ಕೊಲೆಗೆ ಯತ್ನಿಸಿದ ಐವರಿಗೆ 10 ವರ್ಷ ಸಜೆ

ಶಿವಮೊಗ್ಗ: ಜಮೀನು ವ್ಯಾಜ್ಯದಲ್ಲಿ ತಮ್ಮ ಎದುರಾಳಿಗೆ ಸಹಕಾರ ನೀಡಿದ ಆಪಾದನೆ ಮೇಲೆ ಕೊಲೆಗೆ ಯತ್ನಿಸಿದ ಐವರಿಗೆ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯ 10 ವರ್ಷ ಸಜೆ ಮತ್ತು ತಲಾ 27 ಸಾವಿರ ರೂ. ದಂಡ ವಿಧಿಸಿ ಗುರುವಾರ ತೀರ್ಪು ನೀಡಿದೆ.

ಶಿವಮೊಗ್ಗ ತಾಲೂಕು ಸುತ್ತುಕೋಟೆಯ ರುದ್ರಪ್ಪ ಅವರ ಮಕ್ಕಳಾದ ಜಗದೀಶ(30), ವೆಂಕಟೇಶ(25), ಮಂಜಪ್ಪ (28), ಡಿ.ರಾಮಚಂದ್ರಪ್ಪ ಅವರ ಮಗ ಬಾಲಚಂದ್ರ(41), ಹೊನ್ನಾಳಿ ತಾಲೂಉ ಕುಂಕ್ವಾದ ಮೇದೂರಪ್ಪ(25) ಶಿಕ್ಷೆಗೆ ಗುರಿಯಾದವರು. ಈ ಐವರು ಸುತ್ತುಕೋಟೆಯ ಶಿವಮೂರ್ತಿ ಅವರನ್ನು ಮಚ್ಚು ಮತ್ತು ದೊಣ್ಣೆಗಳಿಂದ ಹಲ್ಲೆ ನಡೆಸಿ ಕೊಲೆಗೆ ಯತ್ನಿಸಿದ್ದರು.

ಹಿನ್ನೆಲೆ: ಸುತ್ತುಕೋಟೆಯ ಎಸ್.ಜಿ.ರಾಮಚಂದ್ರಪ್ಪ ಮತ್ತು ಡಿ.ರಾಮಚಂದ್ರಪ್ಪ ಇವರ ನಡುವೆ ಜಮೀನಿಗೆ ಸಂಬಂಧಿಸಿದಂತೆ ಜಗಳ ಉಂಟಾಗಿ ನ್ಯಾಯಾಲಯದಲ್ಲಿ ಪ್ರಕರಣ ದಾಖಲಾಗಿತ್ತು. ಇದೇ ಪ್ರಕರಣಕ್ಕೆ ಸಂಬಂಧಿಸಿದಂತೆ ಸುತ್ತುಕೋಟೆಯವರಾದ ಶಿವಮೂರ್ತಿ ಅವರು 2008ನೇ ಡಿಸೆಂಬರ್ 27ರಂದು ಮಧ್ಯಾಹ್ನ ಎಮ್ಮೆ ಮೇಯುಸುತ್ತಿದ್ದಾಗ ದ್ವಿಚಕ್ರ ವಾಹನದಲ್ಲಿ ಬಂದ ಐವರು ಶಿವಮೂರ್ತಿ ಅವರನ್ನು ಅವಾಚ್ಯ ಶಬ್ಧಗಳಿಂದ ನಿಂಧಿಸಿದ್ದಲ್ಲದೆ ಮಚ್ಚು ಮತ್ತು ದೊಣ್ಣೆಗಳಿಂದ ಹಲ್ಲೆ ನಡೆಸಿದ್ದರು. ಇದರಲ್ಲಿ ಶಿವಮೂರ್ತಿ ಅವರ ಎಡಗೈ ಮಣಿಕಟ್ಟು ಬಳಿ ಕೈ ಕತ್ತರಿಸಿ ಜೋತಾಡುತ್ತಿತ್ತು. ತೀವ್ರ ಗಾಯಗೊಂಡಿದ್ದ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು.

ದೂರು ಅನ್ವಯ ಶಿವಮೊಗ್ಗ ಗ್ರಾಮಾಂತರ ಠಾಣೆ ಪೊಲೀಸರು ಆರೋಪಿಗಳ ವಿರುದ್ಧ ದೋಷಾರೋಪ ಸಲ್ಲಿಸಿದ್ದರು. ವಿಚಾರಣೆ ನಡೆಸಿದ ಪ್ರಧಾನ ಜಿಲ್ಲಾ ಮತ್ತು ಸತ್ರ ನ್ಯಾಯಾಲಯದ ನ್ಯಾಯಾಧೀಶ ಜೆ.ಎಂ.ಖಾಜಿ ಶಿಕ್ಷೆ ವಿಧಿಸಿ ತೀರ್ಪು ನೀಡಿದ್ದಾರೆ. ಸರಕಾರದ ಪರವಾಗಿ ಸರಕಾರಿ ಅಭಿಯೋಜಕ ವಿ.ಜಿ.ಯಳಗೇರಿ ವಾದಿಸಿದ್ದರು.