ಭಾರತದಲ್ಲಿನ ಚಿಲ್ಲರೆ ಮಾರುಕಟ್ಟೆ ಬಗ್ಗೆ ಅಧ್ಯಯನ ನಡೆಸಿರುವ ಭಾರತೀಯ ಉದ್ಯಮಗಳ ಒಕ್ಕೂಟ(ಸಿಐಐ) ಮತ್ತು ಬೋಸ್ಟನ್ ಕನ್ಸಲ್ಟಿಂಗ್ ಗ್ರೂಪ್(ಬಿಸಿಜಿ) ಪ್ರಕಾರ, ಚಿಲ್ಲರೆ ಮಾರುಕಟ್ಟೆ ಗಣನೀಯ ಬೆಳವಣಿಗೆ ದಾಖಲಿಸಲಿದೆ.
2015ರಲ್ಲಿ ಈ ಮಾರುಕಟ್ಟೆಯ ಗಾತ್ರ 630 ಶತಕೋಟಿ ಡಾಲರ್‌ನಷ್ಟಿದ್ದು, ಇನ್ನು ನಾಲ್ಕು ವರ್ಷಗಳಲ್ಲಿ ತ್ವರಿತ ಬೆಳವಣಿಗೆಯಾಗಲಿದೆ. ದುಡಿಯುವ ವರ್ಗದಲ್ಲಿ ಹೆಚ್ಚಿನ ಯುವಕರು ಸೇರಿಕೊಳ್ಳುತ್ತಿದ್ದು, ತಲಾ ವರಮಾನ ಶೇ.70ರಷ್ಟು ಏರಿಕೆಯಾಗುತ್ತದೆ. ಇದರಿಂದ ಚಿಲ್ಲರೆ ಮಾರುಕಟ್ಟೆ ಮೇಲೆ ಸಕಾರಾತ್ಮಕ ಪರಿಣಾಮ ಉಂಟಾಗಲಿದೆ. ನಗರಗಳ ತ್ವರಿತ ಬೆಳವಣಿಗೆ ಜತೆಗೆ ವಿಭಕ್ತ ಕುಟುಂಬಗಳಿಂದ ಉತ್ಪನ್ನಗಳ ತಲಾ ಬಳಕೆ ಪ್ರಮಾಣದಲ್ಲಿ ಏರಿಕೆಯಾಗುತ್ತದೆ. ಇದೆಲ್ಲದರ ಪರಿಣಾಮ ಚಿಲ್ಲರೆ ಮಾರುಕಟ್ಟೆ ವೃದ್ಧಿಯಾಗುತ್ತದೆ ಎನ್ನುತ್ತಿದೆ ಅಧ್ಯಯನ ವರದಿ.
''ಸಂಘಟಿತ ಚಿಲ್ಲರೆ ಮತ್ತು ಇ-ಕಾಮರ್ಸ್ ವಲಯಗಳು ತ್ವರಿತ ಬೆಳವಣಿಗೆ ಕಾಣಲಿವೆ. ಅವಕಾಶಗಳು ಬಹಳಷ್ಟಿದ್ದು, ಭಾರತೀಯ ಚಿಲ್ಲರೆ ಮಾರಾಟಗಾರರು ಇದನ್ನು ಸೂಕ್ತವಾಗಿ ಬಳಸಿಕೊಳ್ಳಬೇಕಿದೆ,'' ಎಂದು ಬಿಸಿಜಿ ಇಂಡಿಯಾದ ನಿರ್ದೇಶಕ ಅಭೀಕ್ ಸಿಂಘಿ ಅಭಿಪ್ರಾಯಪಟ್ಟಿದ್ದಾರೆ.
ಹೊಸದಿಲ್ಲಿ: ಇನ್ನು ನಾಲ್ಕು ವರ್ಷಕ್ಕೆ ಅಂದರೆ, 2020ರ ಹೊತ್ತಿಗೆ ಭಾರತದ ಚಿಲ್ಲರೆ ಮಾರುಕಟ್ಟೆ ಎರಡು ಪಟ್ಟು ಬೆಳೆಯಲಿದೆ. ಮಾರುಕಟ್ಟೆಯು 1,100ರಿಂದ 1,200 ಶತಕೋಟಿ ಡಾಲರ್‌ಗೆ ವೃದ್ಧಿಯಾಗುತ್ತದೆ ಎಂದು ಅಧ್ಯಯನವೊಂದು ತಿಳಿಸಿದೆ.