ಕುಟುಕು ಕಾರ್ಯಾಚರಣೆ ಅನೈತಿಕ: ಕುಮಾರಸ್ವಾಮಿ

ಹುಬ್ಬಳ್ಳಿ: 'ಟೈಮ್ಸ್ ನೌ' ಸೇರಿ ಅನೇಕ ಆಂಗ್ಲ ಖಾಸಗಿ ವಾಹಿನಿಗಳು ಪ್ರಸಾರ ಮಾಡಿರುವ 'ಮೇಲ್ಮನೆ ಚುನಾವಣೆಗೆ ಕುದುರೆ ವ್ಯಾಪಾರ'ದ ಕುಟುಕು ಕಾರ್ಯಾಚರಣೆಯೇ ಅನೈತಿಕವೆಂದ ಜೆಡಿಎಸ್ ರಾಜ್ಯಾಧ್ಯಕ್ಷ ಎಚ್.ಡಿ.ಕುಮಾರಸ್ವಾಮಿ, 'ಘಟನೆ ಬಗ್ಗೆ ತನಿಖೆಯಾಗಲಿ' ಎಂದು ಆಗ್ರಹಿಸಿದ್ದಾರೆ.



ರಾಜ್ಯಸಭೆ ಚುನಾವಣೆ: ಕುದುರೆ ವ್ಯಾಪಾರದ ಕುರುಹು

'ಜಿಡಿಎಸ್ ಅನ್ನೇ ಗುರಿಯಾಗಿಸಿಕೊಂಡು ಈ ಕುಟುಕು ಕಾರ್ಯಾಚರಣೆ ನಡೆಸಲಾಗಿದೆ. ಜನರಲ್ಲಿ ಪಕ್ಷದ ಬಗ್ಗೆ ಅವಿಶ್ವಾಸ ಮೂಡಿಸುವುದೇ ಇದರ ಉದ್ದೇಶ,' ಎಂದು ಆರೋಪಿಸಿದ್ದಾರೆ.

ದೆಹಲಿಯಿಂದ ಕರ್ನಾಟಕವನ್ನೇ ಗುರಿಯಾಗಿಸಿಕೊಂಡಿರುವ ಬಗ್ಗೆ ಆಂಗ್ಲ ಮಾಧ್ಯಮಗಳನ್ನು ಪ್ರಶ್ನಿಸಿದ ಕುಮಾರಸ್ವಾಮಿ,' ಮಲ್ಲಿಕಾರ್ಜುನ್ ಖೂಬಾ, ಜಿ.ಟಿ. ದೇವೇಗೌಡ ಮಾತನಾಡಿದ್ದು ತಮಾಷೆಗಾಗಿ. ಸ್ಟಿಂಗ್ ಎಂದು ಗೊತ್ತಾಗಿಯೇ ತಮಾಷೆ ಮಾಡಿದ್ದಾರೆ. ಕಾಂಗ್ರೆಸ್ ನಾಯಕರಿಂದ ಇಂಥ ವಾತಾವರಣ ನಿರ್ಮಾಣವಾಗಿದೆ. ಶಾಸಕರ ಸಂಖ್ಯೆಗೆ ಅನುಗುಣವಾಗಿ ಅಭ್ಯರ್ಥಿಗಳನ್ನು ಕಣಕ್ಕಿಳಿಸಿಲ್ಲ,' ಎಂದಿದ್ದಾರೆ.

ಇಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, 'ಮುಖ್ಯಮಂತ್ರಿ ಸಿದ್ದರಾಮಯ್ಯ ಹಾಗೂ ಬಿಜೆಪಿ ರಾಜ್ಯಾಧ್ಯಕ್ಷ ಬಿ.ಎಸ್.ಯಡಿಯೂರಪ್ಪ ಸಹ ಅನೇಕ ವಿಷಯಗಳಲ್ಲಿ ಹೊಂದಾಣಿಕೆ ಮಾಡಿಕೊಂಡಿದ್ದಾರೆ. ಬೇಕಿದ್ದರೆ ಈ ಬಗ್ಗೆ ಧರ್ಮಸ್ಥಳಕ್ಕೆ ಬಂದು ಪ್ರಮಾಣ ಮಾಡಲಿ,' ಎಂದು ಸವಾಲು ಹಾಕಿದ್ದಾರೆ.

'ಕುಟುಕು ಕಾರ್ಯಾಚರಣೆಯೇ ಕಾನೂನಿಗೆ ವಿರುದ್ಧವಾದದ್ದು. ಬಿ.ಎಂ.ಫಾರೂಖ್ 100 ಕೋಟಿ ರೂ. ಖರ್ಚು ಮಾಡುವುದಾಗಿ ಹೇಳಿದ್ದರೆ, ರಾಜಕೀಯದಿಂದ ನಿವೃತ್ತಿ ಹೊಂದುತ್ತೇನೆ. ಈ ಪ್ರಕರಣದ ಕುರಿತು ಸಿಬಿಐ ತನಿಖೆಯಾಗಲಿ. ಸದ್ಯಕ್ಕೆ ಚುನಾವಣೆ ರದ್ದಾಗಲಿ. ಸತ್ಯಾಂಶ ಬಯಲಿಗೆ ಬರಲಿ,' ಎಂದು ಆಗ್ರಹಿಸಿದ್ದಾರೆ.