌ ಧೋನಿ, ರವಿಚಂದ್ರನ್‌ ಅಶ್ವಿನ್‌, ರವೀಂದ್ರ ಜಡೇಜಾ, ಭುವನೇಶ್ವರ್‌ ಕುಮಾರ್‌, ಜಸ್‌ಪ್ರೀತ್‌ ಬುಮ್ರಾ, ಮೊಹಮ್ಮದ್‌ ಶಮಿ, ಅಜಿಂಕ್ಯ ರಹಾನೆ, ಸ್ಟುವರ್ಟ್‌ ಬಿನ್ನಿ, ಉಮೇಶ್‌ ಯಾದವ್‌. ವೆಸ್ಟ್‌ ಇಂಡೀಸ್‌: ಕಾರ್ಲೋಸ್‌ ಬ್ರಾತ್‌ವೇಟ್‌, ಕ್ರಿಸ್‌ ಗೇಲ್‌, ಜಾನ್ಸನ್‌ ಚಾರ್ಲ್ಸ್‌, ಲೆಂಡ್ಲ್‌ ಸಿಮೊನ್ಸ್‌, ಆ್ಯಂಡ್ರೆ ಫ್ಲೆಚರ್‌, ಮರ್ಲಾನ್‌ ಸ್ಯಾಮುಯೆಲ್ಸ್‌, ಡ್ವೇನ್‌ ಬ್ರಾವೊ, ಕೀರನ್‌ ಪೊಲಾರ್ಡ್‌, ಆ್ಯಂಡ್ರೆ ರಸೆಲ್‌, ಎವಿನ್‌ ಲೆವಿಸ್‌, ಜೇಸನ್‌ ಹೋಲ್ಡರ್‌, ಸ್ಯಾಮುಯೆಲ್‌ ಬದ್ರಿ, ಸುನಿಲ್‌ ನರೈನ್‌. ಪಂದ್ಯ ಆರಂಭ: ರಾತ್ರಿ 7.30ಕ್ಕೆ ಸ್ಥಳ: ಸೆಂಟ್ರಲ್‌ ಬ್ರೊವಾರ್ಡ್‌ ರೀಜನಲ್‌ ಪಾರ್ಕ್‌ ಕ್ರೀಡಾಂಗಣ, ಲಾಡರ್‌ಹಿಲ್‌ ನೇರ ಪ್ರಸಾರ: ಸ್ಟಾರ್‌ ಸ್ಪೋರ್ಟ್ಸ್‌ ಐಸಿಸಿ ರಾರ‍ಯಂಕಿಂಗ್‌ ಭಾರತ: 02 ವೆಸ್ಟ್‌ ಇಂಡೀಸ್‌: 03 ಈ ವರ್ಷ ಟಿ20ಯಲ್ಲಿ ಭಾರತದ ಸಾಧನೆ ಒಟ್ಟು ಪಂದ್ಯ 19 ಗೆಲುವು 15 ಸೋಲು 04 04 ಈ ವರ್ಷ ಭಾರತ ಸತತ 4ನೇ ದ್ವಿಪಕ್ಷೀಯ ಟಿ20 ಸರಣಿ ಜಯವನ್ನು ಎದುರು ನೋಡುತ್ತಿದ್ದು, ಜನವರಿಯಲ್ಲಿ ಆಸ್ಪ್ರೇಲಿಯಾ ವಿರುದ್ಧ 3-0 ಸರಣಿ ಜಯ, ಫೆಬ್ರವರಿಯಲ್ಲಿ ಶ್ರೀಲಂಕಾ ವಿರುದ್ಧ 2-1ರ ಗೆಲುವು, ಜೂನ್‌ನಲ್ಲಿ ಜಿಂಬಾಬ್ವೆ ವಿರುದ್ಧ 2-1ರ ಸರಣಿ ಜಯ ದಾಖಲಿಸಿದೆ.
↧
ಒಬಾಮಾ ನಾಡಲ್ಲಿ ಟಿ20 ಹಂಗಾಮ
↧