ಕೋಲ್ಕೊತಾ: ಪ್ರಣಾಳ ಶಿಶುವಲ್ಲಿ ಗಂಡು ಭ್ರೂಣಕ್ಕೆ ಬೇಡಿಕೆ

ಕೋಲ್ಕೊತಾ: ಸಹಜ ರೀತಿಯಲ್ಲಿ ಮಗುವನ್ನು ಪಡೆಯಲು ಸಾಧ್ಯವಿಲ್ಲದ ನಗರ ಪ್ರದೇಶಗಳ ದಂಪತಿ ಪ್ರಣಾಳ ಶಿಶು ಮೊರೆ ಹೋಗುತ್ತಾರೆ. ಇದು ಮಗು ಪಡೆಯಲು ಜನಪ್ರಿಯ ವಿಧಾನವಾಗಿದ್ದರೂ ಕೋಲ್ಕೊತಾದಲ್ಲಿ ಈ ವಿಧಾನದಲ್ಲಿ ಗಂಡು ಮಗುವನ್ನೇ ಪಡೆಯುವ ಪ್ರವೃತ್ತಿ ಹೆಚ್ಚುತ್ತಿದೆ.

ಈ ವಿಧಾನದಲ್ಲಿ ಹೆಣ್ಣು ಮಗುವನ್ನು ಪಡೆಯುವುದಕ್ಕಿಂತ ಇಲ್ಲಿನವರು ಗಂಡು ಮಕ್ಕಳನ್ನೇ ಪಡೆಯುವ ಪ್ರಮಾಣ ತೀವ್ರಗತಿಯಲ್ಲಿ ಏರಿಕೆಯಾಗುತ್ತಿದೆ. ಈ ಪ್ರವೃತ್ತಿ ಮುಂದಿನ ತಲೆಮಾರಿನಲ್ಲಿ ಬಹಳಷ್ಟು ಗಂಭೀರ ಸಮಸ್ಯೆಗಳನ್ನು ತಂದೊಡ್ಡಲಿದೆ ಎಂದು ಆ ರಾಜ್ಯದ ಆರೋಗ್ಯ ಇಲಾಖೆ ಆತಂಕ ವ್ಯಕ್ತಪಡಿಸಿದೆ.

ನೂತನ ತಂತ್ರಜ್ಞಾನದಲ್ಲಿ ದಂಪತಿಗೆ ಭ್ರೂಣದ ಆಯ್ಕೆಯಲ್ಲಿ ಸ್ವಾತಂತ್ರ್ಯ ಹೊಂದಿರುತ್ತಾರೆ. ಹೆಣ್ಣು ಭ್ರೂಣ ಹತ್ಯೆಯ ಸನ್ನಿವೇಶ ಇರುವುದಿಲ್ಲ. ಆದರೆ ಕೃತಕವಾಗಿ ಗಂಡು ಭ್ರೂಣವನ್ನೇ ಸೃಷ್ಟಿಸಲಾಗುತ್ತದೆ. ಗಂಡು ಭ್ರೂಣಕ್ಕಾಗಿ ಪೋಷಕರು ಹೆಚ್ಚು ಹಣ ವ್ಯಯಿಸಲು ಮುಂದಾಗುತ್ತಾರೆ. ನೋಂದಾಯಿತ ಫಲವಂತಿಕೆ ಕೇಂದ್ರಗಳು ಕಾನೂನು ಬಾಹಿರವಾಗಿ ಈ ಕೆಲಸ ಮಾಡಿದರೆ ಪರವಾನಗಿ ರದ್ದು ಮಾಡಬಹುದಾದರೂ ಆರೋಗ್ಯ ಇಲಾಖೆಗೆ ಸೂಕ್ತ ಪರಾವೆಗಳು ಲಭಿಸುತ್ತಿಲ್ಲ.

ಕೆಲವು ಫಲವಂತಿಕೆ ಕೇಂದ್ರಗಳಲ್ಲಿ ಶೇ 50ಕ್ಕಿಂತ ಹೆಚ್ಚು ಗಂಡು ಭ್ರೂಣಗಳನ್ನೇ ಅಭಿವೃದ್ಧಿಪಡಿಸಲಾಗುತ್ತಿದೆ.ಆ ಕೇಂದ್ರಗಳಿಗೆ ಆರೋಗ್ಯ ಇಲಾಖೆ ಎಚ್ಚರಿಕೆ ನೀಡಿದೆ.