ಫೈನಲ್‌ನಲ್ಲಿ ನಿಶಿಕೊರಿಗೆ ನಿರಾಸೆ ಬಾರ್ಸಿಲೋನಾ: ವಿಶ್ವದ ಮಾಜಿ ನಂ.1 ಆಟಗಾರ ಸ್ಪೇನ್‌ನ ರಾಫೆಲ್‌ ನಾಡಲ್‌, ಇಲ್ಲಿ ಮುಕ್ತಾಯಗೊಂಡ ಬಾರ್ಸಿಲೋನಾ ಓಪನ್‌ ಟೆನಿಸ್‌ ಟೂರ್ನಿಯಲ್ಲಿ ಚಾಂಪಿಯನ್‌ ಪಟ್ಟ ಅಲಂಕರಿಸಿದ್ದಾರೆ. ಇತ್ತೀಚೆಗಷ್ಟೇ ಕ್ಲೇ ಅಂಗಣದಲ್ಲಿ ನಡೆದ ಮಾಂಟೆ ಕಾರ್ಲೊ ಮಾಸ್ಟರ್ಸ್‌ ಟೆನಿಸ್‌ ಟೂರ್ನಿಯಲ್ಲಿ ಪ್ರಶಸ್ತಿ ಜಯಿಸಿದ್ದ ನಡಾಲ್‌, ಇದೀಗ ಬಾರ್ಸಿಲೋನಾ ಅಂಗಣದಲ್ಲಿ ನಡೆದ ಫೈನಲ್‌ನಲ್ಲಿ ಜಪಾನ್‌ನ ಕೀ ನಿಶಿಕೊರಿ ಅವರನ್ನು 6-4, 7-5 ಅಂತರದ ಸೆಟ್‌ಗಳಿಂದ ಬಗ್ಗು ಬಡಿದು ಚಾಂಪಿಯನ್‌ ಪಟ್ಟ ಅಲಂಕರಿಸಿದರು. ಇದು ಬಾರ್ಸಿಲೋನಾ ಅಂಗಣದಲ್ಲಿ ನಡಾಲ್‌ ಗೆದ್ದ 9ನೇ ಪ್ರಶಸ್ತಿಯಾಗಿದೆ. ಇದರೊಂದಿಗೆ ಕ್ಲೇ ಅಂಗಣದಲ್ಲಿ ಒಟ್ಟಾರೆ 49 ಪ್ರಶಸ್ತಿಗಳನ್ನು ಜಯಿಸಿದ ಅರ್ಜೆಂಟೀನಾದ ದಂತಕತೆ ಗ್ಯುಲೆರ್ಮೊ ವಿಲಾಸ್‌ ಅವರ ದಾಖಲೆಯನ್ನು ಸರಿಗಟ್ಟಿದ್ದಾರೆ. ''ಇಂಥದ್ದೊಂದು ಕ್ಷಣಕ್ಕಾಗಿ ಸಾಕಷ್ಟು ಕಠಿಣ ಪರಿಶ್ರಮ ವಹಿಸಿದ್ದೇನೆ. ಮನೆಯಂಗಣದಲ್ಲಿ ಆಡುವ ಅನುಭವವೇ ವಿಶೇಷ. ಪ್ರಶಸ್ತಿ ಗೆದ್ದಿರುವುದಕ್ಕೆ ಸಂತಸ ಹಾಗೂ ಅದೃಷ್ಟ ಮರಳಿ ಕೈಹಿಡಿದಿರುವ ಅನುಭವವಾಗುತ್ತಿದೆ,'' ಎಂದು ಪಂದ್ಯಾನಂತರ ಮಾತನಾಡಿದ ನಡಾಲ್‌ ತಮ್ಮ ಸಂತಸ ಹಂಚಿಕೊಂಡಿದ್ದಾರೆ. 29 ವರ್ಷದ ಸ್ಪೇನ್‌ ಆಟಗಾರ ಸದ್ಯ ಎಟಿಪಿ ರಾರ‍ಯಂಕಿಂಗ್‌ನಲ್ಲಿ 5ನೇ ಸ್ಥಾನದಲ್ಲಿದ್ದು, ಮುಂಬರುವ ರೊಲ್ಯಾಂಡ್‌ ಗ್ಯಾರೊಸ್‌ ಫ್ರೆಂಚ್‌ ಓಪನ್‌ ಗ್ರ್ಯಾನ್‌ ಸ್ಪ್ಯಾಮ್‌ ಟೂರ್ನಿಯಲ್ಲಿ ತಮ್ಮ 10 ಟ್ರೋಫಿ ಗೆಲ್ಲುವ ಕಡೆಗೆ ಸಕಲ ಸಿದ್ದತೆ ನಡೆಸುತ್ತಿದ್ದಾರೆ.
↧
ನಡಾಲ್‌ ಮುಡಿಗೆ ಬಾರ್ಸಿಲೋನಾ ಕಿರೀಟ
↧