ಪಾಕಿಸ್ತಾನ ಕ್ರಿಕೆಟ್‌ ಹಾಗೂ ಫುಟ್ಬಾಲ್‌ ತಂಡಗಳಲ್ಲಿ ಸ್ಥಾನ ಪಡೆದ ಅಪರೂಪದ ಪ್ರತಿಭೆ ಡಯಾನ ಬೇಗ್‌ ಲಾಹೋರ್‌: ಕ್ರಿಕೆಟ್‌ ಹಾಗೂ ಫುಟ್ಬಾಲ್‌ನಲ್ಲಿ ರಾಷ್ಟ್ರೀಯ ತಂಡಗಳನ್ನು ಪ್ರತಿನಿಧಿಸುವ ಆಟಗಾರ್ತಿಯೊಬ್ಬರು ಪಾಕಿಸ್ತಾನದಲ್ಲಿದ್ದಾರೆ. ಪಾಕ್‌ನ ಮಹಿಳಾ ಕ್ರಿಕೆಟ್‌ ಹಾಗೂ ಫುಟ್ಬಾಲ್‌ ತಂಡಗಳಲ್ಲಿ ಮಿಂಚುತ್ತಿರುವ ಆ ಆಟಗಾರ್ತಿಯ ಹೆಸರು ಡಯಾನ ಬೇಗ್‌. 20 ವರ್ಷ ವಯಸ್ಸಿನ ಡಯಾನ ಬೇಗ್‌ ಕ್ರಿಕೆಟ್‌ ಹಾಗೂ ಫುಟ್ಬಾಲ್‌ನಲ್ಲಿ ಪಾಕಿಸ್ತಾನ ತಂಡಗಳನ್ನು ಪ್ರತಿನಿಧಿಸುತ್ತಿದ್ದಾರೆ. ಇತ್ತೀಚೆಗಷ್ಟೇ ಭಾರತದಲ್ಲಿ ನಡೆದ ಐಸಿಸಿ ಮಹಿಳಾ ಟಿ20 ವಿಶ್ವಕಪ್‌ ಟೂರ್ನಿಯಲ್ಲೂ ಡಯಾನ ಪಾಕಿಸ್ತಾನ ತಂಡದ ಪರ ಆಡಿದ್ದರು. ಕ್ರಿಕೆಟ್‌ ಅಭ್ಯಾಸದ ವೇಳೆ ಫುಟ್ಬಾಲ್‌ ಕೂಡ ಅಭ್ಯಾಸ ನಡೆಸುವುದು ಅವರ ವಿಶೇಷತೆ. ಪಾಕಿಸ್ತಾನದ ಹಂಜಾ ವ್ಯಾಲಿ ಪ್ರದೇಶದಲ್ಲಿ ಜನಿಸಿದ ಡಯಾನ ಅಲ್ಲಿಯೇ ಗಲ್ಲಿ ಕ್ರಿಕೆಟ್‌ ಹಾಗೂ ಫುಟ್ಬಾಲ್‌ ಆಡುತ್ತಾ ಬೆಳೆದ ಹುಡುಗಿ. ಗಲ್ಲಿ ಕ್ರಿಕೆಟ್‌ನಲ್ಲಿ ಪಳಗಿದ ಬಳಿಕ ಸ್ಥಳೀಯ ತಂಡಗಳ ಪರ ಆಡುತ್ತಿದ್ದ ಡಯಾನ 2010ರಲ್ಲಿ ಗಿಲ್‌ಗಿಟ್‌-ಬಲ್ಟಿಸ್ತಾನ್‌ ತಂಡದ ನಾಯಕಿಯಾಗಿ ಮಿಂಚಿ ಎರಡು ವರ್ಷಗಳ ಬಳಿಕ ಪಾಕಿಸ್ತಾನ 'ಎ' ತಂಡಕ್ಕೂ ಆಯ್ಕೆಯಾಗಿದ್ದರು. 2013ರ ವಿಶ್ವಕಪ್‌ನಲ್ಲಿ ಪಾಕ್‌ ತಂಡದಲ್ಲಿ ಮೀಸಲು ಆಟಗಾರ್ತಿಯಾಗಿದ್ದ ಡಯಾನ ಬೇಗ್‌, 2015ರಲ್ಲಿ ಬಾಂಗ್ಲಾದೇಶ ವಿರುದ್ಧ ಕಣಕ್ಕಿಳಿಯುವ ಮೂಲಕ ಚೊಚ್ಚಲ ಏಕದಿನ ಅಂತಾರಾಷ್ಟ್ರೀಯ ಪಂದ್ಯವಾಡಿದರು. ಫುಟ್ಬಾಲ್‌ ಆಟಗಾರ್ತಿಯಾಗಿದ್ದು ಆಕಸ್ಮಿಕ ತಮ್ಮ ಕ್ರಿಕೆಟ್‌ ಹಾಗೂ ಫುಟ್ಬಾಲ್‌ ಪ್ರೀತಿ ಬಗ್ಗೆ ಮಾತನಾಡಿರುವ ಡಯಾನ ಬೇಗ್‌, ''ನನ್ನ ದಿನಚರಿ ಫುಟ್ಬಾಲ್‌ನಿಂದ ಆರಂಭವಾಗುತ್ತದೆ. ಬೆಳಗ್ಗೆ ಫುಟ್ಬಾಲ್‌ ಆಡುತ್ತೇನೆ. ಬಳಿಕ 12 ಗಂಟೆಯಿಂದ ಮಧ್ಯಾಹ್ನ 4ರ ವರೆಗೆ ಕ್ರಿಕೆಟ್‌ ಅಭ್ಯಾಸ ನಡೆಸುತ್ತೇನೆ. ರಾತ್ರಿ ಓದಿನ ಕಡೆ ಗಮನ ಹರಿಸುತ್ತೇನೆ,'' ಎಂದಿದ್ದಾರೆ. ಲಾಹೋರ್‌ನ ಮಹಿಳಾ ಯೂನಿವರ್ಸಿಟಿ ಕಾಲೇಜಿನಲ್ಲಿ ಡಯಾನ ಆರೋಗ್ಯ ಮತ್ತು ದೈಹಿಕ ಶಿಕ್ಷ ಣ ವಿಭಾಗದಲ್ಲಿ ಮೊದಲ ಸೆಮಿಸ್ಟರ್‌ ವಿದ್ಯಾರ್ಥಿನಿಯಾಗಿದ್ದಾರೆ.
↧
ಕ್ರಿಕೆಟ್‌ನಲ್ಲೂ ಜೈ, ಫುಟ್ಬಾಲಿಗೂ ಸೈ ಡಯಾನ ಬೇಗ್‌
↧