ಪ್ರೀತಿಗೆ ಹಲವು ಭಾವಗಳು. ಬಹುತೇಕ ಸಿನಿಮಾಗಳಲ್ಲಿ ಈಗಾಗಲೇ ಇದು ವ್ಯಕ್ತವಾಗಿದೆ. ಅಂತಹ ಸಿನಿಮಾಗಳ ಸಾಲಿಗೆ 'ಬೀಟ್‌' ಹೊಸದಾಗಿ ಸೇರ್ಪಡೆ ಆಗಿದೆ. ಚಿತ್ರದಲ್ಲಿ ಹಲವು ಕೊರತೆಗಳಿದ್ದರೂ, ಇದೊಂದು ಮನೋರೋಗ ಹಿನ್ನೆಲೆಯ ಚಿತ್ರವಾಗಿದ್ದರಿಂದ, ಸ್ವಲ್ಪ ಕುತೂಹಲ ಮೂಡಿಸುತ್ತದೆ. ಜತೆಗೆ ತೆಳು ನಿರೂಪಣೆಯಿಂದಾಗಿ ಕತೆಯು ಹೃದಯಕ್ಕೆ ತಾಗದೇ ಉಳಿಯುತ್ತದೆ.
ಶ್ರೀರಾಮಪುರದ ಹುಡುಗ ಭರತ್‌ (ಪಟ್ರೆ ಅಜಿತ್‌) ಮತ್ತು ಮಲ್ಲೇಶ್ವರಂನ ಹುಡುಗಿ ತನು (ಹರ್ಷಿಕಾ ಪೂಣಚ್ಚ) ನಡುವಿನ ಪ್ರೇಮಕಥೆ ಇಲ್ಲಿದೆ. ಹಾಗಂತ ಇಲ್ಲಿ ಅಪ್ಪಟ ಲವ್‌ಸ್ಟೋರಿ ಇದೆ ಎಂದು ಹೇಳಲಾಗದು. ಈಗಾಗಲೇ ತೆರೆಯ ಮೇಲೆ ಬಂದ ಹಲವು ಸಿನಿಮಾಗಳ ಒಂದೊಂದು ಎಳೆಯನ್ನು ತಗೆದುಕೊಂಡು ಚಿತ್ರಕತೆ ಹೆಣೆದಂತಿದೆ. ಹೀಗಾಗಿ ಕಥಾ ನಾಯಕ ಮತ್ತು ನಾಯಕಿ ಬಹುತೇಕವಾಗಿ ಗಾಂಧಿನಗರದ (ಸ್ಯಾಂಡಲ್‌ವುಡ್‌)ವ್ಯಾಪ್ತಿಯಲ್ಲೇ ಬೀಟ್‌ ಹೊಡೆಯುತ್ತಾರೆ.
ಹಾಗಂತ ಇಡೀ ಸಿನಿಮಾ ಚೆನ್ನಾಗಿಲ್ಲ ಅಂತ ಹೇಳುವುದಕ್ಕೆ ಆಗದು. ರವಿ ಬಸ್ರೂರ ಸಂಗೀತದಲ್ಲಿ ಮೂಡಿ ಬಂದ ಹಾಡುಗಳನ್ನು, ಸಿನಿಮಾಟೋಗ್ರಾಫರ್‌ ಸಿನಿಟೆಕ್‌ ಸೂರಿ ಸುಂದರವಾಗಿ ತೋರಿಸಿದ್ದಾರೆ. ಪಟ್ರೆ ಅಜೀತ್‌ ಮತ್ತು ಹರ್ಷಿಕಾ ಕ್ಯೂಟ್‌ ಜೋಡಿಯಾಗಿ ಕಂಡಿದ್ದಾರೆ. ಖಳನಟ ಕಡ್ಡಿ ವಿಶ್ವ ಮೂರ್ನಾಲ್ಕು ದೃಶ್ಯಗಳಲ್ಲಷ್ಟೇ ನಟಿಸಿದ್ದರೂ, ಗಮನ ಸೆಳೆಯುತ್ತಾರೆ. ನಾಯಕಿಯ ತಂದೆ ಪಾತ್ರವನ್ನು ಶ್ರೀನಿವಾಸ್‌ ಪ್ರಭು ಸಮರ್ಥವಾಗಿ ನಿಭಾಯಿಸಿದ್ದಾರೆ.
ನಾಯಕನ ಪಾತ್ರಕ್ಕೆ ಸಮರ್ಥವಾದ ಹಿನ್ನೆಲೆ ಇಲ್ಲ. ತನ್ನ ಮಗಳು ಪ್ರೀತಿಸುವ ಹುಡುಗನನ್ನು ತಿರಸ್ಕರಿಸುವ ತಂದೆಯು, ಅದಕ್ಕೆ ಕಾರಣ ಹೇಳುವುದಿಲ್ಲ. ಬೇಕು ಅಂತಲೇ ಹಾಡುಗಳನ್ನು ಸೇರಿಸಿದಂತಿದೆ ಸ್ಕ್ರೀನ್‌ ಪ್ಲೇ. ಹೀಗಾಗಿ ಚಿತ್ರಕ್ಕೆ ನೋಡಿಸಿಕೊಂಡು ಹೋಗುವ ಗುಣವಿಲ್ಲ.
ನಿರ್ದೇಶಕ ಘನಶ್ಯಾಮ್‌ ಅವರು ಏನೆಲ್ಲ ಹೇಳಲು ಪ್ರಯತ್ನಿಸಿದ್ದಾರೆ. ಆದರೆ, ಅವರಿಗೆ ಏನೂ ಹೇಳುವುದಕ್ಕೆ ಆಗಿಲ್ಲ. ಹೀಗಾಗಿ ತಮ್ಮ ಚಿತ್ರವನ್ನೇ ಈಗಾಗಲೇ ರಿಲೀಸ್‌ ಆದ ಸಿನಿಮಾಗಳ ಸುತ್ತಲೇ ಗಿರಕಿ ಹೊಡೆಸುತ್ತಾರೆ.
- ಶರಣು ಹುಲ್ಲೂರು