ವೆಲಿಂಗ್ಟನ್‌: ಟೆಸ್ಟ್‌ ಪಂದ್ಯಗಳನ್ನು ಐದರಿಂದ ನಾಲ್ಕು ದಿನಗಳಿಗೆ ಇಳಿಸಿ ಪಿಂಕ್‌ ಚೆಂಡುಗಳಲ್ಲಿ ಆಡುವುದನ್ನು ಮುಂದುವರಿಸಬೇಕೆಂದು ನ್ಯೂಜಿಲೆಂಡ್‌ ಕ್ರಿಕೆಟ್‌ನ ಮುಖ್ಯಸ್ಥ ಡೇವಿಡ್‌ ವೈಟ್‌ ಸಲಹೆ ನೀಡಿದ್ದಾರೆ. ಇಎಸ್‌ಪಿನ್‌ ಕ್ರಿಕ್‌ಇನ್ಫೊ.ಕಾಮ್‌ಗೆ ಈ ಬಗ್ಗೆ ಪ್ರತಿಕ್ರಿಯಿಸಿರುವ ವೈಟ್‌, ''ಆಧುವಿನ ಟಿ20 ಕ್ರಿಕೆಟ್‌ ಯುಗದಲ್ಲಿ ಟೆಸ್ಟ್‌ ಕ್ರಿಕೆಟ್‌ ಜನರನ್ನು ಕ್ರೀಡಾಂಗಣ ಕಡೆ ಸೆಳೆಯಲು ವಿಫಲವಾಗುತ್ತಿದೆ. ನಾವು ಈ ಬಗ್ಗೆ ಗಂಭೀರವಾಗಿ ಯೋಚಿಸಬೇಕಿದೆ. ಸದ್ಯ ಇರುವ ಸವಾಲು ಏನೆಂದರೆ ಮೂರು ಪಂದ್ಯಗಳ ಟೆಸ್ಟ್‌ ಸರಣಿಗಾಗಿ ನಾಲ್ಕು ವಾರಗಳ ಕಾಲ ಆಡಬೇಕಿದೆ. ಇದೊಂದು ದೀರ್ಘ ಅವಧಿ. ಆದರೆ ಮೂರು ಪಂದ್ಯಗಳ ಟೆಸ್ಟ್‌ ಸರಣಿಯಲ್ಲಿ ನಾಲ್ಕು ದಿನಗಳ ಟೆಸ್ಟ್‌ ಪಂದ್ಯಗಳನ್ನಾಡಿದರೆ ಮೂರು ವಾರಗಳ ಒಳಗೆ ಸರಣಿ ಮುಗಿಯುತ್ತದೆ. ಒಂದು ವಾರ ಉಳಿಯುತ್ತದೆ. ಹೀಗೆ ಮಾಡುವುದರಿಂದ ವೇಳಾಪಟ್ಟಿಯನ್ನು ರಚಿಸಲು ಸಹಾಯವಾಗುತ್ತದೆ ಮತ್ತು ಆಟಗಾರರ ಮೇಲಿನ ಒತ್ತಡವೂ ಕಡಿಮೆಯಾಗತ್ತದೆ,'' ಎಂದು ತಿಳಿಸಿದ್ದಾರೆ. ಇದಕ್ಕೂ ಮೊದಲು ಆಸ್ಪ್ರೇಲಿಯಾ ತಂಡದ ಮಾಜಿ ನಾಯಕ ಮಾರ್ಕ್‌ ಟೇಲರ್‌ ನಾಲ್ಕು ದಿನಗಳ ಟೆಸ್ಟ್‌ ಪಂದ್ಯಗಳ ಬಗ್ಗೆ ಮೊದಲು ಪ್ರಸ್ತಾಪಿಸಿದ್ದರು. ಈ ಪ್ರಸ್ತಾಪಕ್ಕೆ ಆಸೀಸ್‌ನ ಮಾಜಿ ಸ್ಪಿನ್‌ ಮಾಂತ್ರಿಕ ಶೇನ್‌ ವಾರ್ನ್‌, ಕಾಂಗರೂ ಪಡೆಯ ಮಾಜಿ ನಾಯಕ ಗ್ರೆಗ್‌ ಚಾಪೆಲ್‌, ಇಂಗ್ಲೆಂಡ್‌ ಕ್ರಿಕೆಟ್‌ ಮಂಡಳಿಯ ಮುಖ್ಯಸ್ಥ ಕಾಲಿನ್‌ ಗ್ರೇವ್ಸ್‌ ಬೆಂಬಲ ಸೂಚಿಸಿದ್ದರು.
↧
ಟೆಸ್ಟ್‌ ಪಂದ್ಯಗಳನ್ನು 4 ದಿನಕ್ಕೆ ಇಳಿಸಿ: ವೈಟ್‌
↧