ದೇಶದ ಅತಿದೊಡ್ಡ ಸಾಫ್ಟ್‌ವೇರ್ ಸೇವಾ ರಫ್ತು ಕಂಪನಿ ಟಾಟಾ ಕನ್ಸಲ್ಟನ್ಸಿ ಸರ್ವೀಸಸ್ 'ಟಿಸಿಎಸ್' ಬ್ರಿಟನ್‌ನ 1 ಸಾವಿರ ಪದವೀಧರರಿಗೆ ಐಟಿ ತರಬೇತಿ ನೀಡಲು ನಿರ್ಧರಿಸಿದೆ.
ಬ್ರಿಟಿಷ್ ಕೌನ್ಸಿಲ್ ಪಾಲುದಾರಿಕೆಯಲ್ಲಿ ಈ ಕಾರ್ಯಕ್ರಮವನ್ನು ಭಾರತದಲ್ಲಿರುವ ತನ್ನ ಸಾಫ್ಟ್‌ವೇರ್ ಅಭಿವೃದ್ಧಿ ಕೇಂದ್ರ ಮತ್ತು ಅನುಶೋಧನಾ ಕೇಂದ್ರಗಳಲ್ಲಿ ಹಮ್ಮಿಕೊಳ್ಳಲಾಗುವುದು ಎಂದು ಅದು ತಿಳಿಸಿದೆ. ಪ್ರಧಾನಿ ನರೇಂದ್ರ ಮೋದಿ ಅವರು ಬ್ರಿಟನ್ ಪ್ರವಾಸದಲ್ಲಿರುವಾಗಲೇ ಈ ಪ್ರಕಟಣೆ ಹೊರಬಿದ್ದಿದೆ.
ಈ ಕಾರ್ಯಕ್ರಮದ ಅಡಿ, ಬ್ರಿಟನ್ ವಿಶ್ವವಿದ್ಯಾಲಯಗಳ 1 ಸಾವಿರ ಪದವೀಧರರು ಒಂದು ವರ್ಷದ ಕಾಲ ಟಿಸಿಎಸ್‌ನಲ್ಲಿ ತರಬೇತಿ ಮತ್ತು ಕೆಲಸ ಮಾಡುವ ಅವಕಾಶ ಪಡೆಯಲಿದ್ದಾರೆ. 2016ರಿಂದ 2020ರ ವರೆಗೆ ತರಬೇತಿ ನೀಡಲಾಗುವುದು ಎಂದು ಟಿಸಿಎಸ್ ತಿಳಿಸಿದೆ.
ಪದವೀಧರ ವಿದ್ಯಾರ್ಥಿಗಳು ಭಾರತದ ಟಿಸಿಎಸ್ ಸಾಫ್ಟ್‌ವೇರ್ ಅಭಿವೃದ್ಧಿ ಕೇಂದ್ರಗಳಲ್ಲಿ ತಾಂತ್ರಿಕ ಮತ್ತು ವಾಣಿಜ್ಯ ಕೌಶಲ್ಯದ ಜತೆಗೆ ಡಿಜಿಟಲ್ ಮತ್ತು ಬಿಸಿನೆಸ್ ಕೌಶಲ್ಯದ ತರಬೇತಿ ಪಡೆಯಲಿದ್ದಾರೆ. ಮುಂಬರುವ ತಿಂಗಳಲ್ಲಿ ತರಬೇತಿಗೆ ಅರ್ಜಿ ಆಹ್ವಾನಿಸಲಾಗುವುದು ಎಂದು ಟಿಸಿಎಸ್ ತಿಳಿಸಿದೆ.
ಬ್ರಿಟನ್‌ನ ಐಟಿ ಕ್ಷೇತ್ರದಲ್ಲಿ 2020ರ ವೇಳೆಗೆ 40 ಸಾವಿರ ಪದವೀಧರರ ಕೊರತೆ ಸೃಷ್ಟಿಯಾಗುವ ಹಿನ್ನೆಲೆಯಲ್ಲಿ ಮುಂದಿನ ಪೀಳಿಗೆಯ ಡಿಜಿಟಲ್ ಪ್ರತಿಭಾವಂತರನ್ನು ಅಣಿಗೊಳಿಸುವ ಉದ್ದೇಶದಿಂದ ಟಿಸಿಎಸ್-ಬ್ರಿಟಿಷ್ ಕೌನ್ಸಿಲ್ ಪಾಲುದಾರಿಕೆಯಲ್ಲಿ ತರಬೇತಿ ನೀಡಲು ನಿರ್ಧರಿಸಲಾಗಿದೆ. ಜತೆಗೆ, ಭಾರತ - ಬ್ರಿಟನ್ ಸಂಬಂಧ ಬಲವರ್ಧನೆಯನ್ನು ಹೊಸ ಹಂತಕ್ಕೆ ಕೊಂಡೊಯ್ಯಲು ಇದು ಸಹಕಾರಿಯಾಗಲಿದೆ ಎಂದು ಬ್ರಿಟಿಷ್ ಕೌನ್ಸಿಲ್ ಸಿಇಒ ಸರ್ ಸಿಯಾರನ್ ಡಿವೇನ್ ತಿಳಿಸಿದ್ದಾರೆ.
ಎಕನಾಮಿಕ್ ಟೈಮ್ಸ್ ಲಂಡನ್