ಚಿನ್ನ ಉತ್ಪಾದನೆ ಗಣನೀಯ ಇಳಿಕೆ

ಗಣಿ ಕಂಪನಿಗೆ ವಾರ್ಷಿಕ ಗುರಿ ತಲುಪಲಾಗದ ಸಂಕಷ್ಟ

ಸೋಮಣ್ಣ ಗುರಿಕಾರ, ಹಟ್ಟಿ ಚಿನ್ನದಗಣಿ (ರಾಯಚೂರು)

ಸರಕಾರಿ ಸ್ವಾಮ್ಯದ ಹಟ್ಟಿ ಚಿನ್ನದಗಣಿ ಕಂಪನಿಯಲ್ಲಿ ಚಿನ್ನ ಉತ್ಪಾದನೆ ಪ್ರಮಾಣ ಗಣನೀಯ ಇಳಿದಿದೆ. ವಾರ್ಷಿಕ ಗುರಿ ತಲುಪಲು ಗಣಿ ಕಂಪನಿ ಹೆಣಗಾಡುತ್ತಿದೆ.

2015-16ನೇ ಸಾಲಿನಲ್ಲಿ 1,711 ಕೆ.ಜಿ. ಗುರಿಗೆ 1,310 ಕೆ.ಜಿ. ಚಿನ್ನ ಉತ್ಪಾದಿಸಲಾಗಿದೆ. ಈ ಸಂದರ್ಭದಲ್ಲಿ 6 ಲಕ್ಷ ಮೆಟ್ರಿಕ್‌ ಟನ್‌ ಅದಿರು ಉತ್ಪಾದನೆ ಗುರಿಯಲ್ಲಿ 5.84 ಲಕ್ಷ ಮೆಟ್ರಿಕ್‌ ಟನ್‌ ಸಾಧಿಸಲಾಗಿದೆ. ಕಳೆದ ಜುಲೈನಲ್ಲಿ ಮಾತ್ರ ಗುರಿಗಿಂತ ಹೆಚ್ಚು ಚಿನ್ನ ಉತ್ಪಾದಿಸಿದ್ದಕ್ಕೆ ಕಂಪನಿ ಸಮಾಧಾನಪಟ್ಟುಕೊಳ್ಳುವಂತಾಗಿದೆ. 2016ರ ಮಾರ್ಚ್‌ನಲ್ಲೂ ಉತ್ಪಾದನೆಯ ಪ್ರಮಾಣ ಗುರಿ ತಲುಪಲಾಗಿದೆ. ಉಳಿದ ತಿಂಗಳಲ್ಲಿ ಗುರಿಗಿಂತ ಅತೀ ಕಡಿಮೆ ಚಿನ್ನ ಉತ್ಪಾದನೆಯಾಗಿದ್ದಕ್ಕೆ ದಾಖಲೆಗಳು ಸಾಕ್ಷಿಯಾಗಿವೆ.

ಮಾಸಿಕವಾರು ವಿವರ:

2015-16ರ ಏಪ್ರಿಲ್‌ನಲ್ಲಿ 151ಕೆ.ಜಿ. ಗುರಿಗೆ 94 ಕೆ.ಜಿ. ಚಿನ್ನ ಉತ್ಪಾದಿಸಲಾಗಿದೆ. ಮೇ ನಲ್ಲಿ 145 ಕೆ.ಜಿ. ಗುರಿಯಲ್ಲಿ 99 ಕೆ.ಜಿ., ಜೂನ್‌ನಲ್ಲಿ 117 ಕೆ.ಜಿ.ಗುರಿಗೆ 98 ಕೆ.ಜಿ., ಜುಲೈನಲ್ಲಿ 100 ಕೆ.ಜಿ. ಗುರಿಯಲ್ಲಿ 142 ಕೆ.ಜಿ., ಆಗಸ್ಟ್‌ನಲ್ಲಿ 166 ಕೆ.ಜಿ. ಗುರಿಗೆ 115 ಕೆ.ಜಿ. ಹಾಗೂ ಸೆಪ್ಟೆಂಬರ್‌ನಲ್ಲಿ 151 ಕೆ.ಜಿ. ಗುರಿಗೆ 102 ಕೆ.ಜಿ., ನವೆಂಬರ್‌ನಲ್ಲಿ 120 ಕೆ.ಜಿ. ಗುರಿಗೆ 100 ಕೆ.ಜಿ., ಡಿಸೆಂಬರ್‌ನಲ್ಲಿ 146 ಕೆ.ಜಿ. ಗುರಿಯಲ್ಲಿ 116 ಕೆ.ಜಿ. ಚಿನ್ನ ಉತ್ಪಾದಿಸಲಾಯಿತು. 2016, ಜನವರಿಯಲ್ಲಿ 217 ಕೆ.ಜಿ ಗುರಿಗೆ 101 ಕೆ.ಜಿ., ಫೆಬ್ರವರಿಯಲ್ಲಿ 122 ಕೆ.ಜಿ. ಗುರಿಗೆ 100 ಕೆ.ಜಿ. ಹಾಗೂ ಮಾರ್ಚ್‌ನಲ್ಲಿ 144 ಕೆ.ಜಿ. ಗುರಿಗೆ 145 ಕೆ.ಜಿ. ಚಿನ್ನ ಉತ್ಪಾದಿಸಲಾಯಿತು. ಆದರೆ, ಅಕ್ಟೋಬರ್‌ನಲ್ಲಿ 127ಕೆ.ಜಿ. ಗುರಿಯಲ್ಲಿ ಕೇವಲ 92 ಕೆ.ಜಿ. ಚಿನ್ನ ಉತ್ಪಾದಿಸುವ ಮೂಲಕ ಕಳೆದ ಆರ್ಥಿಕ ವರ್ಷದಲ್ಲಿ ಅತೀ ಕಡಿಮೆ ಚಿನ್ನ ಉತ್ಪಾದಿಸಿದ ತಿಂಗಳು ಎನಿಸಿದೆ.

ಸಮನ್ವಯ ಕೊರತೆ:

ಚಿನ್ನ ಉತ್ಪಾದನೆ ಗುರಿ ತಲುಪುವಲ್ಲಿ ಅನ್ವೇಷಣಾ ವಿಭಾಗ ಮತ್ತು ಗಣಿ ವಿಭಾಗ ಪ್ರಮುಖ ಪಾತ್ರ ವಹಿಸುತ್ತವೆ. ಅನ್ವೇಷಣಾ ವಿಭಾಗದವರು ಸರ್ವೆಮಾಡಿ ಯಾವ ಭಾಗದಲ್ಲಿ ಎಷ್ಟು ಪ್ರಮಾಣದ ಚಿನ್ನದ ಅಂಶವಿದೆ ಎಂಬ ವರದಿ ನೀಡುತ್ತಾರೆ. ಈ ವರದಿ ಆಧರಿಸಿ, ಗಣಿ ವಿಭಾಗದ ಅಧಿಕಾರಿಗಳು, ನೌಕರರಿಂದ ಅದಿರನ್ನು ಹೊರತರುತ್ತಾರೆ. ಹೊರ ತಂದ ಅದಿರನ್ನು ಲೋಹ ವಿಭಾಗದಲ್ಲಿ ಸಂಸ್ಕರಿಸಿ, ಚಿನ್ನ ಉತ್ಪಾದಿಸಲಾಗುತ್ತದೆ. ಚಿನ್ನದ ಉತ್ಪಾದನೆಯ ಗುರಿ ಮುಟ್ಟಲಾಗುವುದಕ್ಕೆ ಅನ್ವೇಷಣಾ ವಿಭಾಗ ಹಾಗೂ ಗಣಿ ವಿಭಾಗದ ಮಧ್ಯೆ ಸಮನ್ವಯತೆ ಇಲ್ಲದಿರುವುದೇ ಕಾರಣ ಎಂಬ ಮಾತುಗಳೂ ಕೇಳಿಬಂದಿವೆ.

..................

ಕೋಟ್‌...

ಚಿನ್ನ ಉತ್ಪಾದನೆಯಲ್ಲಿ ಕಾರ್ಮಿಕರು ಶ್ರಮವಹಿಸಿ ದುಡಿಯುತ್ತಿದ್ದಾರೆ. ಕಡಿಮೆ ಚಿನ್ನ ಉತ್ಪಾದನೆಗೆ ಕಾರ್ಮಿಕರು ಕಾರಣರಲ್ಲ.

-ಚಂದ್ರಶೇಖರ್‌ (ತಾಂತ್ರಿಕ), ಕಾರ್ಯದರ್ಶಿ, ಹಚಿಗ ಸಿಬ್ಬಂದಿ ಹಾಗೂ ಕಾರ್ಮಿಕ ಸಂಘ

..............

*ಹಿಂದಿನ ವರ್ಷಗಳಲ್ಲಿ ಹೀಗೆ

2010-11ನೇ ಸಾಲಿನಲ್ಲಿ 2,220 ಕೆ.ಜಿ., 2011-12ನೇ ಸಾಲಿನಲ್ಲಿ 2,181 ಕೆ.ಜಿ., 2012-13ನೇ ಸಾಲಿನಲ್ಲಿ 1,582 ಕೆ.ಜಿ., 2013-14ನೇ ಸಾಲಿನಲ್ಲಿ 1,556 ಕೆ.ಜಿ., 2014-15ನೇ ಸಾಲಿನಲ್ಲಿ 1,429 ಕೆ.ಜಿ., 2015-16ನೇ ಸಾಲಿನಲ್ಲಿ 1,310 ಕೆ.ಜಿ. ಚಿನ್ನ ಉತ್ಪಾದಿಸಲಾಗಿದೆ.

............

ಆರ್‌ಸಿಎಚ್‌10ಎಚ್‌ಜಿಎಂ ಪಿ1:

ಹಟ್ಟಿಚಿನ್ನದಗಣಿ ಕಂಪನಿಯಲ್ಲಿನ ಅದಿರು ಸಂಸ್ಕರಣೆ ಬಾಲ್‌ ಮತ್ತು ಸಾಗ್‌ ಮಿಲ್‌.