ಐದನೇ ಸುತ್ತಿನ ಅಂತಿಮ ಕ್ಷ ಣದಲ್ಲಿ ರಾಯರ್‌ ಕೆಡವಿದ ಹರಿಯಾಣ ಬಾಕ್ಸರ್‌ ಲಂಡನ್‌: ಮತ್ತೊಮ್ಮೆ ಶಕ್ತಿಶಾಲಿ ಪಂಚ್‌ ನೀಡುವ ಮೂಲಕ ಗಮನ ಸೆಳೆದ ಭಾರತದ ಬಾಕ್ಸರ್‌ ವಿಜೇಂದರ್‌ ಸಿಂಗ್‌ ಫ್ರಾನ್ಸ್‌ನ ಮ್ಯಾಟಿಯೊಜ್‌ ರಾಯರ್‌ ವಿರುದ್ಧ ಗೆಲುವು ಸಾಧಿಸುವುದರೊಂದಿಗೆ ತಮ್ಮ ವೃತ್ತಿಪರ ಬಾಕ್ಸಿಂಗ್‌ನಲ್ಲಿ ಸತತ ಐದನೇ ಜಯ ಗಳಿಸಿದ್ದಾರೆ. ಶನಿವಾರ ತಡರಾತ್ರಿ ನಡೆದ ಆರು ಸುತ್ತಿನ ಸೂಪರ್‌ ಮಿಡಲ್‌ವೇಟ್‌ ವಿಭಾಗದ ಪಂದ್ಯದಲ್ಲಿ ಮಿಂಚಿದ ಹರಿಯಾಣದ ಬಾಕ್ಸರ್‌ ವಿಜೇಂದರ್‌ ಸಿಂಗ್‌ ಐದನೇ ಸುತ್ತು ಮುಕ್ತಾಯದ ಹಂತದಲ್ಲಿ ಮ್ಯಾಟಿಯೊಜ್‌ ರಾಯರ್‌ ಅವರನ್ನು ಬಗ್ಗು ಬಡಿದು ಸಂಭ್ರಮಿಸಿದರು. ವಿಜೇಂದರ್‌ ಆಡಿದ ಪಂದ್ಯಗಳ ಪೈಕಿ ಇದು ದೀರ್ಘವದಿ ಪಂದ್ಯ ಎನಿಸಿದ್ದು ವಿಶೇಷವಾಗಿತ್ತು. ತನಗಿಂತ ಸಾಕಷ್ಟು ಅನುಭವಿ ಹೊಂದಿದ್ದ ಎದುರಾಳಿ ರಾಯರ್‌ ವಿರುದ್ಧ ಸಂಪೂರ್ಣ ಪ್ರಾಬಲ್ಯ ಮೆರೆದ 30 ವರ್ಷದ ವಿಜೇಂದರ್‌ ಐದು ಸುತ್ತೂಗಳಲ್ಲೂ ಆಕರ್ಷಕ ಹಾಗೂ ಬಲಿಷ್ಠ ಪಂಚ್‌ ನೀಡುವ ಮೂಲಕ ರಾಯರ್‌ ಬೆವರಿಳಿಸಿದರು. ಈ ಹಿಂದಿನ ಪಂದ್ಯಗಳಲ್ಲಿ ಮೂರು ಸುತ್ತುಗಳಲ್ಲೇ ಗೆಲುವು ಸಾಧಿಸಿದ್ದ ವಿಜೇಂದರ್‌ ಈ ಪಂದ್ಯದಲ್ಲಿ ಇನ್ನಷ್ಟು ಹೋರಾಟ ಪ್ರದರ್ಶಿಸಬೇಕಾಯಿತು. ರಾಯರ್‌, ಆರಂಭದಿಂದಲೇ ರಕ್ಷಣಾತ್ಮಕ ಆಟವಾಡಿದರೆ, ವಿಜೇಂದರ್‌ ಮೊದಲ ಸುತ್ತಿನಲ್ಲಿ ಅತ್ಯಂತ ಎಚ್ಚರಿಕೆಯ ಆಟಕ್ಕೆ ಒತ್ತು ಕೊಟ್ಟರು. ಈ ಹಂತದಲ್ಲಿ ವಿಜೇಂದರ್‌ಗೆ ಕೆಲವು ಪಂಚ್‌ ನೀಡಲು ರಾಯರ್‌ ಯತ್ನಿಸಿದರಾದರೂ ಅಂಕ ಗಿಟ್ಟಿಸುವಲ್ಲಿ ವಿಫಲರಾದರು. ಆದರೆ ಹಿಂದಿನ ಪಂದ್ಯಗಳಲ್ಲಿ ಸಾಕಷ್ಟು ಅನುಭವ ಹೊಂದಿದ್ದ ಭಾರತದ ಬಾಕ್ಸರ್‌ ವಿಜೇಂದರ್‌ ದ್ವಿತೀಯ ಸುತ್ತಿನಲ್ಲಿ ರಾಯರ್‌ಗೆ ಬಲಿಷ್ಠ ಪಂಚ್‌ ನೀಡಿ ಅಂಕ ಗಿಟ್ಟಿಸಿದರು. ಮೂರನೇ ಸುತ್ತಿನಲ್ಲಿ ಮುಖದ ಗಾಯಕ್ಕೆ ಒಳಗಾದ ರಾಯರ್‌ ಇಡೀ ಪಂದ್ಯದಲ್ಲಿ ರಕ್ಷ ಣೆಯ ಮೋರೆ ಹೋದರೆ, ಇದರ ಪೂರ್ಣ ಲಾಭ ಪಡೆದ ವಿಜೇಂದರ್‌ ರಾಯರ್‌ ಕೆಳಗೆ ಕುಸಿಯುವವರೆಗೂ ಪ್ರಾಬಲ್ಯ ಮೆರೆದರು.
↧
ಬಾಕ್ಸರ್‌ ವಿಜೇಂದರ್‌ಗೆ ಮತ್ತೊಂದು ಗೆಲುವು
↧