ಗುರು ದೇಶಪಾಂಡೆ ನಿರ್ದೇಶನದಲ್ಲಿ ಮೂಡಿ ಬರುತ್ತಿರುವ 'ಜಾನ್‌ ಜಾನಿ ಜನಾರ್ಧನ್‌' ಚಿತ್ರಕ್ಕಾಗಿ ಮಾಲಾಶ್ರೀ ಬಣ್ಣ ಹಚ್ಚುತ್ತಿದ್ದಾರೆ. ಈ ಚಿತ್ರದಲ್ಲಿ ಇವರಿಗೆ ವಿಶೇಷ ಪಾತ್ರ ನೀಡಿದ್ದಾರಂತೆ ನಿರ್ದೇಶಕರು. ಪಾತ್ರದ ಬಗ್ಗೆ ಯಾವುದೇ ಸುಳಿವು ಬಿಟ್ಟು ಕೊಡದ ನಿರ್ದೇಶಕರು, ಅದೊಂದು ವಿಭಿನ್ನ ಪಾತ್ರವೆಂದು ಹೇಳುವ ಮೂಲಕ ಕುತೂಹಲ ಮೂಡಿಸಿದ್ದಾರೆ. ಈ ಚಿತ್ರಕ್ಕೆ ಮೂವರು ನಾಯಕರು. ಅಜಯ್‌ ರಾವ್‌, ಲೂಸ್‌ಮಾದ ಯೋಗಿ ಮತ್ತು ಮದರಂಗಿ ಕೃಷ್ಣ ಪ್ರಮುಖ ಪಾತ್ರ ನಿರ್ವಹಿಸುತ್ತಿದ್ದಾರೆ. ಮೂವರು ಹುಡುಗರ ಕುರಿತಾದ ಚಿತ್ರದಲ್ಲಿ ಮಾಲಾಶ್ರೀ ಅವರ ಪಾತ್ರ ಏನಿರಬಹುದು ಅನ್ನುವ ಚರ್ಚೆ ಈಗಾಗಲೇ ಶುರುವಾಗಿದೆ. ಅಂದಹಾಗೆ ಈ ಚಿತ್ರವು ಮಲೆಯಾಳಂನ 'ಅಮರ್‌ ಅಕ್ಬರ್‌ ಆಂಥೋನಿ' ಚಿತ್ರದ ರೀಮೇಕ್‌ ಅಂತೆ. ಅದರಲ್ಲಿ ಕೆಲವು ದೃಶ್ಯಗಳನ್ನು ಬದಲಾಯಿಸಿಕೊಂಡು ಕನ್ನಡಕ್ಕೆ ತರುತ್ತಿದ್ದಾರೆ ಗುರು ದೇಶಪಾಂಡೆ. ಈ ನಿರ್ದೇಶಕರ ಹಿಂದಿನ ಚಿತ್ರ ರಾಜಾಹುಲಿ, ಬಾಕ್ಸ್‌ ಆಫೀಸ್‌ನಲ್ಲಿ ಸಖತ್‌ ಸದ್ದು ಮಾಡಿತ್ತು. ಹೀಗಾಗಿ ಅವರ ಹೊಸ ಸಿನಿಮಾ ಬಗ್ಗೆಯೂ ನಿರೀಕ್ಷೆ ಇದೆ.