ಸ್ಟೈಲ್‌ಕಿಂಗ್ ವಿಮರ್ಶೆ: ಕಿಂಗ್‌ನ ಡಿಫರೆಂಟ್ ಸ್ಟೈಲ್

ಕನ್ನಡ ಚಿತ್ರ


* ಪದ್ಮಾ ಶಿವಮೊಗ್ಗ

ಗಣೇಶ್ ಅಭಿಮಾನಿಗಳು ಕಾತರದಿಂದ ಕಾಯುತ್ತಿದ್ದ ಸ್ಟೈಲ್‌ಕಿಂಗ್ ರಿಲೀಸ್ ಆಗಿದೆ. ದ್ವಿಪಾತ್ರದಲ್ಲಿ ಮೊದಲಿಗೆ ನಟಿಸಿರುವ ಗಣೇಶ್ ಖಡಕ್ ಪಾತ್ರದಲ್ಲೂ ಮಿಂಚಿದ್ದಾರೆ. ಅವರ ಮೊದಲಿನ ಇಮೇಜ್ ಮತ್ತು ಹೊಸ ಇಮೇಜ್‌ಗಳೆರಡನ್ನೂ ವಾಸ್ತವಕ್ಕೆ ಹತ್ತಿರವಾಗಿಸಿ ಗೆದ್ದಿದ್ದಾರೆ ನಿರ್ದೇಶಕ ಪಿ.ಸಿ. ಶೇಖರ್.

ಗಣೇಶ್‌ಗೆ ರೌಡಿ ಪಾತ್ರಗಳು ಹೊಂದುವುದಿಲ್ಲ ಎಂಬ ಮಾತಿತ್ತು. ಅದನ್ನು ಹುಸಿ ಮಾಡಿದೆ ಈ ಚಿತ್ರ. 'ರೋಮಿಯೋ' ಚಿತ್ರ ನೋಡಿ ಅದೇ ನಿರೀಕ್ಷೆ ಇಟ್ಟುಕೊಂಡು ಹೋಗುವ ಪ್ರೇಕ್ಷಕರನ್ನು ಈ ಚಿತ್ರ ನಿರಾಶೆ ಮಾಡುವುದಿಲ್ಲ. ಸಿಂಪಲ್ ಸ್ಟೋರಿಯಾದರೂ ಸ್ಕ್ರೀನ್ ಪ್ಲೇ ಟೈಟಾಗಿರುವುದೇ ಚಿತ್ರದ ಶಕ್ತಿ. ಕತೆಯಲ್ಲೇ ಕಾಮಿಡಿ ತಂದು ಆ್ಯಕ್ಷನ್, ಹಾಸ್ಯ ಎರಡನ್ನೂ ಹದವಾಗಿ ಮಿಕ್ಸ್ ಮಾಡಿರೋದ್ರಿಂದ ಮಾಮೂಲಿ ಮಸಾಲೆ ಸಿನಿಮಾಗಿಂತ ಭಿನ್ನವಾಗಿ ಕಾಣುತ್ತೆ.

ಪೋಲಿಸ್ ಇನ್ಸ್‌ಪೆಕ್ಟರ್ ಆಗಬೇಕೆಂದು ಹಂಬಲಿಸುವ ಕಾರ್ತಿಕ್ ಜನರ ಕಷ್ಟಕ್ಕೆ ಆಗುವ ವ್ಯಕ್ತಿ. ಇನ್ನೊಂದೆಡೆ ರೌಡಿ ಕಾಶಿ. ಇವನು ದೀನ ಎಂಬ ಇನ್ನೊಬ್ಬ ರೌಡಿ ಕಡೆಯವರನ್ನು ಹೊಡೆದು ಕೋಟ್ಯಂತರ ರೂಪಾಯಿ ಬೆಲೆ ಬಾಳುವ ಡ್ರಗ್ಸ್ ಇದ್ದ ಬ್ಯಾಗ್ ಕದಿಯುತ್ತಾನೆ. ಈ ನಡುವೆ ಕಾರ್ತಿಕ್ ಪೋಲಿಸ್ ತರಬೇತಿ ಪಡೆದು ಕೆಲಸಕ್ಕೆ ಆಯ್ಕೆಯಾಗಲು ಲಂಚವಾಗಿ 25 ಲಕ್ಷ ರೂ. ಹೊಂದಿಸುವುದು ಹೇಗೆ ಎಂದು ತಲೆ ಕೆಡಿಸಿಕೊಂಡಿರುತ್ತಾನೆ. ಇದರ ಜತೆಯಲ್ಲಿ ಅಪ್ಪನ (ರಂಗಾಯಣ ರಘು) ಬೇಜವಾಬ್ದಾರಿಯಿಂದ ಉದ್ಭವಿಸಿದ ಸಮಸ್ಯೆಯಿಂದ ಗಿರವಿ ಇಟ್ಟಿದ್ದ ಒಡವೆ ಬಿಡಿಸಿಕೊಳ್ಳಲು 10 ಲಕ್ಷ ಬೇರೆ ಹೊಂದಿಸಬೇಕಾಗುತ್ತದೆ. ಇಲ್ಲಾಂದ್ರೆ ಪ್ರೀತಿಸಿದ ಹುಡುಗಿಯನ್ನು (ರೆಮ್ಯಾ ನಂಬೀಸನ್) ಮದುವೆಯಾಗುವುದು ಕಷ್ಟವಾಗಿಬಿಡುತ್ತದೆ. ಇನ್ನೊಂದೆಡೆ ಕಾಶಿಯ ಹಿಂದೆ ದೀನ ಬೀಳುತ್ತಾನೆ. ಇವರ ಮಧ್ಯೆ ಪೋಲಿಸರು. ಈ ಹಾವು ಏಣಿ ಆಟದಲ್ಲಿ ಕಾಕತಾಳೀಯ ಎನ್ನುವಂತೆ ಎಲ್ಲರೂ ಸಿಕ್ಕಿಕೊಳ್ಳುತ್ತಾರೆ. ಚಿತ್ರ ವೇಗವಾಗಿ ಸಾಗುತ್ತಾ ಕೊನೆಯವರೆಗೆ ಪ್ರೇಕ್ಷಕನನ್ನು ಹಿಡಿದಿಡುತ್ತದೆ.

ಕಾರ್ತೀಕ್ ಮತ್ತು ಕಾಶಿ ಪಾತ್ರಗಳಲ್ಲಿ ಗಣೇಶ್ ಚೆನ್ನಾಗಿ ನಟಿಸಿದ್ದಾರೆ. ಎರಡೂ ಶೇಡ್‌ಗಳಲ್ಲಿ ಅವರಿಗೆ ನೂರಕ್ಕೆ ನೂರು ಅಂಕ. ಡಾನ್ ಪಾತ್ರದಲ್ಲಿ ಅವರ ಮ್ಯಾನರಿಸಂ ವೀಕ್ ಆಗಿಲ್ಲ. ಅವರ ಸ್ಟೈಲ್‌ಗಳಿಗೆ ಪ್ರೇಕ್ಷಕರು ಶಿಳ್ಳೆ ಹೊಡೆಯುತ್ತಾರೆ. ಪಾತ್ರಗಳ ನಿರೂಪಣೆ ಸೊಗಸಾಗಿದೆ. ಬಹುತೇಕ ಎಲ್ಲರೂ ಕಾಮಿಡಿ ಪೀಸ್‌ಗಳಂತೆಯೇ ಕಾಣುತ್ತಾರೆ. ರಂಗಾಯಣ ರಘು ಮತ್ತು ಸಾಧು ಕೋಕಿಲಾ ಮಸ್ತ್ ಮಜಾ ಕೊಡುತ್ತಾರೆ. ಅವರಿಬ್ಬರೂ ಇಡೀ ಚಿತ್ರವನ್ನು ಆವರಿಸಿಕೊಂಡಿದ್ದಾರೆ.

ನಾಯಕಿ ರೆಮ್ಯಾ ನಂಬೀಸನ್‌ಗೆ ಹೆಚ್ಚು ಅವಕಾಶವಿಲ್ಲ. ಇರುವುದರಲ್ಲೇ ಓಕೆ. ಗಿರೀಶ್, ಮಿತ್ರ, ಸುಂದರ್ ರಾಜ್ ಸೇರಿ ಎಲ್ಲರೂ ಚೆನ್ನಾಗಿ ನಟಿಸಿದ್ದಾರೆ. ಎಲ್ಲ ಪಾತ್ರಗಳಲ್ಲೂ ಲೋಕಲ್ ನೇಟಿವಿಟಿ ಇದೆ. ಉಳಿದಂತೆ ಡಬಲ್ ಮೀನಿಂಗ್ ಡೈಲಾಗ್‌ಗಳಿವೆ ಎಂಬುದನ್ನು ಹೊರತುಪಡಿಸಿದರೆ, ಸಂಭಾಷಣೆ ಚುರುಕಾಗಿದೆ. ಜತೆಗೆ, ಹಾಡುಗಳ ಮೇಕಿಂಗ್ ಚೆನ್ನಾಗಿದ್ದು, ಸಂಕಲನ ಗಮನ ಸೆಳೆಯುತ್ತದೆ. ಹೆಚ್ಚು ಪಾತ್ರಗಳನ್ನು ತಂದಿರುವುದು, ಕತೆ ಇನ್ನಷ್ಟು ಸಂಕೀರ್ಣ ಅಂತ ಎನಿಸುವುದು ಮೈನಸ್ ಪಾಯಿಂಟ್. ಆದರೂ ಪಕ್ಕಾ ಕಮರ್ಷಿಯಲ್ ಮೂವಿ. ಒಮ್ಮೆ ನೋಡಿದರೆ ಮೋಸವಿಲ್ಲ. ಗಣೇಶ್ ಅಭಿಮಾನಿಗಳಿಗಂತೂ ಹಬ್ಬವೋ ಹಬ್ಬ.