ಮುಂಬಯಿ: ಗೃಹ, ಕಾರು, ಟಿ.ವಿ, ವಾಷಿಂಗ್ ಮೆಷೀನ್ ಖರೀದಿಸಲು ಸಾಲ ತೆಗೆದುಕೊಳ್ಳ ಬಯಸುವವರಿಗೆ ಇದು ಸಿಹಿ ಸುದ್ದಿ. ಮುಂದಿನ ತಿಂಗಳು ಏಪ್ರಿಲ್‌ನಿಂದ ಈ ಸಾಲಗಳ ಬಡ್ಡಿ ದರಗಳು ಇಳಿಕೆಯಾಗುವ ನಿರೀಕ್ಷೆ ಇದೆ. ರಿಸರ್ವ್ ಬ್ಯಾಂಕ್ ಆಫ್ ಇಂಡಿಯಾ ಏಪ್ರಿಲ್ 5ರಂದು ಮುಂದಿನ ಹಣಕಾಸು ಪರಾಮರ್ಶೆ ಪ್ರಕಟಿಸಲಿದ್ದು, ಅಂದು ಬಡ್ಡಿ ದರ ಕಡಿತಗೊಳಿಸದಿದ್ದರೂ, ಬ್ಯಾಂಕ್‌ಗಳು ಸಾಲದ ದರ ಇಳಿಸುವ ನಿರೀಕ್ಷೆ ಇದೆ. ಇದಕ್ಕೆ ಕಾರಣ ಬ್ಯಾಂಕ್‌ಗಳು ಸಾಲದ ಬಡ್ಡಿ ದರ ನಿಗದಿಪಡಿಸಲು ಆರ್‌ಬಿಐ ನಿರ್ದೇಶನದ ಪ್ರಕಾರ ಹೊಸ ಪದ್ಧತಿಯನ್ನು ಏಪ್ರಿಲ್‌ನಿಂದ ಜಾರಿಗೊಳಿಸುತ್ತಿರುವುದು.
ಕೇಂದ್ರ ಸರಕಾರ ಸಣ್ಣ ಉಳಿತಾಯ ಯೋಜನೆಗಳ ದರಗಳನ್ನು ತಗ್ಗಿಸಿ ಬ್ಯಾಂಕ್‌ಗಳಿಗೆ ಸಾಲದ ಬಡ್ಡಿ ದರ ತಗ್ಗಿಸಲು ಹಾದಿ ಸುಗಮಗೊಳಿಸಿದೆ. ಇದರ ಜತೆಗೆ ಬ್ಯಾಂಕ್‌ಗಳೂ ಸಾಲದ ದರ ನಿಗದಿಪಡಿಸಲು ಹೊಸ ಪದ್ಧತಿಯನ್ನು (ಮಾರ್ಜಿನಲ್ ಕಾಸ್ಟ್ ಆಫ್ ಫಂಡ್ಸ್ ಬೇಸ್ಡ್ ಲೆಂಡಿಂಗ್ ರೇಟ್-ಎಂಸಿಎಲ್‌ಆರ್) ಅನುಸರಿಸಲಿವೆ. ಇದರಿಂದ ಅನುಕೂಲಕರ ಪರಿಸ್ಥಿತಿಯಲ್ಲಿ ಬ್ಯಾಂಕ್‌ಗಳು ತಕ್ಷಣವೇ ಗ್ರಾಹಕರಿಗೆ ಲಾಭವನ್ನು ವರ್ಗಾಯಿಸಬೇಕಾಗುತ್ತದೆ.
ಏನಿದು ಹೊಸ ಪದ್ಧತಿ?:
ಇದುವರೆಗೆ ಬ್ಯಾಂಕ್‌ಗಳು ಹಲವಾರು ವಿಧಾನಗಳಲ್ಲಿ ಸಾಲದ ಕನಿಷ್ಠ ಬಡ್ಡಿ ದರಗಳನ್ನು ನಿರ್ಧರಿಸುತ್ತಿದ್ದವು. ಆದರೆ ಏಪ್ರಿಲ್‌ನಿಂದ ಬ್ಯಾಂಕ್‌ಗಳು ಗ್ರಾಹಕರಿಗೆ ಸಾಲ ವಿತರಣೆಗೋಸ್ಕರ ಪಡೆಯುವ ಸಾಲಕ್ಕೆ ತಗಲುವ ವೆಚ್ಚ ಅಥವಾ ಬಡ್ಡಿ ದರದ ಆಧಾರದ ಮೇಲೆ ಗ್ರಾಹಕರಿಗೆ ನೀಡುವ ಸಾಲದ ಕನಿಷ್ಠ ಬಡ್ಡಿ ದರವನ್ನು ನಿರ್ಣಯಿಸಬೇಕಾಗುತ್ತದೆ. ಇದೀಗ ಸರಕಾರ ಸಣ್ಣ ಉಳಿತಾಯ ಯೋಜನೆಗಳ ಬಡ್ಡಿ ದರವನ್ನು ಇಳಿಸಿರುವುದರಿಂದ ಬ್ಯಾಂಕ್‌ಗಳಿಗೆ ಕೂಡ ಸಾಲದ ಬಡ್ಡಿ ದರ ತಗ್ಗಿಸಲು ಪೂರಕವಾಗಿದ್ದು, ದರ ಇಳಿಕೆ ನಿರೀಕ್ಷಿಸಲಾಗಿದೆ.
ಬ್ಯಾಂಕ್‌ಗಳಲ್ಲಿ ಸಾಲದ ಬಡ್ಡಿ ದರ ನಿಗದಿಗೆ ಹೊಸ ಪದ್ಧತಿ ಏಪ್ರಿಲ್‌ನಿಂದ ಜಾರಿ