ರಾಜ್ಯದಲ್ಲಿ ಯಾವುದು ದುಬಾರಿ

ಬೆಂಗಳೂರು : ರಾಜ್ಯದ ಜನರಿಗೆ ಎರಡೆರಡು ಬಿಸಿ ತಟ್ಟಲಿದೆ. ಒಂದು ಕಡೆ ಕಡು ಬಿಸಿಲ ಬೇಗೆಯಿಂದ ಜನರ ಬಸವಳಿಯುತ್ತಿದ್ದಾರೆ. ಮತ್ತೊಂದು ಕಡೆ ಬೆಲೆ ಏರಿಕೆಯ ಬಿಸಿ ಜನರ ಬೇಬಿಗೆ ಭಾರ ಆಗಲಿದೆ.

ಕರೆಂಟ್‌ ದರ ಏರಿಕೆ ಮಾಡಿ ಸರಕಾರ ಜನರಿಗೆ ಶಾಕ್‌ ಕೊಟ್ಟಿದೆ. ವಿದ್ಯುತ್‌ ದರ ಏ.1ರಿಂದಲೇ ಜಾರಿಗೆ ಬರಲಿದೆ. ಅಷ್ಟೇ ಅಲ್ಲ ಪರಿಷ್ಕರಣೆ ಮಾಡಿರುವ ಆಸ್ತಿಗಳ ಮಾರ್ಗಸೂಚಿ ದರ ಏ.1ರಿಂದಲೇ ಅನ್ವಯವಾಗಲಿದೆ. ಬಜೆಟ್‌ನಲ್ಲಿ ಘೋಷಿಸಿರುವ ತೆರಿಗೆ ಹೆಚ್ಚಳವೂ ಏಪ್ರಿಲ್‌ನಿಂದಲೇ ಜಾರಿಗೆ ಬರುವುದರಿಂದ ಸಾಕಷ್ಟು ಹೊರೆ ಹೊರಲು ಜನರು ಸಿದ್ಧರಾಗಬೇಕಿದೆ.

ಪೆಟ್ರೋಲ್‌ ಹಾಗೂ ಡೀಸೆಲ್‌ ಮಾರಾಟದ ಮೇಲಿನ ತೆರಿಗೆಯನ್ನು ರಾಜ್ಯ ಸರಕಾರ ಹೆಚ್ಚಳ ಮಾಡಿರುವುದರಿಂದ ಪ್ರತಿ ಲೀಟರ್‌ ಪೆಟ್ರೋಲ್‌ 1.89 ರೂ. ಹಾಗೂ ಡೀಸೆಲ್‌ ಬೆಲೆ ಪ್ರತಿ ಲೀಟರ್‌ ಮೇಲೆ 98 ಪೈಸೆ ಏರಿಕೆಯಾಗಲಿದೆ.

ಗುಂಡು ಪ್ರಿಯರ ಜೇಬಿಗೆ ಹೊರೆ ಬೀಳಲಿದೆ. ತೆರಿಗೆ ಹೆಚ್ಚಳ ಮಾಡಿರುವುದರಿಂದ ಬಿಯರ್‌ ಸೇರಿದಂತೆ ಎಲ್ಲ ಮಾದರಿಯ ಮದ್ಯದ ಬೆಲೆ ಹೆಚ್ಚಳ ಆಗಲಿದೆ. ಡಿಟಿಎಚ್‌, ತಂಪು ಪಾನೀಯಗಳು, ಪ್ರವಾಸಿ ವಾಹನಗಳ ಸೇವೆ, ಮೋಟಾರು ವಾಹನ ತೆರಿಗೆ ಹಾಗೂ ಮನರಂಜನಾ ತೆರಿಗೆ ಹೆಚ್ಚಳವಾಗಲಿದೆ.

ಆಸ್ತಿ ತೆರಿಗೆ ಹೆಚ್ಚಳ :

ಬೆಂಗಳೂರಿನಲ್ಲಿ ಬಿಬಿಎಂಪಿಯು ತನ್ನ ವ್ಯಾಪ್ತಿಯ ಆಸ್ತಿಗಳ ಪರಿಷ್ಕರಣೆ ಮಾಡಿದೆ. ಎಂಟು ವರ್ಷಗಳ ನಂತರ ಬಿಬಿಎಂಪಿ ದರ ಪರಿಷ್ಕರಣೆ ಮಾಡಿದೆ. ಶೇ.20-25ರಷ್ಟು ಆಸ್ತಿ ತೆರಿಗೆ ಜಾಸ್ತಿ ಆಗುವುದರಿಂದ ಬೆಂಗಳೂರಿನಲ್ಲಿ ಆಸ್ತಿ ಹೊಂದಿರುವವರು ಮತ್ತಷ್ಟು ತೆರಿಗೆ ಭಾರ ಹೊರಬೇಕಾಗುತ್ತದೆ.

ಮಾರ್ಗಸೂಚಿ ದರ ಏರಿಕೆ :

ಆಸ್ತಿಗಳ ಮಾರ್ಗಸೂಚಿ ದರವನ್ನು ಸರಕಾರ ಪರಿಷ್ಕರಣೆ ಮಾಡಿ ಈಗಾಗಲೇ ಅಧಿಸೂಚನೆ ಹೊರಡಿಸಿದೆ. ಹೊಸ ದರ ಏ.1ರಿಂದ ರಾಜ್ಯಾದ್ಯಂತ ಅನ್ವಯವಾಗುವುದರಿಂದ ಆಸ್ತಿ ನೋಂದಣಿ ದುಬಾರಿಯಾಗಲಿದೆ.