ದಕ್ಷಿಣ ಚೀನಾ ಸಮುದ್ರದಲ್ಲಿ ವಿವಾದದ ಅಲೆಗಳು

ದಕ್ಷಿಣ ಚೀನಾ ಸಮುದ್ರ ವಿವಾದಕ್ಕೆ ಸಂಬಂಧಿಸಿದಂತೆ ಹಾಗ್ ಮೂಲದ ನ್ಯಾಯಾಧೀಕರಣದ ತೀರ್ಪು ಇನ್ನೇನು ಹೊರಬೀಳಲಿದೆ. ಆ ತೀರ್ಪಿಗೆ ಬದ್ಧವಾಗಿರಬೇಕೆಂದು ಚೀನಾದ ಮೇಲೆ ಒತ್ತಡ ಹೇರುವ ಪ್ರಯತ್ನ ಮಾಡುತ್ತಿದೆ ಅಮೆರಿಕ. ಆದರೆ ತಾನು ಈ ತೀರ್ಪಿಗೆ ತಲೆಬಾಗುವುದಿಲ್ಲ ಎನ್ನುತ್ತಿರುವ ಚೀನಾ ತನ್ನ ಈ ನಿರ್ಧಾರಕ್ಕೆ ಆಫ್ರಿಕಾ ಮತ್ತು ಮಧ್ಯಪ್ರಾಚ್ಯ ರಾಷ್ಟ್ರಗಳ ಬೆಂಬಲ ಗಳಿಸುವ ಪ್ರಯತ್ನ ಮಾಡುತ್ತಿದೆ.

-----

ಒಂದೆಡೆ ವಾಷಿಂಗ್ಟನ್‌ ಮತ್ತು ಬೀಜಿಂಗ್‌ ದಕ್ಷಿಣ ಚೀನಾ ಸಮುದ್ರದ ವಿಷಯವಾಗಿ ತಮ್ಮ ನಿಲುವನ್ನು ಗಟ್ಟಿಗೊಳಿಸುತ್ತಾ ಸಾಗುತ್ತಿರುವ ವೇಳೆಯಲ್ಲೇ, ಅಮೆರಿಕದ ಮಿತ್ರ ರಾಷ್ಟ್ರವಾಗಿರುವ ಫಿಲಿಪ್ಪೀನ್ಸ್‌ ಚೀನಾದ ವಿರುದ್ಧ ಘೋಷಣೆ ಮೊಳಗಿಸುವ ಮೂಲಕ ಹಲವಾರು ದೇಶಗಳಿಗೆ ರಾಜತಾಂತ್ರಿಕ ಸಂದಿಗ್ಧತೆಯನ್ನು ತಂದಿಟ್ಟಿದೆ.

ಈ ವಿಷಯವಾಗಿ ಹಾಗ್‌ ಮೂಲದ ನ್ಯಾಯಾಧೀಕರಣದ ತೀರ್ಪು ಇನ್ನೇನು ಹೊರಬೀಳಲಿದೆ. ಆ ತೀರ್ಪಿಗೆ ಬದ್ಧವಾಗಿರಬೇಕೆಂದು ಚೀನಾದ ಮೇಲೆ ಒತ್ತಡ ಹೇರುವ ಪ್ರಯತ್ನ ಮಾಡುತ್ತಿದೆ ಅಮೆರಿಕ. ಆದರೆ ತಾನು ಈ ತೀರ್ಪಿಗೆ ತಲೆಬಾಗುವುದಿಲ್ಲ ಎನ್ನುತ್ತಿರುವ ಚೀನಾ ತನ್ನ ಈ ನಿರ್ಧಾರಕ್ಕೆ ಆಫ್ರಿಕಾ ಮತ್ತು ಮಧ್ಯಪ್ರಾಚ್ಯ ರಾಷ್ಟ್ರಗಳ ಬೆಂಬಲ ಗಳಿಸುವ ಪ್ರಯತ್ನ ಮಾಡುತ್ತಿದೆ. ಆದಾಗ್ಯೂ ಅಮೆರಿಕ ಸಂಸ್ಥಾನವಂತೂ ವಿಶ್ವಸಂಸ್ಥೆಯ ಸಾಗರ ಕಾನೂನು ಮಂಡಳಿಯ ಭಾಗವಾಗಿರುವ ರಾಷ್ಟ್ರವಲ್ಲ . ನ್ಯಾಯಾಧಿಕರಣವಿರುವುದು ಈ ಮಂಡಳಿಯ ಅಡಿ. ಆದರೂ ಚೀನಾ ಅಂತಾರಾಷ್ಟ್ರೀಯ ನಿಯಮಗಳಿಗೆ ತಲೆಬಾಗಬೇಕು ಎಂದು ಬಯಸುತ್ತಿದೆ ಅಮೆರಿಕ. ದಕ್ಷಿಣ ಚೀನಾ ಸಮುದ್ರ ಪ್ರದೇಶ ವ್ಯಾಪ್ತಿಯ ರಾಷ್ಟ್ರಗಳ ಅಭಿಪ್ರಾಯ ಕೂಡ ಇಲ್ಲಿ ಮುಖ್ಯವಾಗುತ್ತದೆ. ಇದೇನೇ ಇದ್ದರೂ ಈ ವಿವಾದದ ಒಟ್ಟಾರೆ ಫಲಿತಾಂಶ ನಿಂತಿರುವುದು, ಅಂತಾರಾಷ್ಟ್ರೀಯ ಸಮುದಾಯದ ಪ್ರತಿಕ್ರಿಯೆಯ ಮೇಲೆಯೇ.

-ಆಸಿಯಾನ್‌ ರಾಷ್ಟ್ರಗಳ ಭಿನ್ನ ನಿಲುವು -

ಆಗ್ನೇಯ ಏಷ್ಯನ್‌ ರಾಷ್ಟ್ರಗಳ ಒಕ್ಕೂಟ(ಆಸಿಯಾನ್‌): ಫಿಲಿಪ್ಪೀನ್ಸ್‌ ಅನ್ನೂ ಒಳಗೊಂಡಿರುವ ಈ ಒಕ್ಕೂಟ ದಕ್ಷಿಣ ಚೀನಾ ಸಮುದ್ರದ ಸಮಸ್ಯೆಗೆ ವರ್ಷಗಳಿಂದ ಪರಿಹಾರ ಕಂಡುಕೊಳ್ಳಲು ಪ್ರಯತ್ನಿಸುತ್ತಿದೆಯಾದರೂ, ಯಾವುದೇ ಪ್ರಯೋಜನವಾಗಿಲ್ಲ. ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮ, ಫೆಬ್ರವರಿ ತಿಂಗಳಲ್ಲಿ ಆಸಿಯಾನ್‌ನ ನಾಯಕರನ್ನು ಭೇಟಿಯಾದಾಗ, ಬಹುತೇಕರು ತಾವು ವಿಶ್ವಸಂಸ್ಥೆಯ 'ರಾಜತಾಂತ್ರಿಕ ಪ್ರಕ್ರಿಯೆಗಳು ಮತ್ತು ಕಾನೂನಿಗೆ ಗೌರವ ಕೊಡುವುದಾಗಿ' ಹೇಳಿದರು. ಆದರೆ ಚೀನಾ ಪರ ರಾಷ್ಟ್ರಗಳಾದ ಕಾಂಬೋಡಿಯಾ ಮತ್ತು ಲಾವೋಸ್‌ ಮಾತ್ರ ಇದಕ್ಕೆ ಒಪ್ಪಿಗೆ ನೀಡಲು ನಿರಾಕರಿಸಿಬಿಟ್ಟವು. ಚೀನಾದೊಂದಿಗೆ ಹಲವಾರು ವರ್ಷಗಳಿಂದ ಜಟಾಪಟಿಗಿಳಿದಿರುವ ವಿಯೆಟ್ನಾಂ ತಾನು ಈ ವಿಷಯದಲ್ಲಿ ಫಿಲಿಪ್ಪೀನ್ಸ್‌ನ ಪರವಿರುವುದಾಗಿ ಸ್ಪಷ್ಟವಾಗಿ ನ್ಯಾಯಾಧಿಕರಣಕ್ಕೆ ಹೇಳಿದೆ. ಆದರೆ ಚೀನಾದ ದ್ವೇಷ ಕಟ್ಟಿಕೊಳ್ಳಲು ಹೆದರುವ ಮಲೇಷ್ಯಾ ಮತ್ತು ಬ್ರುನೈ ದಕ್ಷಿಣ ಚೀನಾ ಸಮುದ್ರದ ಕುರಿತು ಮಾತನಾಡುವುದರಿಂದ ದೂರವೇ ಉಳಿದಿವೆ. ಸಿಂಗಾಪೂರ್‌ ಮತ್ತು ಇಂಡೋನೇಷ್ಯಾ ಈ ಪ್ರದೇಶದ ಮೇಲೆ ಹಕ್ಕುಸ್ವಾಮ್ಯ ಸಾಧಿಸುವ ಪ್ರಯತ್ನ ಮಾಡಿಲ್ಲವಾದರೂ, ಅವುಗಳ ನಿಲುವು ಜೋರಾಗಿಯೇ ವ್ಯಕ್ತವಾಗಿದೆ. ಇದೆಲ್ಲದರ ನಡುವೆ ಫಿಲಿಪ್ಪೀನ್ಸ್‌ನ ನಿಲುವೇ ಇನ್ನೂ ಅಸ್ಪಷ್ಟವಾಗಿದೆ. ಇದೇ ಜೂನ್‌ 30ರಂದು ಅಲ್ಲಿ ಹೊಸ ಸರಕಾರ ಅಧಿಕಾರಕ್ಕೆ ಬರಲಿದೆ. ಅಧ್ಯಕ್ಷಾಕಾಂಕ್ಷೀ ರೋಡ್ರಿಗೋ ಅವರು ಚೀನಾದೊಂದಿಗೆ ಮತ್ತೊಮ್ಮೆ ದ್ವಿಪಕ್ಷೀಯ ಮಾತುಕತೆ ಆರಂಭಿಸಲು ಉತ್ಸುಕತೆ ತೋರಿಸುತ್ತಿದ್ದಾರೆ.

- ರಷ್ಯಾ-

ಈ ವಿವಾದದಲ್ಲಿ ಚೀನಾದ ಅತಿ ದೊಡ್ಡ ಬೆಂಬಲಿಗ ರಾಷ್ಟ್ರವೆಂದರೆ ರಷ್ಯಾ. ಅಮೆರಿಕದ ಪ್ರಮುಖ ಟೀಕಾಕಾರ ರಾಷ್ಟ್ರವಾಗಿರುವ ರಷ್ಯಾ, ಈ ನಿಲುವು ತಾಳಿರುವುದು ಸಹಜವೇ. ಇತ್ತೀಚೆಗೆ ಚೀನಾಕ್ಕೆ ಭೇಟಿ ಕೊಟ್ಟಿದ್ದ ರಷ್ಯಾದ ವಿದೇಶಾಂಗ ಸಚಿವರು 'ದಕ್ಷಿಣ ಚೀನಾ ಸಮುದ್ರದ ವಿಚಾರದಲ್ಲಿ ಹೊರಗಿನವರು ಮೂಗು ತೂರಿಸುವುದನ್ನು' ವಿರೋಧಿಸಿದ್ದಾರೆ. ಮುಖ್ಯವಾಗಿ ಅವರ ಹೇಳಿಕೆ ಅಮೆರಿಕವನ್ನು ದೃಷ್ಟಿಯಲ್ಲಿಟ್ಟುಕೊಂಡೇ ಹೊರಬಿದ್ದಿದೆ.

- ಮಧ್ಯಪ್ರಾಚ್ಯ, ಆಫ್ರಿಕಾದಿಂದ ಚೀನಾಕ್ಕೆ ಬೆಂಬಲ-

ಮೇ 20ರಂದು ಚೀನಾದ ಸುದ್ದಿ ಸಂಸ್ಥೆ ಕ್ಸಿನ್‌ವಾ, ಚೀನಾಗೆ 40 ರಾಷ್ಟ್ರಗಳು ಬೆಂಬಲ ವ್ಯಕ್ತಪಡಿಸಿವೆ ಎಂದು ಹೇಳಿತು. ದಕ್ಷಿಣ ಚೀನಾ ಸಮುದ್ರ ವಿವಾದದಲ್ಲಿ ಚೀನಾಕ್ಕೆ ಆಫ್ರಿಕಾ, ಮಧ್ಯಪ್ರಾಚ್ಯ ಮತ್ತು ಏಷ್ಯಾದ 40 ರಾಷ್ಟ್ರಗಳು ತಮ್ಮ ಬೆಂಬಲಕ್ಕೆ ನಿಂತಿವೆ ಎಂದು ಇತ್ತೀಚೆಗಷ್ಟೇ ಚೀನಾ ವಿದೇಶಾಂಗ ಸಚಿವಾಲಯ ಹೇಳಿದ್ದನ್ನು ಕೂಡ ಇಲ್ಲಿ ಉಲ್ಲೇಖಿಸಬಹುದು. ಆದರೆ, ಕಾಂಬೋಡಿಯಾ, ಲಾವೊಸ್‌, ಫಿಜಿ ಸೇರಿದಂತೆ ಕೆಲವು ರಾಷ್ಟ್ರಗಳು ಚೀನಾದ ಹೇಳಿಕೆಯನ್ನು ತಳ್ಳಿ ಹಾಕಿವೆ. ವಾಷಿಂಗ್ಟನ್‌ ಸ್ಟ್ರ್ಯಾಟೆಜಿಕ್‌ ಆ್ಯಂಡ್‌ ಇಂಟರ್‌ನ್ಯಾಷನಲ್‌ ಸ್ಟಡೀಸ್‌ ಸೆಂಟರ್‌ನ ತಜ್ಞರು ಕೂಡ ಈ ಬಗ್ಗೆ ಸ್ಪಷ್ಟತೆಯನ್ನು ಪಡೆದುಕೊಳ್ಳುವುದು ಅಗತ್ಯ ಎಂದು ಹೇಳಿದ್ದಾರೆ.

- ಐರೋಪ್ಯ ಒಕ್ಕೂಟ ಮತ್ತು ಜಿ-7-

ಹಕ್ಕು ಸಾಧಿಸಲು ಯತ್ನಿಸುತ್ತಿರುವ ಎಲ್ಲ ರಾಷ್ಟ್ರಗಳು ಈ ವಿವಾದವನ್ನು ಶಾಂತ ಮಾರ್ಗದ ಮೂಲಕ ಬಗೆಹರಿಸಿಕೊಳ್ಳಬೇಕು ಮತ್ತು ಅಂತಾರಾಷ್ಟ್ರೀಯ ಕಾನೂನು ಪ್ರಕಾರವೇ ಮುಂದುವರಿಯಬೇಕು ಎಂದು ಐರೋಪ್ಯ ಒಕ್ಕೂಟ ಹೇಳುತ್ತಿವೆ. ಬ್ರಿಟನ್‌, ಕೆನಡಾ, ಫ್ರಾನ್ಸ್‌, ಜರ್ಮನಿ, ಇಟಲಿ, ಜಪಾನ್‌, ಅಮೆರಿಕ ಮತ್ತು ಐರೋಪ್ಯ ಒಕ್ಕೂಟಗಳ ಗುಂಪು ಕೂಡ, ಎಲ್ಲ ರಾಷ್ಟ್ರಗಳು ನ್ಯಾಯಾಧಿಕರಣ ನೀಡುವ ತೀರ್ಮಾನಕ್ಕೆ ಬದ್ಧವಾಗಿರಬೇಕೆಂದು ಕರೆ ಕೊಟ್ಟಿವೆ. ಫ್ರಾನ್ಸ್‌ನ ರಕ್ಷ ಣಾ ಸಚಿವ ಜೀನ್‌ ಲೆ ಡ್ರಿಯಾನ್‌ ಅವರು ಜೂನ್‌ನಲ್ಲಿ ಪ್ರಸ್ತಾವನೆಯೊಂದನ್ನು ಮಂಡಿಸಿ, ಯುರೋಪಿಯನ್‌ ನೌಕಾಪಡೆಗಳು ಏಷ್ಯನ್‌ ಸಮುದ್ರದಲ್ಲಿ ನಿಯಮಗಳ ಪಾಲನೆಗೆ ಮುಂದಾಗಬೇಕು. ಒಂದು ವೇಳೆ, ಸಮುದ್ರದ ಕಾನೂನುಗಳನ್ನು ಆ ಪ್ರದೇಶದ ರಾಷ್ಟ್ರಗಳು ಗೌರವಿಸದಿದ್ದರೆ, ಆರ್ಕಟಿಕ್‌ ಸಾಗರ ಮತ್ತು ಮೆಡಿಟರೇನಿಯನ್‌ ಸಮುದ್ರದಲ್ಲೂ ನಿಯಮಗಳನ್ನು ಪ್ರಶ್ನಿಸುವ ಅವಕಾಶ ಕೊಡಬೇಕು ಎಂದು ಹೇಳಿದ್ದರು. ಅಂದರೆ, ಜಗತ್ತಿನ ಎಲ್ಲ ಸಮುದ್ರಗಳಲ್ಲಿ ಕಾನೂನುಗಳು ಪರಿಪಾಲನೆಯಾಗಬೇಕೆಂಬುದು ಅವರ ವಾದ.

- ಆಸ್ಪ್ರೇಲಿಯಾ-

ಈ ವಿಷಯದಲ್ಲಿ ಚೀನಾ-ಫಿಲಿಪ್ಪೀನ್ಸ್‌ನ ತೀರ್ಮಾನ ಅತ್ಯಂತ ಮಹತ್ವದ್ದು ಎಂದು ಕಳೆದ ಜನವರಿಯಲ್ಲಿ ಆಸ್ಪ್ರೇಲಿಯಾದ ವಿದೇಶಾಂಗ ಸಚಿವೆ ಜ್ಯೂಲಿ ಬಿಶಪ್‌ ಹೇಳಿದ್ದರು. ಒಂದೇ ಏಟಿಗೆ ಎಲ್ಲ ವಿವಾದವೂ ಮುಗಿದು ಬಿಡಬೇಕು ಎಂಬುದು ಅದರ ಸಾರ. ಆದರೆ, ನ್ಯಾಯಮಂಡಳಿ ಮಧ್ಯಸ್ಥಿಕೆಗೆ ಅಮೆರಿಕ ಬೆಂಬಲ ನೀಡಿದಷ್ಟು ಆಸ್ಪ್ರೇಲಿಯಾ ನೀಡುತ್ತಿಲ್ಲ. ಈ ವಿಷಯದಲ್ಲಿ ಅದು ತುಸು ಮೌನ ವಹಿಸುತ್ತಿದೆ. ಬಹುಶಃ ಈಸ್ಟ್‌ ಟಿಮೋರ್‌ ಜತೆಗಿನ ಆಸ್ಪ್ರೇಲಿಯಾದ ಸಮುದ್ರ ಗಡಿ ವಿವಾದ ಇದೆ. ಹೀಗಾಗಿ, ಮಧ್ಯಸ್ಥಿಕೆ ವಿಷಯಕ್ಕೆ ಸಂಬಂಧಿಸಿದಂತೆ ಗಟ್ಟಿ ದನಿಯಲ್ಲಿ ಮಾತನಾಡಲು ಈ ವಿವಾದ ಆಸ್ಪ್ರೇಲಿಯಾಕ್ಕೆ ಆಸ್ಪದ ಮಾಡಿಕೊಡುತ್ತಿಲ್ಲ.

- ಭಾರತ-

ದಕ್ಷಿಣ ಚೀನಾ ಸಮುದ್ರ ವಿವಾದಕ್ಕೆ ಸಂಬಂಧಿಸಿದಂತೆ ಭಾರತ, ನ್ಯಾಯಮಂಡಳಿ ತೀರ್ಮಾನದ ಬಗ್ಗೆ ಯಾವುದೇ ಅಧಿಕೃತ ಹೇಳಿಕೆ ನೀಡಿಲ್ಲ. ಆದರೆ, ಎಲ್ಲ ರಾಷ್ಟ್ರಗಳು ಸಮುದ್ರಕ್ಕೆ ಸಂಬಂಧಿಸಿದ ವ್ಯಾಜ್ಯಗಳ ವಿಷಯದಲ್ಲಿ ಅಂತಾರಾಷ್ಟ್ರೀಯ ಕಾನೂನನ್ನು ಗೌರವಿಸಬೇಕೆಂದು ಹೇಳುತ್ತಿದೆ. ಬಾಂಗ್ಲಾದೇಶದ ಜತೆಗಿನ ವಿವಾದದಲ್ಲಿ ಭಾರತ ಈ ವಿಷಯದಲ್ಲಿ ಉದಾಹರಣೆಯಾಗಿ ನಿಂತಿದೆ ಕೂಡ. ಸಮುದ್ರ ಗಡಿ ರೇಖೆಗೆ ಸಂಬಂಧಿಸಿದಂತೆ ಬಾಂಗ್ಲಾದೇಶದ ಜತೆಗೆ ಭಾರತಕ್ಕ ತಕರಾರು ಇತ್ತು. ಈ ವಿಷಯಕ್ಕೆ ಸಂಬಂಧಿಸಿದಂತೆ 2014ರಲ್ಲಿ ಹಾಗ್‌ನಲ್ಲಿರುವ ಅಂತಾರಾಷ್ಟ್ರೀಯ ನ್ಯಾಯಾಲಯ ಬಾಂಗ್ಲಾದೇಶದ ಪರವಾಗಿ ತೀರ್ಪು ಪ್ರಕಟಿಸಿತು. ಆದರೆ, ಭಾರತಕ್ಕೆ ಇದಕ್ಕೆ ಯಾವುದೇ ತಕರಾರು ಮಾಡದೇ, ತೀರ್ಪನ್ನು ಗೌರವಿಸಿದೆ.

- ಜಪಾನ್‌ -

ಮೊದಲಿಗೆ ಜಪಾನ್‌ ಫಿಲಿಪ್ಪೀನ್ಸ್‌ನ ಬೆಂಬಲಕ್ಕೆ ನಿಂತಿತ್ತು. ಅಲ್ಲದೆ, ಚೀನಾ ಮತ್ತು ಫಿಲಿಪ್ಪೀನ್ಸ್‌ ಎರಡೂ ರಾಷ್ಟ್ರಗಳ ನ್ಯಾಯಾಧಿಕರಣ ತೀರ್ಮಾನಕ್ಕೆ ಬದ್ಧವಾಗಿರಬೇಕು ಹಾಗೂ ಅಂತಾರಾಷ್ಟ್ರೀಯ ಕಾನೂನು ಗೌರವಿಸಬೇಕೆಂದು ಹೇಳುತ್ತಿದೆ. ಇದೇ ವೇಳೆ, ಐತಿಹಾಸಿಕ ಎದುರಾಳಿಯಾಗಿರುವ ಚೀನಾ, ದಕ್ಷಿಣ ಸಮುದ್ರದಲ್ಲಿ ಮೇಲುಗೈ ಸಾಧಿಸುತ್ತಿರುವುದರ ಬಗ್ಗೆ ಕಳವಳವನ್ನೂ ವ್ಯಕ್ತಪಡಿಸುತ್ತಿದೆ. ಯಾಕೆಂದರೆ, ಜಪಾನ್‌ ಆಮದು ಮಾಡಿಕೊಳ್ಳುವ ಶೇ.80 ಕಚ್ಚಾ ತೈಲ ಇದೇ ಮಾರ್ಗವಾಗಿ ಬರುತ್ತದೆ. ವಿವಾದ ಬಗೆಹರಿಸಲು ಜಪಾನ್‌ ಥರ್ಡ್‌ಪಾರ್ಟಿಗೆ ಬೆಂಬಲ ನೀಡುತ್ತಿರುವುದೇನೂ ಗುಟ್ಟಾಗಿ ಉಳಿದಿಲ್ಲ. ಅದು ದಕ್ಷಿಣ ಕೊರಿಯಾ ಜತೆಗಿನ ಡೊಕ್ಡೊ ಅಥವಾ ತೇಕ್‌ಸಿಮ್‌ ಐಲ್ಯಾಂಡ್‌ ವಿವಾದವನ್ನು ಅಂತಾರಾಷ್ಟ್ರೀಯ ನ್ಯಾಯಾಲಯದಲ್ಲಿ ಬಗೆಹರಿಸಿಕೊಳ್ಳಲು ಮುಂದಾಗಿದೆ. ಆದರೆ, ಇದೇ ತೆರನಾದ ಪ್ರಕ್ರಿಯೆ ಸೆನಕಾಕು ಅಥವಾ ಡೈಯಾಯು ಐಲ್ಯಾಂಡ್‌ಗೆ ಸಂಬಂಧಿಸಿದ ಚೀನಾ ಜತೆಗಿನ ವಿವಾದಕ್ಕೆ ಅದು ಒಪ್ಪುತ್ತಿಲ್ಲ. ಯಾಕೆಂದರೆ, ಈ ಎರಡೂ ದ್ವೀಪಗಳು ಜಪಾನ್‌ನ ಆಡಳಿತಕ್ಕೆ ಒಳಪಟ್ಟಿವೆ.

-ದಕ್ಷಿಣ ಕೊರಿಯಾ-

ಜಪಾನ್‌ನಂತೆ ದಕ್ಷಿಣ ಕೊರಿಯಾ ಕೂಡ ಇಂಧನ ಆಮದು ಮಾಡಿಕೊಳ್ಳವ ಸಂಬಂಧ ದಕ್ಷಿಣ ಚೀನಾ ಸಮುದ್ರವನ್ನು ಅವಲಂಬಿಸಿದೆ. ಆದರೆ, ಚೀನಾದ ಜತೆಗಿನ ಸಖ್ಯದಿಂದಾಗಿ ಈ ವಿವಾದಕ್ಕೆ ಸಂಬಂಧಿಸಿದಂತೆ ಜೋರು ದನಿಯಲ್ಲಿ ಅದು ಮಾತನಾಡುತ್ತಿಲ್ಲ. ದಕ್ಷಿಣ ಕೊರಿಯಾದ ವಿದೇಶಾಂಗ ಇಲಾಖೆ ಹೇಳುತ್ತಿರುವುದು ಏನೆಂದರೆ, ಅಂತಾರಾಷ್ಟ್ರೀಯ ಮಾನ್ಯತೆ ಪಡೆದಿರುವ ನಿಯಮಾವಳಿ ಪ್ರಕಾರ ಈ ವಿವಾದವನ್ನು ಬಗೆಹರಿಸಿಕೊಳ್ಳಬೇಕು. ಫಿಲಿಪ್ಪೀನ್ಸ್‌ ಮತ್ತು ಚೀನಾ ನಡುವಿನ ಈ ವ್ಯಾಜ್ಯವನ್ನು ತಾನು ತುಂಬಾ ಆಸಕ್ತಿಯಿಂದ ಎದುರು ನೋಡುತ್ತಿರುವುದಾಗಿ ಹೇಳಿದೆ.

- ತೈವಾನ್‌ -

ದಕ್ಷಿಣ ಚೀನಾ ಸಮುದ್ರ ವಿವಾದಕ್ಕೆ ಸಂಬಂಧಿಸಿದಂತೆ ನ್ಯಾಯಮಂಡಳಿ ತನ್ನ ಅಭಿಪ್ರಾಯವನ್ನೇ ಪಡೆದಿಲ್ಲ ಎಂದು ತೈವಾನ್‌ ಆರೋಪಿಸುತ್ತಿದೆ. ದಕ್ಷಿಣ ಚೀನಾ ಸಮುದ್ರದಲ್ಲಿ ಬೀಜಿಂಗ್‌ ಯಾವ ನೈನ್‌ ಡ್ಯಾಸ್‌ ಲೈನ್‌(ಮ್ಯಾಪ್‌ ಗಮನಿಸಿ)ಗಳ ಮೇಲೆ ಹಕ್ಕು ಸಾಧಿಸುತ್ತಿದೆಯೋ ಆ ಲೈನ್‌ ಮೇಲೂ ತೈವಾನ್‌ ಹಕ್ಕುದಾರಿಕೆ ಇದೆ ಎಂದು ಹೇಳುತ್ತಿದೆ. ಎಲ್ಲಕ್ಕಿಂತ ಹೆಚ್ಚಾಗಿ ತೈವಾನ್‌ಗೆ ಆತಂಕ ಇರುವುದು ಸ್ಪಾರ್ಟಲಿಯ ತೈಪಿಂಗ್‌ ದ್ವೀಪ ಬಗ್ಗೆ. ಒಂದು ವೇಳೆ ಚೀನಾ ಹಕ್ಕು ಸಾಧಿಸಿದರೆ ಈ ದ್ವೀಪದ ಮೇಲಿನ ತನ್ನ ಹಿಡಿತ ಕಳೆದುಕೊಳ್ಳಬೇಕಾದ ಪರಿಸ್ಥಿತಿ ಎದುರಾಗಬಹುದು ಎಂಬ ಆತಂಕ ತೈವಾನ್‌ ಆಡಳಿತಕ್ಕಿದೆ.