ನಾರಿಗೆ ಆನ್‌ಲೈನ್ ಕಿರುಕುಳ; ಕಿಡಿಗೇಡಿಗಳ ವಿರುದ್ಧ ಕ್ರಮ: ಮೇನಕಾ

ಹೊಸದಿಲ್ಲಿ: ಮಹಿಳೆಯರನ್ನು ಗುರಿಯಾಗಿಸಿಕೊಂಡು ಸಾಮಾಜಿಕ ಜಾಲತಾಣಗಳಲ್ಲಿ ಅಶ್ಲೀಲ ಹಾಗೂ ನಿಂದಾತ್ಮಕ ಟೀಕೆಗಳನ್ನು ಪೋಸ್ಟ್ ಮಾಡುವವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು, ಎಂದು ಮಹಿಳಾ ಮತ್ತು ಮಕ್ಕಳ ಕಲ್ಯಾಣ ಸಚಿವೆ ಮೇನಕಾ ಗಾಂಧಿ ಎಚ್ಚರಿಸಿದ್ದಾರೆ.

ಇಂಥ ಕುಕೃತ್ಯವೆಸಗುವವರನ್ನು ಶಿಕ್ಷಿಸಲು ಗೃಹ ಹಾಗೂ ಮಾಹಿತಿ ತಂತ್ರಜ್ಞಾನ ಸಚಿವಾಲಯಗಳ ನೆರವು ಪಡೆಯುವುದಾಗಿ, ಮೇನಕಾ ಅಭಿಯಾನಕ್ಕೆ ಚಾಲನೆ ನೀಡಿದ ನಂತರ ಹೇಳಿದರು.

ಈ ಸಮಸ್ಯೆ ಬಗೆಹರಿಸಲು ಸಹಕರಿಸುವಂತೆ ಫೇಸ್‌ಬುಕ್ ಹಾಗೂ ಟ್ವೀಟರ್‌ ಅಧಿಕಾರಿಗಳಿಗೆ ಸಚಿವೆ ಕರೆ ನೀಡಿದ್ದಾರೆ. ಈ ಬಗ್ಗೆ ಶುಕ್ರವಾರ ಟ್ವೀಟರ್ ಅಧಿಕಾರಿಗಳು ಸಚಿವಾಲಯವನ್ನು ಭೇಟಿ ಮಾಡಲಿದ್ದಾರೆಂದು 'ಎಕಾನಾಮಿಕ್ಸ್ ಟೈಮ್ಸ್‌'ಗೆ ಸಚಿವಾಲಯದ ಮೂಲಗಳು ತಿಳಿಸಿದೆ.

ಮೇಲ್‌ಗೆ ದೂರು ಸಲ್ಲಿಸಿ:

ನೊಂದವರು ತಮ್ಮ ವೈಯಕ್ತಿಕ ಮೇಲ್ (gandhim@nic.in) ಅಥವಾ IamTrollingHelp ಹ್ಯಾಷ್ ಟ್ಯಾಗಿನೊಂದಿಗೆ ದೂರು ನೀಡಬಹುದೆಂದು ಮೇನಕಾ ಟ್ವೀಟ್ ಮಾಡಿದ್ದಾರೆ. ಬುಧವಾರ ಸಂಜೆಯೊಳಗೆ ಸುಮಾರು ಆರು ದೂರುಗಳು ದಾಖಲಾಗಿದ್ದವು.

ಅರವಿಂದ್ ಕೇಜ್ರಿವಾಲ್ ಹೆಸರಿನಲ್ಲಿ ನಕಲಿ ಟ್ವೀಟ್ ಖಾತೆಯೊಂದನ್ನು ತೆರೆದು, ತಮ್ಮ ಹೆಸರಿನಲ್ಲಿ ಅಶ್ಲೀಲ ಪೋಸ್ಟ್‌ಗಳನ್ನು ಹಾಕಲಾಗಿದೆಯೆಂದು ಒಂದು ದೂರಿನಲ್ಲಿ ಮಹಿಳೆಯೊಬ್ಬರು ನೋವು ತೋಡಿಕೊಂಡಿದ್ದಾರೆ.

ಚೆನ್ನೈ ಮೂಲದ ಮಾಹಿತಿ ತಂತ್ರಜ್ಞಾನ ಉದ್ಯೋಗಿಯೊಬ್ಬರು, 'ನನ್ನ ವಿರುದ್ಧ ಅತ್ತಿಗೆ-ನಾದಿನಿಯರು ಅವಮಾನಕಾರಿ ಹೇಳಿಕೆಗಳನ್ನು ಪೋಸ್ಟ್ ಮಾಡುತ್ತಾರೆ,' ಎಂದು ಆರೋಪಿಸಿದ್ದಾರೆ.

ಇಂಥ ಪ್ರಕರಣಗಳನ್ನು ರಾಷ್ಟ್ರೀಯ ಮಹಿಳಾ ಆಯೋಗದ ಗಮನಕ್ಕೂ ತರಲಾಗುವುದೆಂದು ಮೇನಕಾ ಹೇಳಿದ್ದಾರೆ.

ಬಾಲಿವುಡ್ ಗಾಯಕಿ ಸೋನಾ ಮಹಾಪಾತ್ರ ವಿರುದ್ಧ ನಿಂದಾತ್ಮಕ ಟೀಕೆ ಮತ್ತು ಪತ್ರಕರ್ತೆಯೊಬ್ಬರ ವಿರುದ್ಧ ಗಾಯಕ ಅಭಿಜೀತ್ ಅಶ್ಲೀಲ ಪೋಸ್ಟ್ ಹಾಕಿದ ಆರೋಪ ಕೇಳಿ ಬಂದ ನಂತರ ಮೇನಕಾ ಇಂಥದ್ದೊಂದು ಅಭಿಯಾನ ಆರಂಭಿಸಿದ್ದಾರೆ.