ಶ್ರೇಯಸ್ಕರ ದಿಕ್ಕು ಹೀಗಿರಲಿ

ಟಿ.ಆರ್‌. ವಿಜಯ್‌ಕುಮಾರ್‌

ಬೆಂಗಳೂರಿನಂತಹ ಮಹಾನಗರದಲ್ಲಿ ನಿವೇಶನ ಅಥವಾ ಕಟ್ಟಡಗಳನ್ನು ಕೊಳ್ಳುವುದು ಬಹಳ ಪ್ರಯಾಸದ ಕೆಲಸ. ಈ ಪರಿಸ್ಥಿತಿಯಲ್ಲಿ ನಾವು ಉತ್ತರ ಅಥವ ಪೂರ್ವ ದಿಕ್ಕಿನ ನಿವೇಶನ ಅಥವ ಕಟ್ಟಡಗಳನ್ನು ಹುಡುಕುತ್ತಾ ಹೋದರೆ ವಾಸ ಮಾಡುವುದೇ ಕಷ್ಟಕರವಾಗಿ ಪರಿಣಮಿಸುತ್ತದೆ. ಇನ್ನು ಉತ್ತರ-ಪೂರ್ವ ಉತ್ತಮ, ದಕ್ಷಿಣ-ಪಶ್ಚಿಮ ಅಶುಭ ಎನ್ನುವುದಾದರೆ ಸುಮಾರು ಅರ್ಧ ಬೆಂಗಳೂರು ನಗರ ವಾಸಕ್ಕೆ ಯೋಗ್ಯವಾಗುವುದಿಲ್ಲ.

ಒಂದು ರಸ್ತೆಯಲ್ಲಿ ಉತ್ತರ-ದಕ್ಷಿಣ ಅಥವ ಪೂರ್ವ-ಪಶ್ಚಿಮ ನಿವೇಶನಗಳಿರುತ್ತವೆ. ನಾವು ಉತ್ತರ-ಪೂರ್ವಕ್ಕೆ ಪ್ರಾಮುಖ್ಯತೆ ಕೊಟ್ಟರೆ ಒಂದು ಸಾಲು ವಾಸಯೋಗ್ಯವಾಗುವುದಿಲ್ಲ. ರಾಶಿಗಳಿಗೆ ಸೂಚಿಸಿದ ದಿಕ್ಕು ಅಥವ ಅಷ್ಟಕ ವರ್ಗ ಪದ್ಧತಿಯಲ್ಲಿ ಸೂಚಿತವಾಗುವ ದಿಕ್ಕು ಶ್ರೇಯಸ್ಕರ, ಆದರೆ ಕೆಲವು ಬಾರಿ ನಾವು ನಮ್ಮ ಜೀವನದಲ್ಲಿ ಆ ದಿಕ್ಕಿನ ಉಪಯೋಗ ಪಡೆದುಕೊಳ್ಳಲು ಸಾಧ್ಯವಾಗುವುದಿಲ್ಲ. ಅಂತಹ ಸಂದರ್ಭದಲ್ಲಿ ಸೂಕ್ತ ಪರಿಹಾರಗಳ ಮೂಲಕ ಶುಭಫಲವನ್ನು ಕಂಡುಕೊಳ್ಳಬಹುದು.

ವಾಸ ಅಥವ ವ್ಯಾಪಾರ ಯೋಗ್ಯ ನಿವೇಶನ ಮತ್ತು ಕಟ್ಟಡಗಳ ವಿಷಯ ಬಂದಾಗ ಉತ್ತರ ಮತ್ತು ಪೂರ್ವ ದಿಕ್ಕಿಗೆ ಪ್ರಾಮುಖ್ಯತೆ ಹೆಚ್ಚಾಗಿ ಕೇಳಿಬರುತ್ತದೆ. ಅಂದರೆ ಉತ್ತರ ಅಥವಾ ಪೂರ್ವ ದಿಕ್ಕಿನ ನಿವೇಶನ ಅಥವ ಕಟ್ಟಡಗಳಿಂದ ಭಾಗ್ಯ, ಸುಖ, ಸಂತೋಷ ಉಂಟಾಗುತ್ತದೆ ಮತ್ತು ಇನ್ನುಳಿದ ಎರಡು ದಿಕ್ಕುಗಳು ದಕ್ಷಿಣ ಮತ್ತು ಪಶ್ಚಿಮ ಅಶುಭವೆಂದು ಪರಿಗಣಿಸಲಾಗಿದೆ. ಇದು ಶುದ್ಧ ತಪ್ಪು ಕಲ್ಪನೆಯೇ ಸರಿ. ಯಾಕೆಂದರೆ ಜ್ಯೋತಿಷ್ಯ ವಿಜ್ಞಾನದಲ್ಲಿ ಪ್ರತಿ ಮೂರು ರಾಶಿಗಳಿಗೆ ಒಂದು ದಿಕ್ಕಿನಂತೆ ಎಲ್ಲಾ 12 ರಾಶಿಗಳಿಗೂ 4 ದಿಕ್ಕನ್ನು ಸೂಚಿಸಲಾಗಿದೆ.

ರಾಶಿ ದಿಕ್ಕು

ಮೇಷ, ಸಿಂಹ, ಧನಸ್ಸು ಪೂರ್ವ

ವೃಷಭ, ಕನ್ಯಾ, ಮಕರ ದಕ್ಷಿಣ

ಮಿಥುನ, ತುಲಾ, ಕುಂಭ ಪಶ್ಚಿಮ

ಕಟಕ, ವೃಶ್ಚಿಕ, ಮೀನ ಉತ್ತರ

ಉದಾಹರಣೆಗೆ, ವ್ಯಕ್ತಿಯ ಜನ್ಮ ನಕ್ಷ ತ್ರ (ಇಲ್ಲದಿದ್ದಲ್ಲಿ ನಾಮ ನಕ್ಷ ತ್ರ), ಮೇಷ, ಸಿಂಹ, ಅಥವಾ ಧನಸ್ಸು ರಾಶಿಯಲ್ಲಿದ್ದರೆ ಆ ವ್ಯಕ್ತಿಗೆ ಪೂರ್ವ ದಿಕ್ಕು ಶ್ರೇಯಸ್ಕರ. ಇದು ಸ್ಥೂಲವಾಗಿ ಶುಭ ದಿಕ್ಕನ್ನು ನಿರ್ಧರಿಸುವ ವಿಧಾನ. ಈ ವಿಧಾನದಲ್ಲಿ ಸುಮಾರು 54 ಘಂಟೆ ವ್ಯಾಪ್ತಿಯೊಳಗೆ ಜನಿಸಿದ ವ್ಯಕ್ತಿಯ ಜನ್ಮರಾಶಿ ಒಂದೇಯಾಗಿರುತ್ತದೆ. ಆದ್ದರಿಂದ ಇದನ್ನು ಸ್ಥೂಲ ವಿಧಾನವೆಂದು ಕರೆಯಲಾಗುವುದು.

ಜ್ಯೋತಿರ್ವಿಜ್ಞಾನದ ಒಂದು ಅಂಗವಾಗಿರುವ ಅಷ್ಟಕ ವರ್ಗ ಪದ್ಧತಿಯು ಸೂಕ್ಷ ್ಮವಾಗಿ ಶುಭ ದಿಕ್ಕನ್ನು ಸೂಚಿಸುತ್ತದೆ. ಈ ಪದ್ಧತಿಯಲ್ಲಿ ಎಲ್ಲಾ ಸಪ್ತ ಗ್ರಹಗಳನ್ನು ಮತ್ತು ಲಗ್ನವನ್ನು ಸಹ ಗಣನೆಗೆ ತೆಗೆದುಕೊಂಡು ಅಂಕೆಗಳ ಆಧಾರದಿಂದ ಶುಭ ದಿಕ್ಕನ್ನು ನಿರ್ಧರಿಸಲಾಗುವುದು.

ಉದಾಹರಣೆಗೆ ನಿಮಗೆ ಅಶುಭವೆನಿಸಿದ ದಕ್ಷಿಣ ದಿಕ್ಕಿನಲ್ಲಿ ವಾಸಿಸುತ್ತಿದ್ದರೆ ದಕ್ಷಿಣ ದಿಕ್ಕಿನ ಅಧಿಪತಿಯಾದಂತಹ ಕುಜನ ಮೂಲ ಮಂತ್ರವನ್ನು ಜಪಿಸುವುದರಿಂದ ಅಥವಾ ಸುಬ್ರಹ್ಮಣ್ಯ ಆರಾಧನೆ ಮಾಡುವುದರಿಂದ ಶುಭಫಲವನ್ನು ಕಂಡುಕೊಳ್ಳಬಹುದು. ಆದ್ದರಿಂದ ಶ್ರೇಯಸ್ಕರ ದಿಕ್ಕಿನ ಪ್ರಶ್ನೆ ಬಂದಾಗ ಪರಿಹಾರ ಕ್ರಮಗಳನ್ನು ಉಪಯಯೋಗಿಸಿಕೊಳ್ಳಬೇಕು.

ವ್ಯಾಪಾರ, ವ್ಯವಹಾರಗಳಿಗೆ ದಿಕ್ಕನ್ನು ನಿರ್ಧರಿಸುವಾಗ ವ್ಯಾಪಾರ ಮತ್ತು ವ್ಯವಹಾರಗಳ ರೀತಿಯ ಮೇಲೆ ನಿರ್ಧಾರ ಮಾಡಬೇಕಾಗುತ್ತದೆ. ಉದಾಹರಣೆಗೆ ಕಬ್ಬಿಣ ವ್ಯಾಪಾರಕ್ಕೆ ಪಶ್ಚಿಮ ದಿಕ್ಕು ಶುಭಕರ. ಆದ್ದರಿಂದ ಎಲ್ಲಾ 4 ದಿಕ್ಕುಗಳೂ ಶುಭವೇ, ಆದರೆ ನಮ್ಮ ಜೀವನಶೈಲಿಗೆ, ವ್ಯವಹಾರಕ್ಕೆ ಮತ್ತು ಭೂಮಿಯ ಮೇಲ್ಮೈ ಲಕ್ಷ ಣಕ್ಕೆ ಅನುಗುಣವಾಗಿ ನಾವು ಜೀವನ ನಡೆಸಬೇಕಾಗುತ್ತದೆ.