* ಪದ್ಮಾ ಶಿವಮೊಗ್ಗ
ಮಧುರೈನ ಹುಸೈನ್ ಸ್ಟಾಲ್‌ನಲ್ಲಿ ಸಿಗುವ ಜಿಲ್ ಜಿಲ್ ಜಿಗರ್ ಥಂಡಾ ಎನ್ನುವ ಸ್ಪೆಷಲ್ ಡ್ರಿಂಕ್ಸ್ ತಮಿಳುನಾಡಿನಲ್ಲಿ ಜನಪ್ರಿಯ. ಕೋಲ್ಡ್ ಮತ್ತು ಹಾಟ್ ಎರಡರ ಸಮ್ಮಿಶ್ರವಿದು. ಇದೇ ಹೆಸರಿನ ತಮಿಳು ಚಿತ್ರದ ರಿಮೇಕ್ ಕನ್ನಡದ ಜಿಗರ್ ಥಂಡ. ಬಿಸಿ ಮತ್ತು ತಣ್ಣನೆಯ ಪೇಯದಂತೆಯೇ ರೌಡಿಸಂ ಮತ್ತು ಕಾಮಿಡಿ ಎರಡರ ಸಮ್ಮಿಶ್ರಣವಾಗಿ ಎಲ್ಲೂ ಬೋರಾಗದಂತೆ ಮನರಂಜಿಸುವಲ್ಲಿ ಗೆದ್ದಿದೆ. ನಾಯಕ ನಟ ರಾಹುಲ್‌ಗೆ ಬ್ರೇಕ್ ಕೊಡಬಹುದಾದ ಮತ್ತೂ ಖಳನಟ ರವಿಶಂಕರ್ ಚಿತ್ರಬದುಕಿನಲ್ಲಿ ಅಪರೂಪ ಎನ್ನಬಹುದಾದ ಚಿತ್ರವಿದು.
ಸಿನಿಮಾ ನಿರ್ದೇಶಕನಾಗಲು ಬಯಸುವ ರಾಹುಲ್, ನಿರ್ಮಾಪಕ (ಕೆ. ಮಂಜು) ಬಯಸುವಂತೆ ಲಾಂಗು ಮಚ್ಚು ಚಿತ್ರದ ಕತೆ ಬರೆಯಲು ರಿಯಲ್ ರೌಡಿ ಆರ್ಮುಗಂ (ರವಿಶಂಕರ್) ನನ್ನು ಹುಡುಕಿಕೊಂಡು ರುದ್ರಾಪುರಕ್ಕೆ ಬರುತ್ತಾನೆ. ಆರ್ಮುಗಂ ಎಂದರೆ ಕುರಿ ಕೋಳಿ ಕಡಿದಂತೆ ಮನುಷ್ಯನನ್ನು ಕೊಚ್ಚುವವನು. ತನ್ನ ಬಗ್ಗೆ ಪತ್ರಿಕೆಯಲ್ಲಿ ಲೇಖನ ಬರೆದವನನ್ನೇ ಸುಟ್ಟವನು. ಇಡೀ ಊರನ್ನೇ ನಡುಗುವಂತೆ ಮಾಡಿದವನು. ಇಂಥ ರೌಡಿಯ ಜೀವನದ ಕತೆಯನ್ನು ತಿಳಿದುಕೊಳ್ಳಲು ರಾಹುಲ್ ಯಾರ‌್ಯಾರ ಹಿಂದೆಯೋ ಬೀಳುತ್ತಾನೆ. ಹೀಗೆ ಸಿಕ್ಕವಳು ಸೀರೆ ಕಳ್ಳಿ ಸಂಯುಕ್ತಾ ಹೊರನಾಡು. ಇವರಿಬ್ಬರ ನಡುವೆ ಕ್ಯೂಟ್ ಲವ್. ಗೆಳೆಯ ಚಿಕ್ಕಣ್ಣನ ಜತೆ ಆರ್ಮುಗಂ ಬಗ್ಗೆ ಮಾಹಿತಿ ಸಂಗ್ರಹಿಸಲು ಹರಸಾಹಸ ಮಾಡಿ ರೌಡಿ ಕೈಯಲ್ಲಿ ಸಿಕ್ಕಿ ಬೀಳುತ್ತಾರೆ. ಮುಂದೆ ಕಾದಿದೆ ಸಖತ್ ಟ್ವಿಸ್ಟ್.
ರಾಕ್ಷಸನಂಥ ಆರ್ಮುಗಂನನ್ನು ಕಾಮಿಡಿ ಪೀಸ್ ಮಾಡಿ ತಿರುಗೇಟು ನೀಡಲು ರಾಹುಲ್ ಏನು ತಂತ್ರ ಮಾಡುತ್ತಾನೆ? ಆರ್ಮುಗಂ ತನ್ನ ಖತರ್‌ನಾಕ್ ಕಸುಬನ್ನು ಬಿಡಲು ಏನು ಕಾರಣ ಎನ್ನುವುದೇ ಸಿನಿಮಾ. ಪಕ್ಕಾ ಕಮರ್ಷಿಯಲ್ ಚಿತ್ರ. ಮಿಕ್ಕಿ ಮೌಸ್ ಆಟದಂತಿದೆ. ನಟ ರಾಹುಲ್ ಪಾತ್ರಕ್ಕೆ ಹೇಳಿ ಮಾಡಿಸಿದಂತೆ ಇದ್ದಾರೆ. ಮುಗ್ಧ ಮುಖದಿಂದ, ಉತ್ತಮ ಅಭಿನಯದಿಂದ ಫುಲ್ ಮಾರ್ಕ್ಸ್ ಪಡೆಯುತ್ತಾರೆ. ಇನ್ನು ರವಿಶಂಕರ್‌ದು ರಾಹುಲ್‌ಗಿಂತ ಒಂದು ಪಟ್ಟು ಹೆಚ್ಚೇ ಎನ್ನಬಹುದಾದ ಪಾತ್ರ. ಒಬ್ಬ ನಟನಿಗೆ ಇಂಥ ಪಾತ್ರ ಸಿಗೋದೇ ಅಪರೂಪ. ವೆರೈಟಿ ಅವತಾರದಲ್ಲಿ ರವಿಶಂಕರ್ ಮಿಂಚಿದ್ದಾರೆ. ಸಾಧುಕೋಕಿಲಾ ನಟನೆ ಕಲಿಸುವ ಗುರುವಿನ ಪಾತ್ರದಲ್ಲಿ ತಮ್ಮ ಮೆಚ್ಯೂರ್ಡ್‌ ಅಭಿನಯದಿಂದ ಎಲ್ಲರ ಹೊಟ್ಟೆ ಹುಣ್ಣಾಗುವಂತೆ ನಗಿಸುತ್ತಾರೆ. ಚಿಕ್ಕಣ್ಣನ ಡೈಲಾಗ್ ಸಕತ್ತಾಗೇ ಪಂಚ್ ಕೊಡುತ್ತದೆ. ನಾಯಕಿಯಾಗಿ ಹೆಚ್ಚು ಪ್ರಾಮುಖ್ಯತೆ ಇರದಿದ್ರೂ ಸಂಯುಕ್ತಾ ಹೊರನಾಡು ಮುದ್ದು ಮುಖ ಇಷ್ಟವಾಗುತ್ತದೆ. ಉಳಿದಂತೆ ಎಲ್ಲಾ ನಟರು ಉತ್ತಮವಾಗೇ ಅಭಿನಯಿಸಿದ್ದಾರೆ. ಅತಿಥಿ ಪಾತ್ರದಲ್ಲಿ ಇನ್ನೊಬ್ಬ ನಟ ಕಾಣಿಸಿಕೊಂಡು ಸರ್ಪ್ರೈಸ್ ಕೊಡುತ್ತಾರೆ. ವಿದೇಶಿ ಸಂಗೀತಗಾರ ತಂಡದ ಜತೆ ಅರ್ಜುನ್ ಜನ್ಯ ನೀಡಿರುವ ಹಿನ್ನೆಲೆ ಸಂಗೀತ ಗಮನ ಸೆಳೆಯುತ್ತದೆ.
ಎದುರಾಳಿಯನ್ನು ಕೊಲ್ಲಲು ಮಕ್ಕಳಂತೆ ರೌಡಿ ಗ್ಯಾಂಗ್‌ನ ಹುಡುಗರು ಕಿತ್ತಾಡುವಂತೆಯೇ, ಕೆಲ ಅಸಹಜ ಮತ್ತು ಅತಿರೇಕ ಎನ್ನಿಸುವ ಸನ್ನಿವೇಶಗಳಿವೆ. ಇದು ರಿಮೇಕ್ ಎನ್ನುವುದೇ ಮೈನಸ್ ಪಾಯಿಂಟ್. ಒಟ್ಟಾರೆ ಕುಟುಂಬ ಸಮೇತ ನೋಡೋಕೆ ಅಡ್ಡಿಯಿಲ್ಲ.
ಕನ್ನಡ ಚಿತ್ರ