ನಾಯ್ಕ್‌ ಭಾಷಣವೇ ಪ್ರೇರಣೆ ಎಂದು ಬಾಂಗ್ಲಾದೇಶದ ರಾಜಧಾನಿ ಢಾಕಾದ ಆರ್ಟಿಸನ್‌ ಬೇಕರಿ ಮೇಲೆ ಇತ್ತೀಚೆಗೆ ದಾಳಿ ನಡೆಸಿದ ಉಗ್ರರು ಒಪ್ಪಿಕೊಂಡಿರುವ ಬೆನ್ನಿಗೇ, ಮುಂಬಯಿ ಯುವಕರಿಗೂ ಇವರೇ ಪ್ರೇರಣೆ ಎಂಬ ವಿಷಯ ಚರ್ಚೆಗೆ ಬಂದಿದೆ.
ಸಿರಿಯಾ ತಲುಪಿದ್ದ ನಾಲ್ವರ ಪೈಕಿ ಅರೀಬ್‌ ಮಜೀದ್‌ ಕಳೆದ ವರ್ಷ ಅಲ್ಲಿಂದ ತಪ್ಪಿಸಿಕೊಂಡು ಭಾರತಕ್ಕೆ ವಾಪಸಾಗಿದ್ದ. ನಾಯ್ಕ್‌ ಭಾಷಣ ಕೇಳಿದ ನಂತರ ಇಸ್ಲಾಂ ಬಗ್ಗೆ ಆಳವಾದ ಜ್ಞಾನ ದೊರೆತು ಐಸಿಸ್‌ ಸೇರಲು ಪ್ರೇರಣೆ ದೊರೆಯಿತು ಎಂದು ಬಂಧಿತ ಮಜೀದ್‌ ಎನ್‌ಐಎ ವಿಚಾರಣೆ ವೇಳೆ ಹೇಳಿದ್ದ.
'ನಾಯ್ಕ್‌ ಭಾಷಣ ಕೇಳಿದ ನಂತರ ನನ್ನಲ್ಲಿ ಧಾರ್ಮಿಕ ಭಾವನೆ ಜಾಗೃತಗೊಂಡಿತು. 2014ರಲ್ಲಿ ಐಎಸ್‌ ಬಗ್ಗೆ ತಿಳಿಯಿತು. ಫೇಸ್‌ಬುಕ್‌ ಹಾಗೂ ಇತರ ಸಾಮಾಜಿಕ ಜಾಲ ತಾಣಗಳ ಮೂಲಕ ಐಸಿಸ್‌ ಪರ ಒಲವಿರುವ ಟರ್ಕಿ, ಆಸ್ಟ್ರೇಲಿಯಾ, ಸೌದಿ ಅರೇಬಿಯಾ, ಇರಾಕ್‌ ಹಾಗೂ ಅಮೆರಿಕದಲ್ಲಿದ್ದವರ ಜತೆ ಸಂಪರ್ಕ ಬೆಳೆಯಿತು,' ಎಂದು ಮಜೀದ್‌ ಎನ್‌ಐಎಗೆ ತಿಳಿಸಿದ್ದ.
ಕಲ್ಯಾಣ್‌ನ ಮಜೀದ್‌, ಫಹಾದ್‌ ಶೇಖ್‌ ಹಾಗೂ ಅಮನ್‌ ತಂಡೆಲ್‌ ಸ್ಥಿತಿವಂತ ಕುಟುಂಬದವರಾಗಿದ್ದು, ಎಲ್ಲರೂ ಎಂಜಿನಿಯರಿಂಗ್‌ ಓದುತ್ತಿದ್ದರು. ಶಹೀಮ್‌ ಟಂಕಿ ಮಾತ್ರ ಹೆಚ್‌ಎಸ್‌ಸಿನಲ್ಲಿ ಅನುತ್ತೀರ್ಣನಾಗಿದ್ದ. ಹೋರಾಟದಲ್ಲಿ ಆತ ಮೃತಪಟ್ಟಿದ್ದಾನೆ ಎಂದು ಹೇಳಲಾಗಿದೆ. ಶೇಖ್‌ ಇತ್ತೀಚೆಗೆ ತನ್ನ ಕುಟುಂಬವನ್ನು ಸಂಪರ್ಕಿಸಿದ್ದ ಎನ್ನಲಾಗಿದ್ದು, ತಂಡೆಲ್‌ ಸುಳಿವಿಲ್ಲ.
ಬಿಹಾರದಲ್ಲೂ ನಾಯ್ಕ್‌ ಪ್ರಭಾವ:
ಬಿಹಾರದ ದರ್ಭಾಂಗ್‌ನಲ್ಲಿ 2010-11 ನಡೆಸಿದ ಕಾರ್ಯಾಚರಣೆ ವೇಳೆ ಇಂಡಿಯನ್‌ ಮುಜಾಹಿದ್ದೀನ್‌ ಘಟಕವಾಗಿದ್ದ ದರೂಲ್‌ ಕಿತಾಬ್‌ ಸುನ್ನಾ ಗ್ರಂಥಾಲಯದಲ್ಲಿ ನಾಯ್ಕ್‌ ಭಾಷಣದ ಪ್ರತಿಗಳು ಪತ್ತೆಯಾಗಿದ್ದವು. 2012ರಲ್ಲಿ ಬಂಧಿತನಾದ ಯಾಸಿನ್‌ ಭಟ್ಕಳ್‌ ಸಹ ಪದೇಪದೆ ಈ ಗ್ರಂಥಾಲಯಕ್ಕೆ ಭೇಟಿ ನೀಡುತ್ತಿದ್ದ.
ಕಲ್ಯಾಣ್‌: ಐಸಿಸ್‌ ಸೇರಿದ ಕಲ್ಯಾಣ್‌ನ ನಾಲ್ಕು ಯುವಕರಿಗೂ ಮುಂಬಯಿ ಮೂಲದ ಮುಸ್ಲಿಂ ಬೋಧಕ ಜಾಕೀರ್‌ ನಾಯ್ಕ್‌ ಭಾಷಣವೇ ಪ್ರೇರಣೆ ಎನ್ನಲಾಗಿದೆ.