ಆರ್‌ಅ್ಯಂಡ್‌ಡಿ ಟಾಪ್‌ 5 ಸ್ಥಾನದಲ್ಲಿ ಬೆಂಗಳೂರು / ಟೋಕಿಯೊ ಹಿಂದಿಕ್ಕಿದ ಭಾರತದ ಸಿಲಿಕಾನ್‌ ವ್ಯಾಲಿ ಬೆಂಗಳೂರು: ಬಹುರಾಷ್ಟ್ರೀಯ ಕಂಪನಿಗಳಿಗೆ(ಎಂಎನ್‌ಸಿ) ತಮ್ಮ ಆರ್‌ಆ್ಯಂಡ್‌ಡಿ(ಸಂಶೋಧನೆ ಮತ್ತು ಅಭಿವೃದ್ಧಿ) ಘಟಕ ಸ್ಥಾಪನೆಗೆ ಆಕರ್ಷಕವೆನ್ನಿಸುವ ಜಾಗತಿಕ ಮಟ್ಟದ ತಾಣಗಳಲ್ಲಿ ಬೆಂಗಳೂರು 5ನೇ ಸ್ಥಾನದಲ್ಲಿದೆ. ಜಪಾನ್‌ನ ಟೋಕಿಯೊವನ್ನು ಬೆಂಗಳೂರು ಹಿಂದಿಕ್ಕಿದ್ದು, ಅಮೆರಿಕದ ಸಿಲಿಕಾನ್‌ ವ್ಯಾಲಿಯ ಆಜೂಬಾಜಿನಲ್ಲಿದೆ. ಹೊಸ ಆವಿಷ್ಕಾರ ಮತ್ತು ತಾಂತ್ರಿಕತೆ ವಿಷಯದಲ್ಲಿ ಉತ್ತಮ ವಾತಾವಣ ಹೊಂದಿರುವ ನಗರಗಳನ್ನು ಅಧ್ಯಯನ ನಡೆಸಿರುವ ಟೆಕ್ನಾಲಜಿ ಕನ್ಸಲ್ಟಿಂಗ್‌ ಅ್ಯಂಡ್‌ ಸರ್ವಿಸಸ್‌ ಸಂಸ್ಥೆ ಕೇಪ್‌ಜೆಮಿನಿ, ಟಾಪ್‌ 5 ನಗರಗಳ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಇದರ ಪ್ರಕಾರ, ಸಿಲಿಕಾನ್‌ ವ್ಯಾಲಿ ಮತ್ತು ಲಂಡನ್‌ ಟಾಪ್‌ 1 ಮತ್ತು 2ನೇ ಸ್ಥಾನದಲ್ಲಿದ್ದರೆ, ಪ್ಯಾರಿಸ್‌, ಸಿಂಗಾಪುರ ನಗರಗಳು 3-4ನೇ ಸ್ಥಾನದಲ್ಲಿವೆ. ಭಾರತದ ಸಿಲಿಕಾನ್‌ ವ್ಯಾಲಿಯೆಂದೇ ಬಿಂಬಿತವಾಗಿರುವ ಬೆಂಗಳೂರು ಬಹುರಾಷ್ಟ್ರೀಯ ಕಂಪನಿಗಳ ಆಕರ್ಷಣೆಗೆ ಪಾತ್ರವಾಗಿದೆ. ಕಳೆದ 5 ವರ್ಷಗಳಲ್ಲಿ ವಿಶ್ವದ ಪ್ರಮುಖ 500 ಕಂಪನಿಗಳು ಬೆಂಗಳೂರಿನಲ್ಲಿ ತಮ್ಮ ಕೇಂದ್ರಗಳನ್ನು ರೂಪಿಸಿವೆ. ಇದೀಗ ಆ್ಯಪಲ್‌, ವಿಸಾ ಮತ್ತು ಏರ್‌ಬಸ್‌ನಂಥ ಕಂಪನಿಗಳು ತಮ್ಮ ಭಾರತೀಯ ಕಾರ್ಯಾಚರಣೆಗೆ ಬೆಂಗಳೂರಿನಲ್ಲಿ ಮುಖ್ಯ ಕೇಂದ್ರಕಚೇರಿ ಇಲ್ಲವೇ ಸ್ಥಳೀಯ ತಾಂತ್ರಿಕ ತಜ್ಞರ ಬಳಸಿಕೊಂಡು ತಾಂತ್ರಿಕ ಕೇಂದ್ರಗಳ ತೆರೆಯಲು ಮುಂದಾಗಿವೆ. ''ಬೆಂಗಳೂರಿನ ತಾಂತ್ರಿಕ ನಿಪುಣರನ್ನು ಬಳಸಿಕೊಂಡು ತಮ್ಮ ನೆಲೆಯನ್ನು ಭದ್ರ ಪಡಿಸಿಕೊಳ್ಳಲು ಎಂಎನ್‌ಸಿಗಳು ಮುಂದಾಗಿವೆ. ನಾವು 2015ರ ಜೂನ್‌ನಲ್ಲಿ ನಡೆಸಿದ ಅಧ್ಯಯನದ ವೇಳೆ ದೇಶದ ಪ್ರಮುಖ ಎಂಟು ಆರ್‌ಆ್ಯಂಡ್‌ಡಿ ಕೇಂದ್ರಗಳನ್ನು ಗುರ್ತಿಸಿದ್ದೆವು. ಈಗ ಅವುಗಳನ್ನೂ ಮೀರಿ ಭಾರತ ಬೆಳೆಯುತ್ತಿದೆ. ನೂತನ ಆರ್‌ಅ್ಯಂಡ್‌ಡಿ ಕೇಂದ್ರದ ಆರಂಭಕ್ಕೆ ಬೆಂಗಳೂರು ಬೆಸ್ಟ್‌ ಎನ್ನುವಂಥ ವಾತಾವರಣ ಸೃಷ್ಟಿಯಾಗಿದ್ದು, ಎಂಎನ್‌ಸಿಗಳು ಉತ್ಸುಕತೆ ತೋರಿಸಿವೆ,'' ಎಂದು ಕೇಪ್‌ಜೆಮಿನಿ ವರದಿಯಲ್ಲಿ ಹೇಳಲಾಗಿದೆ. ''ದೇಶದಲ್ಲಿ ಎಂಎನ್‌ಸಿ ಕಂಪನಿಗಳ ಆರ್‌ಅ್ಯಂಡ್‌ ಡಿ ಕೇಂದ್ರಗಳು ಗಣನೀಯವಾಗಿ ಹೆಚ್ಚಳವಾಗುತ್ತಿವೆ. ಅವುಗಳಲ್ಲಿ ಬಹುಭಾಗ ಬೆಂಗಳೂರಿನಲ್ಲಿ ತಲೆ ಎತ್ತಿವೆ. 2015ರಲ್ಲಿ ಭಾರತದ ಸ್ಟಾರ್ಟಪ್‌ಗಳಲ್ಲಿ 9 ಶತಕೋಟಿ ಡಾಲರ್‌ ಹೂಡಿಕೆಯಾಗಿದೆ. ಇಂಥ ಫಲವತ್ತಾದ ಪರಿಸರದಲ್ಲಿ ಏರ್‌ಬಸ್‌ ಮತ್ತು ವಿಸಾ ಕಂಪನಿಗಳು ತಮ್ಮ ಆರ್‌ಅ್ಯಂಡ್‌ಡಿಗಳನ್ನು ರೂಪಿಸಿಕೊಂಡಿವೆ,'' ಎಂದು ವರದಿಯಲ್ಲಿ ಹೇಳಲಾಗಿದೆ. ಆಲಿಬಾಬಾ ಕಂಪನಿಯು ಭಾರತದಲ್ಲಿ ತಾಂತ್ರಿಕ ಅಭಿವೃದ್ಧಿ ಕೇಂದ್ರ ತೆರೆಯಲು ಚಿಂತನೆ ನಡೆಸಿದೆ ಎಂದು ಇತ್ತೀಚೆಗಷ್ಟೆ ಮಾಧ್ಯಮಗಳಲ್ಲಿ ವರದಿಗಳು ಬಂದಿದ್ದವು. * ಕಳೆದ 5 ವರ್ಷಗಳಲ್ಲಿ ಟಾರ್ಗೆಟ್‌, ವಾಲ್‌ಮಾರ್ಟ್‌, ಲೋವ್‌ಸ್‌, ಎಲ್‌ ಬ್ರ್ಯಾಂಡ್ಸ್‌, ಉಬರ್‌ನಂಥ ಜಾಗತಿಕ ಮಟ್ಟದ 500 ಕಂಪನಿಗಳು ಬೆಂಗಳೂರಿನಲ್ಲಿ ತಮ್ಮ ಕೇಂದ್ರಗಳನ್ನು ತೆರೆದಿವೆ. * ಮುಂದಿನ ದಿನಗಳಲ್ಲಿ ಇನ್ನಷ್ಟು ಎಂಎನ್‌ಸಿ ಕಂಪನಿಗಳು ಬೆಂಗಳೂರಿಗೆ ಲಗ್ಗೆ. ಇಲ್ಲಿನ ಸ್ಥಳೀಯ ತಾಂತ್ರಿಕ ನಿಪುಣರ ಬಳಸಿಕೊಂಡು ಆರ್‌ಅ್ಯಂಡ್‌ಡಿ ಕೇಂದ್ರಗಳನ್ನು ತೆರೆಯಲು ಉತ್ಸುಕತೆ. * ಎಂಎನ್‌ಸಿಗಳಿಗೆ ಆರ್‌ಅ್ಯಂಡ್‌ಡಿ ಸ್ಥಾಪನೆಗೆ ಪೂರಕವಾದ ಭಾರತದ ನಗರಗಳಲ್ಲಿ ಬೆಂಗಳೂರು ನಂತರದ ಸ್ಥಾನಗಳಲ್ಲಿ ಮುಂಬಯಿ, ಹೊಸದಿಲ್ಲಿಗಳು ಜಾಗ ಪಡೆದಿವೆ. ಭಾರತದ ಸಿಲಿಕಾನ್‌ ವ್ಯಾಲಿ ಈಗಾಗಲೇ ಬೆಂಗಳೂರು ತನ್ನದೇ ಆದ ವೈಶಿಷ್ಟ್ಯತೆಯಿಂದ ಉದ್ಯಮಿಗಳನ್ನು ಸೆಳೆದಿದ್ದು, ಫ್ಲಿಪ್‌ಕಾರ್ಟ್‌, ಇನ್‌ಮೊಬಿ, ಮು ಸಿಗ್ಮಾಯಂಥ ಭಾರತದ ಪ್ರಮುಖ ಸ್ಟಾರ್ಟಪ್‌ಗಳು ಬೆಂಗಳೂರಿನಲ್ಲಿ ಮುಖ್ಯಕಚೇರಿಗಳನ್ನು ಹೊಂದಿವೆ. ಅಲ್ಲದೇ ವಿಶ್ವದರ್ಜೆಯ ತಾಂತ್ರಿಕ ನಿಪುಣರು ಮತ್ತು ದೊಡ್ಡ ಪ್ರಮಾಣದ ಹೂಡಿಕೆಯನ್ನು ಬೆಂಗಳೂರು ಆಕರ್ಷಿಸಿದೆ.
↧
ಎಂಎನ್‌ಸಿಗಳಿಗೆ ಬೆಂಗಳೂರು ಅಂದ್ರೆ ಇಷ್ಟ
↧